euskal diaspora eta kultura
2014/06/16
Chema Salcedo euskal-peruarrak bere aitaren guda garaiko lorratzak jarraitu ditu "Aita" izeneko dokumentalean. Jose Salcedo Molinuevo gudaria izan zen 1936ko gerran, EAJren MAI Irrintzi batailoian. Santoñan errenditu eta Burgoseko kartzelan izan zen preso, eta 1951n Perura erbesteratu zen. Bost urte zituen orduan Chema semeak. Duela bi urte hil zen Jose eta, pelikula honen bitartez, Chemak aitari eta bera bezala gerran borrokan aritu ziren gudariei omenaldia egin die. Gaur Bilboko Euskal Museoan estreinatuko da.
2014/06/16
Ohiko Batzar Nagusia egin zuen joan den ostegunean Cordobako Rio Cuarton bertako Gure Ametza Euskal Etxeak, Zuzendaritza berritzeko bozkak barne eta, ondorioz, agintealdi berri honetan Sergio Ramon Eguiazu da lehendakari, besteak beste lagun dituela batzordean Edurne Bilbao, lehendakariorde; Manuel Ignacio Campoamor, idazkari; José Irazoqui, idazkariorde; Elba Regina Viano, duruzain; eta Eduardo David Aguirre, diruzainorde.
2014/06/16
Kooperatiben alorreko euskal ordezkaritza bat Argentinan bisitari. Santa Fe Probintziako Gobernuak gonbidaturik, euskal kooperatibismoaz hitz egin zuten Maria Ubarretxena Jaurlaritzako Gizarte Ekonomia zuzendariak eta Javier Goienetxea Konfekoop-Euskadiko Kooperatiben Konfederazioko presidenteak Santa Fe Probintziako Kooperatiben I Kongresuan. Argentinara egindako bisitaren baitan, Probintziaren eta Jaurlaritzaren arteko hitzarmena sinatu zuten, hitzaldi bana eman zuten La Platan eta Buenos Airesen, eta Argentinako euskal gizataldearen ordezkariekin ere bildu ziren bisitari europarrak.
2014/06/16
Ekainaren 30ean bukatuko da epea Eusko Jaurlaritzak Euskal Etxe eta Gizataldeen esparruan deitu dituen lau beketara aurkezteko. Bekak Asier Vallejo buru duen Kanpoan den Euskal Komunitatearentzako Zuzendaritzari dagozkio eta hamabi hilabetekoak dira. Egoitza Vitoria-Gasteiz (2), Argentina (1) eta Estatu Batuak (1) izango dituzte. Gasteizkoak 16.000 euroko saria izango du eta Argentina eta Estatu Batuetakoek 24.000.
2014/06/13
Gazteenek ez dute agian gogoan izango 70. eta 80. hamarkadetako telesail hura, San Frantziskoko kaleetan girotua, Michael Douglas oso gazte bat eta Karl Malden polizi bikotea protagonista. Kale horiexek eta uniforme bera lagun ibili da, baina, berrogei urtez, iaz erretiratu zen arte, gaurkoan solaskide dugun Leon Sorhondo kaliforniarra.
2014/06/13
Bihar ospatuko da Izaban 'Kanpoan diren Nafarren Eguna'. Urteroko hitzordu honen XXVI. edizioak gaur izango du aurrekaria, Larrako Erreserba Naturala bisitatuz eta biharko egitarauaren aurkezpena eginez. Bihar, beraz, goizeko 10:30etan abiatuko dira gauzak, harrera, kanpaiak, meza, kalejira, bazkaria, dantza eta zenbait erakustaldi tarteko; hori guztia, Nafar Etxeen Federazio Nazionalak 30 urte bete dituen honetan, kari horretara bere historia biltzen duen liburua atera duelarik.
2014/06/13
Andre Mari Zuriaren jaietako giro aparta bertakoek bezala bizi nahi baduzu, aurten Gasteizko Margolariak kultur elkarteak gonbite berezia luzatu die Diasporako lagunei: blusa kuadrila honekin batera euskal jaietan murgildu eta gozatzeko aukera. Koadrila hau 2013an sortu zen eta gaur egun 200 kide inguru ditu. Aurtengo festak abuztuaren 4tik (astelehena) 9ra (larunbata) izango dira. Animatzen direnek arropa eta koadrilaren bazkari eta afarien kostua baino ez dute ordaindu beharko, bertakoek egiten duten bezala.
2014/06/13
Euskal etxean edota euskal etxearen partaidetzarekin burutu diren hainbat ekintzen berri dakar Chascomuseko Zingirako Euskaldunak-ek kaleratutako azken berri buletinak. Eta gauzatutakoekin batera, hurrengoak ere iragartzen ditu buletin digitalak: bihar elkarte barruko Mus Txapelketaren hirugarren saioa burutuko da; ekainaren 23an, berriz, Sukaldaritza Tailerraren beste elkarretaratze bat. Data hauetaz gain, beste gonbite bat ere luzatzen dute chascomustarrek: uztailaren 6an Sanferminak ospatuko dituzte bazkari batekin Marcha elkartearen instalazioetan.
2014/06/13
Bardenay jatetxeak diruz lagunduko du datorren astelehenean Boiseko Ikastola (AEBetako Idahon) arratsaldeko 5etatik 9etara bitartean jatetxean egindako diruaren portzentaje bat emanaz. Patty Miller Boiseko Euskal Museoko arduradunak EuskalKultura.com-i azaldu dionez, “proiektu berezietarako” erabiliko du Ikastolak jasotako dirua. Miller-ek gonbitea luzatu nahi die astelehenean Boisen egongo diren euskaldun eta euskaltzaleei, ongi badatorkie, aipatu jatetxetik pasa daitezen, ekimena lagungarri baitzaio Ikastolari.
2014/06/12
Iñigo eta Koldo Eguren zinemagile euskaldunek 2.500 dolar inguru lortu dituzte dagoeneko lehendabiziko astean, Indiegogo webgunearen bitartez, ‘Versus’ laburmetraia grabatzeko. “Horrela jarraitzekotan 15.000 dolar lortzerik izango dugula uste dut”, adierazi dio Koldok, lanaren ekoizleak, Euskal Kultura.com-i.
Jon Kortajarena modelo bilbotarra izango da filmaren protagonista, 2009an ‘A single man’ pelikulan Jualianne Moore eta Colin Firth-ekin batera lan egin ostean. Iñigok zuzendutako lehenbiziko film honetako lantalde ia osoa euskal herritarra izango da. Grabazioa abuztuan egingo dute Los Angelesen.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
