euskal diaspora eta kultura
2012/04/12
Hasi zaizkigu heltzen munduko hainbat leku eta herrialdetako euskal etxeek Aberri Eguna kari eginiko ospakizunen informazio eta irudiak. Jarraian iragan igandean Txilen eta Venezuelan egin ziren bi festaren berri ekarri dugu, hurrenez hurren. Txilekoa, Santiagoko Gure Etorkia euskal elkarteak antolatua, San Cristobal muinoan dagoen Gernikako Arbolaren kimurainoko ibilaldia izan zen, bertan ekitaldi bat eta erromeria egiteko; Venezuelako Valencia-Naguanagua-n, berriz, Caraboboko Eusko Etxeak bazkide eta lagun andana bildu zuen bere instalazioetara, eguna famili giroan bizitzeko.
2012/04/11
Parisen da atzo asteazkena eta gaur osteguna, apirilaren 11 eta 12an, Bernardo Atxaga idazlea, bere obras mintzatu eta zenbait mahai inguru eta ekitaldi literariotan parte hartzeko. Frantses hiriburuan Euskara eta Euskal Kultura irakurle den Argitxu Camus-Etchecopar xiberotarrak EuskalKultura.com-i zehaztu dionez, gaur ostegun iluntzean, 7etan, literatur ekitaldi batean arituko da Cervantes Institutuan eta bihar, berriz, egun odoan Sorbonne Nouvelle Unibertsitatean, Galizia eta Kataluniako beste literaturgile batzuekin batera.
2012/04/11
Varsovia, Poznan eta eta Gniezno hiri poloniarrak "euskal udaberri" baten gune izango dira, Etxepare Euskal Institutuak bertako unibertsitateetan dituen Euskara eta Euskal Kultura irakurlegoek antolatu dituzten ekitaldiei esker. Etxeparek jakinarazi duenez bihar bertan hasi eta datorren apirilaren 20a arte luzatuko dira jarduerak. Egitarauak bi arlo ditu: batetik, Kimuak laburmetraiak izango dira ikusgai hiru hirietan eta, bestetik, poesia eta musika ikuskizuna eskainiko dute Harkaitz Cano eta Rikardo Arregi idazleek, Jabier Muguruza eta Mikel Azpiroz musikariekin batera.
2012/04/11
Berlingo Euskal Etxea jarduera egitarau mardula burutzen ari da hilabete honetan, Gernikako bonbardaketaren 75. urteurrena kari. Urteurrena apirilaren 26an beteko da, eta egun horretarako bidea ekitaldi ugariz ari da berotzen berlindar elkartea. Iragan apirilaren 1ean hasi ziren jarduerak, bonbardaketari buruzko erakusketa baten inaugurazioarekin. Horrez gain, bi dokumental izan ziren ikusgai: Klaus Ihlau-ren 'Gernika' eta Pia Kuhlmann eta Pedro Deltell-en 'Die sichtbare Stimme'. Bihar Emilio Majuela historialariak hitzaldia eskainiko du eta igandean beste bi dokumental dira euskal etxearen proposamena.
2012/04/11
Apirilaren 14an goizeko 9:30etan eta Buenos Airesko Laurak Bat euskal etxearen egoitzan burutuko da Euzko Argentinar Bazkun Alkartasuna-ren (FEVA) Urteko Ohiko Biltzar Orokorra. Bilkuran hauteskundeak gauzatuko dira Federazioaren lehendakaria, idazkaria eta Zuzendaritza Batzordeko beste hainbat kargu berritzeko. Erakunde euskal argentinarretik jakinarazi digutenez, zerrenda ofiziala aurkeztu da bakarrik. Ustekabe handirik gabe, beraz, Ricardo Basterra lehendakariak, Marta Abarrategui idazkariak eta Hugo Andiazabal diruzainak berrautatuak izatea espero.
2012/04/10
Bartzelonako Euskal Etxeak bihar bertan jarriko du abian Literaldia 12 jaialdia eta maiatzak 12a bitartean literaturaren bitartez Euskal Herriaren gaur egungo ikuspegia emango dio kataluniar gizarteari. Aurtengo edizioan liburu aurkezpenak, hitzaldiak, irakurle kluba, bertsolariak, ipuin eta poema musikatuak eta Bartzelonako euskara ikasleen Mihiluze lehiaketa egongo dira, besteak beste. Berritasunen artean aipagarria da euskal etxeak Twitter bidez ipuinak osatzeko deia luzatu duela, bai euskaraz eta biata katalanez ere. Bartzelonatik pasako direnen artean Mariasun Landa, Miren Agur Meabe, Arantxa Urretabizkaia, Edorta Jimenez eta Hasier Etxeberria idazleak izango dira.
2012/04/10
Munduko euskal etxe askotan ospatzen den jaia da Aberri Eguna eta datozen egunotan horren isla izango dugu EuskalKultura.com-en, bateko eta besteko euskal etxe eta komunitateetatik iritsiko zaizkigun berriek adieraziko dutenez. Ospakizunaren kronikak New Yorken hasiko ditugu, datorren urtean 100 urte beteko dituen Eusko Etxea of New York-ek urteko hitzordu garrantzitsuena gisa bizi baitu Berpizkunde Igandeko hau, aurten gainera Mendeurreneko ekitaldi programa prestatzen ari direla. Datozen egunetan euskal etxe eta komunitate gehiago.
2012/04/10
Ekimen interesgarri bati ekiteko elkartu ziren duela bi urte Buenos Aires probintziako Tres Arroyoseko euskal jatorrizko lagunak. Argentina osokoak eta bisitari atzerritarrak erakartzeko asmoarekin, euskaldunen presentzia ugaria duen eskualde honetako historia, berezitasun eta baliabideak ezagutarazteko proiektu bat jarri zuten martxan tresarroyostarrek. ‘Euskal Pampa’ izeneko Landa Turismo proposamenak Buenos Aireseko kostaldeak eta lautada zabalak bisitatzeko birak antolatzen ditu, eskualdeko nekazaritza eta abeltzaintzako ekoizpena eta herriko sukaldaritza baztertu gabe. “Gure inguruan Euskal Herritik etorritako etorkinen arrastoak daude, edonon. Adibide bat jartzeagatik esango dut ardi azienda zuten dozena bat finka zeudela beste garai batean hemen. Guztiak familia euskaldunenak ziren. Orain bi bakarrik geratzen dira, baina bietako jabeak euskaldunen ondorengoak dira”, azaldu dio ‘Euskal Pampa’ arduradunetako bat den Natalia Cubiatebeherek EuskalKultura.com-i.
2012/04/09
Gaur Pazko Eguna da, jai eguna Euskal Herri osoan eta joan den astean adierazi genuen bezala EuskalKultura.com bihar asteartea itzuliko da bere irakurleekiko eguneroko hitzordura. Atzoko Aberri Eguneko ospakizunak munduan zeharreko euskal etxeetan, aste honetako euskal katedra zabaltzeak (Chicagon), FEVAko bilera eta hauteskundeak, eta Pampa Vasca bezalako ekimenak izango dira astean zehar hizpide hartuko ditugun gaiak. Bihar arte, irakurle.2012/04/08
Argentinan, 106 euskal etxeren federazioa den FEVA erakundeak agiri bat plazaratu du 2012ko Aberri Eguna dela-eta, aurten 80 urte betetzen ari den ospakizun honi gainbegirada historikoa emanez eta, besteak beste, euskaldunen "euskaldun izateko eskubidea, hain xinplea eta hain sakona den zerbait" aldarrikatuz. "Euskal Herri handi, independente eta batua"ren alde agertu ondoren, FEVAren oharrak "herri bat gara, nazio bat gara" adierazten du, "erabakitzeko eskubidea daukagu" baitetsiz.PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
