euskalkultura.eus

La Plata, Argentina. La Platako Euzko Etxetik jaso dugun oharrak gogora ekarten digunez, europar euskaldunek harro mintzatzen dira euren gazta mota eta marka desberdinetaz, horien artean Idiazabal izanik seguruenik nazioartean izenik entzunena eta ospetsuena. Izan ere, 'Europar Gastronomi Ondare'tzat ere jo izan dute eta zalantza gutxi dago esateko Euskal Herriko elikadura arloko mozkinik edo emaitzarik aipatuena eta estimatuenetakoa dela esatean. Latxa edo Karrantzako arrazetakoa ardiek ekoitzitako behar du izan esneak, bertako arrazak biak eta oso aspaldidanik euskal artzaintzari lotuak. Gaztakiak kilo 1 eta 3 artekoak izaten dira eta keeztatuta ala keeztatu gabe aurkez daitezke, norberaren eremuko eta gustuko tradizioen arabera.

[Idiazabalgo gaztaren ezaugarriak azaltzen]

Mozkin hori gaur egun Idiazabal Jatorrizko Izendapen edo sor-markaren barnean ekoizten da, '1987an jaiotakoa ardi mota hauek lagundu eta egiazko Idiazabal esnegileak defenditu, eta erosleari kalitatea eta jatorria bermatzeko; gaur egun 500 azienda eta 100 bat gaztagile biltzen ditu'.

Joan den urriaren 2an Idiazabal Jatorri Izendapen Gazta Dastaketa bat egin zen La Platako Euzko Etxean, Victor Manuel Rodríguez Rivera Euskal Herriko Unibertsitateko (EHU-UPV) irakasle, eta Idiazabal Jatorri Izendapeneko Dastaketa Batzordeko kide denaren eskutik. Bildutakoei gazta honen historia, ekoizpen moduak, dastaketa teknika eta jateko moldeei buruzko jakingarriak azaldu zitzaizkien.

[Ganibetaz edo haiztoz mozterakoan gaztak erakusten duen itxura eta ezaugarriak ere kontutan hartzen dira gaztari buruzko iritzia ematerakoan]

[Jende anda polita bildu zen ekitaldira. Interes handiz segitu zituzten azalpenak eta izan ziren aounteak hartu, guztia grabatu zutenak... gaztak dastatu eta zaporea harrapatzearekin batera]

Bertaratutakoen artean, Laborantza Gaietarako Ministerioko kideak ikus zitezkeen; Nekazaritza Fakultateko eta Esne Katedrako partaideak; INTAko profesionalak, Berissoko ardoen ordezkariak, enpresetakoak eta Eusko Etxeko bazkideak.

Rodriguez Rivera doktorearen aurkezpenaren dinamismoak eta maila altuak ongi bete zuten bertaratutako profesionalek zein zaletu soilek dastaketaren artera hurbilarazteko helburua, eta euskal kulturarekin hain lotura estua duen gazta honen zaporea, testura, tankera, usaina... hurren sentitzea.