euskal diaspora eta kultura
2014/10/07
Datorren larunbatean egingo du NABOk bilera, Rocklin-go (Kalifornia, AEB) Iparreko Ibarra Euskal Etxea anfitrioi. Egun berean ospatuko dute aurtengo NABO Kantari Eguna, bai eta klubaren hamargarren urtemugako piknika. Euskal Etxeko egoeraz egin du berba Noel Goyhenetche Iparreko Ibarrako lehendakariak Euskalkultura.com-ekin: “Klub txikia da geurea baina bazkide gazteak ditugularik, bai eta umeen dantza taldea, esango nuke hori dela etorkizuna”, adierazi du.
2014/10/07
Latviako hiriburuan, Rigan, bildu ziren irailaren 25 eta 26an Association of European Migration Instititutions (AEMI) erakundea, 2014ko topaketan parte hartzeko, tartean euskal ordezkaritza, Kanpoan den Euskal Komunitatearentzako zuzendari Asier Vallejo Itsaso buru. Taldeko partaide, Susana Sabin-Fernandez ikerlariak 1937an Euskal Herritik ebakuatu zituzten gerrako umeei buruzko txostena aurkeztu zuen. "Haven to Little Basque Refugees" izenburua du ikerketak eta elkarlanean burutu dute Sabín-Fernándezek eta Xabier Irujo historialariak (Nevadako Unibertsitateko irakasle).
2014/10/06
Datorren urteko uztailean AEBetako milaka euskaldun bilduko dira Boisen, Jaialdi 2015 festan parte hartzeko irrikaz. AEBetako euskal jairik handiena da Jaialdi eta bost urtero egiten da Idahoko hiriburuan. Euskal Herritik ere makina bat lagun eta bisitari joango dira eta hasi dira dagoeneko bidaiak prestatzen. Iruñeko Overtrails bidaia agentziak, esaterako, jakinarazi digu bertarako lau bidaia aukera hasi dela eskaintzen: Jaialdira bakarrik; New York eta Jaialdira; Jaialdi, Coloradoko Kainoia eta Las Vegasera; eta azkenik, Ameriketan artzain izan ziren euskaldunekin bidaia berezia, Julian Iantzi aurkezlea gidari (Iantzi Kalifornian jaioa da, Mendebaldean 23 urte artzain ibili zen euskaldun baten seme).
2014/10/06
Buenos Aireseko Laurak Bat-eko familia ezagun batean jaio arren, lotura propioa sortu du Ignacio Baña Barquin-ek erakundearekin: txikitan hasi zen dantzari eta gaur egun dantzatzeaz gain bertako musikari bihurtu da. Trikitilari eta biolinista, Ignacioren ametsa, etorkizun batean, bere erreferenteak diren Kepa Junkera, Joseba Tapia edota Iker Goenaga bezalako artistekin jotzea litzateke. Bitartean, eta 22 urterekin, Arkitektura ikasten du Buenos Airesko Unibertsitatean eta maketa eta entseguen artean banatzen du denbora.
2014/10/03
Juantxo Skalari musikari nafarrak eta bere talde berriak, La Rude Band-ek, Suitzako Lucerna hirian abiatuko dute #Rudestation Tour biraren nazioarteko tartea. Kontzertu hauetan bere azken lana aurkeztuko du kantariak. “Rude Station” izena du albumak eta zaleen babesarekin grabatutako lana izan da, crowfunding sistemaren bitartez.Taldea errepidean da dagoeneko eta gaur Luzernan egingo duten emanaldiaren ostean Italia aldera abiatuko dira, bihar Torinon jotzeko. Datorren astean Perun eta Txilen izango dira.
2014/10/03
Bernat Etxepareren Linguae Vasconum Primitiae-ren japoniar itzulpena argitaratuko du abenduan Tokioko Heibonsha argitaletxeak, argitaratu ere Euskal Herriko Etxepare Institutua laguntzaile. Itzulzaileak Sho Hagio eta Hiromi Yoshida dira eta jatorrizko euskal testutik zuzenean itzuli dute japonierara. Esan, bestalde, Sho Hagio irakasle japoniar euskaldunak bi hitzaldi emango dituela hilabete honetan "Euskal lurra, jendea eta hizkuntza" izenburupean. Lehena, bihar larunbata, Osakako Asahi Cultural Center-en, eta bestea urriaren 21ean, Tokion.
2014/10/03
La Pampa probintzia argentinarreko Santa Rosa hiriburuko euskal etxeak 22 urte bete ditu eta iragana eta etorkizuna batu zituen urteurren ospakizunean. Instituzioko berrogeita hamar lagun bildu zituen bazkarian, eskualdekoa bertakoa den Caldén izeneko arbola landatu eta Txikien Abesbatza, euskal etxeko kideen bilobek osatuta, aurkeztu zuen instituzioak.
2014/10/02
Pablo Alejandro Ubierna doktore da Historian. Buenos Airesen orain 48 urte jaioa, ikerlari dihardu Argentinako Ikerketa Zientifiko Kontseilu Nazionalean. Xareko hautatzaile nazionala ere bada, euskal pilota barnean baitarama, eta itzuli berria da Mexikoko Mundu Txapelketatik, podiuma lortu ostean. Urri honetan aurkeztuko du Buenos Airesen xarea eta raketa argentinarrari buruzko liburu bat, euskal pilotak Rio de la Platan izan duen historia aberatsa kontatuz.
2014/10/02
3 de Febrero Udal Antzokian egindako emanaldi arrakastatsuaren ostean beste betebehar polit bat dute Urrundik euskal elkarteko dantzariek asteburu honetan. Rio Grande do Sul-eko Euskal Etxeak antolatutako Mendebaldeko Mugako Lehendabiziko Euskal Topaketan aurkeztuko dira dantzari paranarrak, Uruguaiana hirian. Behin etxean, Euskal Astera joateko bidaia prestatzen jarraituko dute Urrundik-eko kideek. Berrogei bat lagunek osatutako ordezkaritza abiatuko da aurten La Platara.
2014/10/02
Festaz jantziko da datorren igandean Arrecifeseko Euskaldunak Denak Bat euskal etxea bertako Itxarkundia-ren sorreraren 70. urtemuga eta horren jarraitzailea izan den Ugarritzak taldearen 25. urtebetetzea ospatzeko. Jaian garai guztietako dantzariak bilduko dira, senidetasun bazkari handi batean. Gonbitea luzatzearekin batera, euskal etxeak Iruki Alaiak bere abesbatzaren azken aktibitateak jakinarazi ditu.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
