euskalkultura.eus

Viedma, Argentina. Joan den mendeko 40ko hamarkadan, Euskal Herritik milaka kilometrotara, euskaldun talde bat Euskal Herriko jaiak ospatzeko Patagonesen biltzen zen, gaur egun Buenos Aires probintziako hiririk australenean, Viedma hiriaren parean, Negro ibaiaren iparraldeko ertzean. “Lagun Onak” zuten izena. Haien omenez, Aberri Etxeko dantza taldeak izen hori bera hartu zuen 1997an, Bahia Blancako Beti Aurrera taldeko Marisa Chaparro eta Maricarmen Elzaurdia dantzari ohien eskutik ibilbideari ekin ziotenean. Larunbat honetan, irailaren 23an, 26 urte ospatuko dituzte, aurkezpen artistiko bat, klase irekia eta, jarraian, topaketa batekin Viedma-Patagoneseko Euskal Etxean.

Ospakizuna 17etan hasiko da, inauguratu berri den Guernica Muralean, "Gizateriaren eta Memoriaren Gunea" delakoan. Dantzari gazte, heldu eta txikiek osatutako Lagun Onak dantza taldeak hasiera emango dio festari. Erakustaldia eskainiko dute eta adin guztietako dantzariek dantzatuko duten Lantzeko Inauteriekin itxiko dute ikuskizuna.

Ospatzeko, euskal dantza partekatuko dute, baita beste komunitate batzuetako lagunekin ere, klase irekia eskainiz, partaidetza libre, ondoren pizza eta mate batzuk hartuz

Jarraian, Herri Dantzen Klase Irekia eskainiko dute, bertaratzen diren guztiei zuzendua. Kulturarteko gune gisa pentsatuta, jarduerak garatzen duen bitartean, dantzak partekatuko dira beste komunitate batzuekin eta Argentinako folklore-dantzariekin. Talde judu, alemaniar, boliviar eta El Escampe folklore taldeko kideek parte hartzea espero da, baita Bahia Blancako Unión Vascako eta Rio Coloradoko Ibaiko Euskaldunak elkartekoek ere.

“Ekitaldiaren ondoren, Aberri Etxean jaiarekin jarraituko dugu, pizza eta mateekin, egungo eta iraganeko dantzariekin eta garai guztietako zuzendariekin” diosku Josetxu Astolfik. Analia Zuntini eta Rocio Basterrarekin batera, taldearen zuzendaritza euren gain hartu zuen 2014an, bere behin betiko egoitzaren inaugurazioari esker, eta gorabeherak gaindituz, taldea indar handiagoz itzuli zenean. “Bahia Blancako Unión Vascaren eta Beti Aurrera taldearen laguntza eskertu nahi genuke, bai eta eskualdeko folklore argentinarraren ordezkariena ere, haiekin bat egiten baitugu aurkezten den aukera bakoitzean», adierazi dio EuskalKultura.eus-i Josetxuk, Argentinako euskal dantzaren erreferenteetako batek.

Zorionak Lagun Onak!