euskal diaspora eta kultura
2010/07/12
Oñatiko Udalak harrera egin zien atzo Mondragon Unibertsitateko ikasle txiletarrei. Mondragon Unibertsitateak Txilen abian jarritako Ekintzailetza, Berrikuntza eta Elkartetza Ikastaro Aurreratuaren bukaera gisa, Txileko Salamanca herrian ikasten aritu diren ikasleak, proiektu nabarmenenetan aritutako 19ko taldea, Euskal Herrian bi astez egon dira eta Oñati bisitatu zuten joan den astean, bertako alkate Lourdes Idoiagak harrera egin zielarik.
2010/07/09
“Ibilbide aske eta hierarkiarik gabeko elkarte” gisa jaio zen San Miguelgo 'Askatasunaren Bidea'. Horrela aurkeztu zuten beren burua sortzaileek euskal komunitatearen baitan duela urtebete eta horren arabera aritu dira ekintzei eta proposamen berriei ekin dieten bakoitzean. Pixkanaka, elkarte berria Euskal Herria ari zaie hurbitzen San Miguelgo euskaldunei, batez ere hitzaldi eta ikuskizunen bidez. Urtebetetzearen inguruan, pasa den larunbatean, uztailaren 3an hain zuzen, Koldo Zabalondok "Euskal Herriko armagintzaren historia"ri buruzko hitzaldia eman zuen Askatasunaren Bideak gonbidaturik. FEVAko idazkari Marta Abarrateguik lagundu zuen elkarte berria hiriko Angel D´Elia Institutuko Areto Arrosan gauzatutako mintzaldian.
2010/07/09
Gipuzkoako 30 enpresa inguruk parte hartzen duten Brasilerako enpresa misioa ari dira gauzatzen aste honetan bertako Foru Aldundiak eta Gipuzkoako Bazkundeak lankidetzan. Brasilgo ekonomia handituz doan garrantzia ari da hartzen eta hori ezin dakieke oharkabean pasa Gipuzkoako enpresei. Karia horretara, Gipuzkoako Bazkundeak eta Foru Aldundiak errealitate horretara gerturatu ahal izatea ahalbidetu eta erraztu nahi diete lurraldeko enpresei.
2010/07/09
Arantzadi Zientzia Elkartea Arrasateko Lezetziki koban indusketa arkeologikoak egiten hasi da, Euskal Herri barne eta kanpoko hainbat gazteen lana baliatuz, elkarteko adituen gidaritzapean. Uztailaren 1eko astean ekin zitzaion lanari, duela 150.000 urteko giza arrastoak aurkitu dituzten koba honetan, eta oraingo aldian uztailaren 17ra arte jarraituko dute bederen.
2010/07/09
'Eusketxe', Buenos Airesko Eusko Kultur Etxeak, aurten ere 200 bonu salduko dituela adierazi du. Bildutako diruarekin programatutako ekitaldiei eta etxearen mantenimenduari eutsi ahal izango dio argentinar hiriburuko euskal erakunde honek. Bono hauetako bakoitzarekin, Euskal Herrira egingo diren bi bidaien zozketan parte hartzen da, edo nahi izanez gero saria dirutan ere eskura daiteke. Horretaz gain, abuztuaren 30erako bono osoa ordainduta duten lagunen artean, Coloniarako (Uruguai) bi txartel zozkatuko dira. Laguntzeko modu bikaina, bi sari bikain eskuratzeko aukerarekin, izan ere.
2010/07/08
Gutxiago falta da Patxi Lopez lehendakariak Estatu Batuetara, bertako Nevada, Kalifornia eta Idahora uztaileko azkeneko astean egin behar duen bidaiarako eta ostera horri begira, Jaurlaritzako Gobernu Kontseiluak erabakiak hartu zituen joan den astean eginiko bileran, besteak beste Estatu Batuetako Nevada Estatuari 'Lagun onari' saria ematea eta 'Lan Onari' errekonozimendua, berriz, Patty Miller, Boiseko Euskal Museo eta Kultura Etxeko zuzendariari. Bi sariok Patxi Lopezek berak eskuz-esku emango dizkie Nevadako gobernadore James Gibbons-i eta Patty Miller-i uztailaren 23an AEBetara Renon hasi eta Boisen bukatuko duen bidaiaren baitan, Idahoko hiriburuko Jaialdi 2010 euskal-amerikar elkarretaratze handiarekin bat eginez.
2010/07/08
Uda da Europan, eta uda sasoina izan ohi da, izan ere, mundu guztiko folklore taldeak euren lanaren emaitzak nazioarteko irteeretan, bateko eta besteko jaialdi eta elkarretaratzetan aurkezteko gehien baliatzen duten urtaroa. Gauza, norberarena erakutsiz, besteena ikusi eta ezagutzak aberastea da, lagun eta adiskide berriak eginez beste leku batzuetan ere bertako folklore eta moldeak lantzen dituzten lagunen artean. Adibide soil bat baino ez da, baina Donostian izan den Lauarin nazioarteko folklore jaialdian Irlanda eta Turkiako taldeak izan dira asteburu batez eurena eskaintzen; Antigua auzo donostiarrean zehar ibili ziren, frontoian, kaleetan barrena egindako desfiletan eta auzoko plazan egin zituzten erakustaldiak, bertako taldeak anfitrioi.
2010/07/07
Munduan zehar ezaguna da oso San Fermin Jaia. Euskal Herrian ospatzen diren festen artean ospe handiena lortu duena da hau. Agian Ernest Hemingway-ek idatzitako artikulu eta nobelagatik. Edo agian, hamar egun irauten duen jai honen alaitasunak mota askotako sentimenduak pizten dituelako urtero arima guztietan, euskaldunenean eta baita euskal jatorririk ez duten lagunen artean ere. Hori dela eta, Nafarroako bihotzetik 'Gora San Fermin!' oihu tradizionalaren oihartzuna entzungo da aste honetan herrialde askotan, asteburuan gehienbat. Ingalaterratik, Australia eta Argentinaraino, Diasporako herriak euren sanfermin ospakizunak joango dira gauzatzen: bazkari, dantzaldiak, topaketak eta kasu batzuetan 'entzierroak' gauzatuko dira gorriz eta zuriz jantziko diren nafar eta euskal etxeetan. Hona hemen festa batzuen programa.
2010/07/07
Sei urte pasa dira hasi zenetik, eta 2004an abian jarritako 'Hator Hona' programaren deialdiak ohiko arrakasta handia izan du aurten ere Euskal Herriko gazteen artean. Izan ere, Euskal Herriko zazpi gazte hautatu dira Necocheako Euzko Etxeak luzatutproposatutako ekimenean parte har dezaten. Gazteak uztailaren 18an helduko dira Argentinara eta neguko opor argentinarrak baliatuz (Europako udakoak), euskal kulturaren hainbat arlotako espresioak landuko dituzte Necocheako euskal etxeko kideekin, tartean, dantza, kirola, musika eta euskara.
2010/07/07
Joan den ekainaren 26an eginiko Urteko Biltzar Nagusian estatutuen araberako hauteskundea egiteari ekin zion Argentinako Buenos Aires probintziako Azul herriko Gure Txokoa Euskal Etxeak. Bertan erabakitakoari jarraiki, Zuzendaritza Batzorde berriak Silvia Iceta Echarri izango du berriz ere lehendakari eta harekin batera arituko dira, besteak beste, aipatu gobernu-batzorde horretan: Eduardo Recalde lehendakariorde; José María Iceta Daireaux, idazkari; Sonia Latasa, diruzain; eta Evelia Bianchi Etchegoyen, diruzainorde.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
