euskal diaspora eta kultura
2014/06/04
Lanpetuta ibili dira joan den asteburuan San Frantzisko aldean euskaldunak. Larunbatean, eta NABOrekin batera Marin-Sonoma konderrietako Euskal Etxea antolatzaile, AEBetako Mus Txapelketa izan da, San Rafaelen, San Frantziskoko Golden Gate bestaldean. Igandean, berriz, San Frantziskoko Euskal Etxeko Piknika egin dute Petalumako azokagunean (Fairgrounds). Eguraldia ere lagun, eta hainbat jende partaide. Zorionak!
2014/06/03
"Sagarra jo" izena du proiektuak eta azken urratsak emateko behar duen finantziazio bila ari dira Iban Rusiñol eta Nicolas Novion zuzendariak. Iparraldeko bi zinemagile hauek Kalakanek Madonnarekin egin zuen biran astebeteko grabazioa egin zuten, musika ikuskizun erraldoi haren barneko egunerokotasuna jasoz. Alabaina, proiektuak aurrera egin ahala, dokumentala biraren istoriaz haratago hazi zen, euskal kultura eta globalizazioari buruzko hausnarketa bilakatuz. Abian da proiektua crowfunding bidez sustatzeko kanpaina, 25 egun baino ez dira gelditzen!
2014/06/03
Ehun bat lagun bildu ziren Buenos Aires probintzia argentinarreko Trenque Lauquengo Euskal Sustraiak euskal etxean, erakundearen 16. urtebetetzea ospatzeko. Afarian zehar, erreki ederraz ez ezik, dantza eta musika emanaldiez ere gozatu ahal izan zuten gonbidatuek. Berri honekin batera, datozen hilabetetan burutuko diren ekintzen egitaraua iragarri diote erakundetik EuskalKultura.com-i: ekainean, San Juan gaua; irailean, Magdalena Mignabururen bisita; eta urrian, aurten seigarren ediziora iritsiko den Urdaiazpiko Jaia, besteak beste.
2014/06/03
Kongresuaren hasiera ekainaren 6a bada ere, egun batzuk lehenago argentinaratu dira Maria Ubarretxena Euskadiko Gizarte Ekonomiaren zuzendaria eta Javier Goienetxea Konfekoop-Euskadiko Kooperatiben Konfederazioko presidentea, beste zenbait ekitalditan parte hartzeko. Izan ere, bisitari europarren zeregin publikoa gaur asteartea hasiko dira Buenos Airesen burutuko den mahai-inguru batekin eta bihar, asteazkena, jarraituko, La Platan, ‘Euskal kooperatibismoaren esperientzia’ jardunaldiekin. Ondoren, Santa Fe probintziara abiatuko dira Ubarretxena eta Goienetxea, bertako Kooperatiben I. Kongresuan hizlari izateko.
2014/06/02
Ekainak euskal kultura eramango du Madrilera, Etxepare Euskal Institutuak antolatu dituen ekitaldiei esker. Asteazken honetan, ekainaren 4an, euskal literatura eta itzulpengintzari buruzko mahaingurua egingo da Madrilgo Liburu Azokan, Josu Zabaleta, Karlos Cid, Karmele Jaio eta Rikardo Arregirekin. Ondoren, ekainaren 9an, ahozko literatura izango dute hizpide Xabi Payak eta Asier Altuna zuzendariak eta ekainaren 9 eta 10ean Asier Altunaren "Bertsolari" (2011) dokumentala eskainiko da Mataderoko Zinematecan, zuzendaria bertan partaide.
2014/06/02
Ezaguna den legez, joan den urteko apirilaren 2an bere historiako uholderik larriena pairatu zuen La Plata hiriak ekaitz gogor baten ondorioz. Emaitzak ere larriak izan ziren: hirurogeitik gora hildakoez gain kalte materialak zenbatezinak izan ziren. "Berria jaso bezain laster, Iñigo Urkullu Lehendakaria kontaktuan jarri zen Euzko Etxea euskal etxearekin Euskal Herriaren laguntza eskaintzeko", azaldu digute La Platako euskal etxetik. Dagozkien izapideak bete ondoren, erakundeko bost kidek diru laguntza jaso dute.
2014/06/02
Harrera-ekitaldia eskaini dio Urkullu lehendakariak Gasteizko Lehendakaritzan, Pariseko Euskal Etxearen baitan lan egiten duen Gernika abesbatzari. Gasteizko Gurasoak-San Viator koraleko euren anfitrionak lagun, kantari euskal-paristarrak pozik agurtu dute Urkullu eta honek ongi etorria eta eskerrak eman dizkie musika medio egiten duten ekarpen garrantzitsuagatik. Kanpoan den Euskal Komunitatearentzako zuzendari Asier Vallejok ere hartu du parte ekitaldian.
2014/05/30
Bilera antolatu du datorren iganderako Habanan bertako euskal etxeak, Asociacion Vasco Navarra de Beneficencia delakoak. Aukera baliatuko dute elkartearen 137. urteurrena ospatzeko. Munduko zaharrenetarik den euskal erakunde hau zaharberritze prozesu batean da eta proposamen berriak ari zaizkio eskaintzen bere bazkideei. Horietako bat, futbito taldea, arrakastatsu aritu da lehiaketetan eta ohorez sartua da Kubako bigarren dibisioan.
2014/05/30
Oraingoarekin laugarren ediziora iritsiko den 'tradizio' hau badirudi honezkero erabat finkatuta dagoela Buenos Aires probintziako Pehuajoko euskal gizataldearen egutegian. Beraz aurten ere ‘Bazkide Eguna’ antolatuko Etxe Alaikoek, instituzioko kideak omentzea helburu. Jaia ekainaren lehenengo hamabostaldian izango da eta bazkariarekin bat, Euskal Herrian zehar ‘bidaiatzeko’ bideoak proiektatuko dira. Bestalde, Zuzendaritza Batzorde hautatu berriko idazkari Maria Elida Oroz-ek iragarri du elkarteko euskara klaseak ekainean hasiko direla direla Pehuajoko Etxe Alai-n.
2014/05/30
Gogotsu dabiltza Mallorcako Euskal Etxeko kideak, eta lanpetuta ere, azken asteotan ekitaldi ugari ari baitira egiten eta prestatzen. Esaterako, iragan maiatzaren 24 eta 25ean Barnetegia egin zuten Palman eta uharteko euskaltzaleei hainbat jarduera euskal giroan egiteko eta bizitzeko aukera eman zieten. Orain, batetik atera eta hurrengoan sartzear dira: ekainaren 6tik 8ra Asteburu Kulturala egingo dute eta besteak beste honako taldeak ekarriko dituzte irlara: Dangiliske, Urko, Gorka eta Natxo Knorr, Monkey Doh eta Talamh. Kontzertuak doan izango dira.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
