euskal diaspora eta kultura
2009/09/22
"Oinarririk ez duten" ahots alarmisten gainetik, Argentinako Euskadiren Ordezkari berriak segurtatu zuen atzo Donostian Buenos Airesera eramango duen hegazkina hartu baino 24 ordu lehenago, "erabateko lankidetza" izpirituz doala Argentinara, "Euskal Etxeek garatzen duten lanarekiko lankide izaten segitzeko asmotan, eurei laguntzen eta euren lana nabarmentzen". Euskal Etxeek egiten duten lana laudatu ostean, eta EuskalKultura.com-ek euskal-argentinar komunitatearen baitan egon litekeen nolabaiteko arrenguraz galdetuta, esan zuen "egon daitezkeen kezka guztiak lanean hasten naizenean uxatuko" direla. Kortajarenaren asmoa da "bizpahiru hilabetetan" Argentinan ofizialki onetsita dauden 76 euskal etxeak bisitatzea eta heiekin eta FEVArekin lankide izatea.
2009/09/22
Ama Birjinaren omenez hiriak antolatzen duen maratoi erdiaren babeslea izan da azken zazpi urte hauetan Lagun Onak Pergaminoko Euskal Etxea. Ahalmen berezidun pertsonek ere hartu dezakete parte maratoi erdiaren testuinguruan Euskal Etxeak antolatzen duen froga batean, Integrazio Proban. Proba ez da lehia orokorrean sartzen eta edonor aurkez daiteke, adin eta kategoria mugarik gabe. Lasterketarekin jasotzen den dirua ongintzarako da, Karitasentzat hain zuzen. Hitzordua irailaren 27an, igandean, izango da, Pergaminoko Gral. San Martin Udal Parkean, 9:00etatik aurrera.
2009/09/22
Euskal Etxea munduko gazteenetakoa da, gazteena ez bada, joan den abenduaren 3an sortu baitzen Argentina Ipar-Iparraldean. Saltako 'Gure Etxea' da, Bolivia eta Paraguaiko mugan, eta dituen helburuen artean, euskal nortasuna sendotu, landu eta bere inguruan horren lekukotasuna ematea, baina erroturik dagoen argentinar komunitatea eta bere ongitasuna ahaztu gabe. Azkeneko igande honetan bilera egin zuten eta, besteak beste, bertako jende gabetuentzako sostengu neurriak aztertzea erabaki zuten, laguntza medikoa emanez, eskolan lagunduz eta legearen aurreko aholkularitza eskainiz.
2009/09/21
Mar del Platako Denak Bat Euskal Etxeak abiarazi du dagoeneko aurtengo Aralarko San Migel jaiak eta elkartearen 66. urteurrena (1943-2009) ospatzeko ekitaldia egitaraua. Ekitaldiak joan den asteko asteazkenean hasi ziren 66. Urteurreneko Pilota Txapelketaren sari banaketarekin eta urriaren 17an amaituko dira, izan ere elkartearen egoitzan egingo den euskal erromeria batekin, gastronomiak eta familientzako ekimen batez eta gazteriarentzako dantzaldiaz.
2009/09/21
Gainerako herritarrak lagun ospatu zuten Jose C. Paz herri argentinarreko 'Toki Eder' Euskal Etxeko bazkideek euren elkartearen hamahirugarren urtemugaren jaia, irailaren 13an. Bertako Altube Klubean izan da aurten ere hitzordua. Areto erraldoi honetan, eta eguerdi aldera, EEko bazkide talde batek prestatutako paella prest zegoen gonbidatuek dasta zezaten. Bazkariaren ondoren, dantzen eta musikaren txanda heldu zen. Maria Angeles Oñederra Euskal Etxeko lehendakariak erakundearen historia kontatu zion bildutako jendeari eta albiste bat ere eman zuen: datorren urtean Oñati eta Jose C. Pazen arteko Senidetzearen Plaza inauguratuko dela.
2009/09/21
Aurrera segitzen du Cordoba hiri argentinarrean bertako Baietz euskal folk musika taldeak euskal musika eta instrumentuez antolatutako kontzertu zikloak. Joan den ostiralean, irailak 18, Bizkaiko musika nolde eta tresnei eskaini zioten Cordobako 'Gure Txokoa' Euskal Etxearen egoitzan emandakoa. Besteak beste, euren moldaketa berezi bat daraman Gernikako Arbola kantatu zuten, bertaratutakoak hunkituz.
2009/09/20
Laugarren urtez antolatzen den artzain amerikanoen bestak Auritz izango du gaur biltoki, bertako pilotalekura bostehundik gora jende bilduko dituelarik Udalbide, Artzain Mundua, Auritz-ko Udala eta Nafarroako Gobernuaren eskutik eratua den egun osoko ekitaldian. 'Ibañetako artzain irrintzia' lelopean, egunari goizeko hamarretan emango zaio hasiera, harrera eta mezarekin. Luzaideko Bolanteak eta bertsolariak izanen dira segidan, eta erakusketa bat zabalik goiz osoan. Seguruenik berritasunik aipagarriena, antzerki baten plazaratzea izanen da, 'Nevadara joan nintzen emakumeak bakarrik utzita' izenburuz artzain baten istorioa kontatuko baita, bertan gibelean etxearen eta familiaren ardurarekin utzitako emazte edo emakumeen lan gogorra aipatzen eta nabarmentzen delarik.
2009/09/18
Buenos Aires probintziako Necochea herriko 'Osasuna' otxotea bihar larunbata arituko da kantari Chivilcoy-ko 'Beti Aurrera' Euskal Etxeak antolatu duen afari-show-ean. Ekitaldia euskal etxe honen egoitzako areto nagusian gauzatuko da, urtean zehar daraman egitarau aberatseko parte, eta ehundaka pertsonen partaidetza espero da, afariaz gozatzearekin batera otxoteak eskaintzen duen errepertorioko kantuak entzun eta kantatzeko. Osasuna otxotea 1990eko hamarkada hasieran jaio zen Necocheako Euzko Etxea-ko Txoko Txikiren gerizpean, festa giroan sartu eta bazterrak gisa herrikoian alaitzeko.
2009/09/18
Aspaldian Kaliforniako San Diego inguruan bizi bazen ere, Idahoko euskaldunen artean Euskal Herritik euren bigarren apaiz euskalduna izateko propio heldu zen bigarren abadea bezala zen ezaguna. Aita Patxi Aldasoro Iparragirre joan den ostiralean hil zen El Centro, Kalifornian, 87 urte zituela. Azkeneko sei urteetan, tronbosiak jo ondoren, mugimendua murriztua zeukan, baina burua argi mantentzen zuen. Omenaldien lagun ez bazen ere, 1999an, AEBetan euskaldunen apaiz izandako gainerako abadeekin batera, plaka eta ohoratze berezia jaso zuen Renoko Aste Nagusi eta NABO Jaialdian, eta 2000eko Boiseko Jaialdin hartu zuen parte. Bere aldeko elizkizunak atzo egin ziren Kalifornian eta datorren 27an, igandea, egingo dira bere jaioterrian, Gipuzkoako Mutiloan.
2009/09/18
Paraná-ko Urrundik Euskal Elkarteko dantzari eta musikari entrerriostarrak partaide izan ziren joan den irailaren 6an, igandea, euskal gizataldeko ordezkari, euren probintzia bereko San Benito herrian, Immigrantearen Eguna dela-eta antolatutako ekitaldietan. Bosgarren edizioa bizi izan du aurten, Paraná hiriburu probintzialetik 12 bat kilometrotara kokatuta dagoen hiri honetako Gizataldeen festak. Euskal dantzariek kabalkadan parte hartu eta euskal dantzen emanaldi bat eskaini zuten. Elkarte bereko kide diren Juan Carlos Borras-ek eta Oscar Giles-ek, euren aldetik, gitarrak lagundurik folklore argentinarreko zenbait pieza jo zituzten.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
