euskalkultura.eus

Mendoza, Argentina. Ehun bat lagun bildu ziren joan den abenduaren 15ean Denak Bat-eko egoitzan Olentzerori harrera egiteko. Hori baino lehen, ordea, beste opari batzuk zeuzkaten prestatuta euskal etxeko kideek euren gonbidatuentzat. Jaiaren egitarauari jarraituz, eta festari hasiera emateko, ‘Aurreskua’ dantzatu zen. Ondoren, kantuen txanda izan zen eta Mendozako Nafarrako Etxeko abesbatzak bere errepertorioko abesti batzuk eskaini zizkion bildutako jendeari.

[Ehun bat lagun elkartu ziren Denak Bat-eko egoitzan urte amaierako jaian parte hartzeko (argazkiaEE)]

Segidan, Denak Bat-eko euskara ikasleek urte amaierako lanak aurkeztu zituzten. Hasteko, Pello Mari Otañoren ‘Zazpiak Bat’ olerkiaren antzezpena egin zuten; gero, ‘Bagare’ abestiaren karaokearekin publiko osoa gonbidatu zuten abestera; eta horren ostean, ‘Aintza Zeruan’ Gabon-kanta egin zuten. Antzezpenekin jarraitzeko, amona batek Argentinako ilobei kontatu zien Olentzeroren elezaharra eta denen artean Olentzeroren abestia kantatu zuten. Eta abestiarekin batera, Olentzero bera agertu zen jaian.

[Urte osoan zehar ikasitakoa erakutsi ahal izan zuten Mendozako ikasleek (argazkiaEE)]

Bere zain bazeuden ere ustekabea ez zen txikia izan pertsonaia makila eskuan agertu zenean. “Mendozara etorri den lehenengo aldia izan da eta harrituta geratu ziren txikiak eta hain txikiak ez direnak”, adierazi dio euskal etxeko irakasle den Alicia Aguirrek EukalKultura.com-i. Mendozako Olentzero Jorge Aberastain euskara ikaslea izan zen, baina pipa, bizarra eta txapela jantzita zaila izan zen ezagutzea.

[Pello Mari Otañoren ‘Zazpiak Bat’ olerkiaren antzezpena egin zuten Mendozako Denak Bat-eko euskara ikasleek (argazkiaEE)]

Topaketa eta urtearen bukaera ospatzeko, pintxo eta edari batzuk partekatu zituzten Mendozako euskal etxeko kideek, lagunek eta nola ez, Olentzerok. Giro ederrean ordu txikiak arte luzatu zen erromeria.