euskalkultura.eus

Tandil, Argentina. Immigrantearen Eguna ospatu zen Argentinan irailaren 4an eta herrialde osoan burututako ospakizunekin bat eginez, Tandil hiriak ere izan zuen bere Gizataldeen Festa. Jaialdiak musika eta dantza ikuskizunak eta kultur standak batu zituen eta Unibertsitateko Kultur Gunean burutu zen Miguel Lunghi Alkatea eta Ernesto Palacios Turismo Zuzendaria lagun.

El Eco egunkariak jakinarazten duenez, festari hasiera emateko herri partaideen bandera guztiak igo ziren tauletara. Hamabost bat kolektibitate elkartu ziren agertokira, tartean kolektibitate alemaniarra, espainiarra, boliviarra, italiarra, thailandiarra, haitiarra, arabiarra, israeldarra,  daniarra, perutarra, venezuelarra, lituaniarra, peru-uruguaitarra, txiletarra eta euskalduna. “Bizitza hobe baten bila lur hauetara iritsi ziren herri askotako etorkinak batu egin ziren hiri kementsu hau eraikitzeko; eta gaur egun, garapen-eredu bat bihurtu da. Tandilgo Gizataldeen Elkartean bilduta, gure tradizio eta ohiturak mantentzen saiatzen gara; eta festaren 23. edizioan argi geratzen da gure arbasoen ondarea ez dela galduko”, adierazi zuten elkarteko nagusiek ongi etorria ematean.

[Gure Etxea Euskal Etxeko partaideak standaren arduradun (argazkiaEE)]

Bi egunetan zehar, musika eta dantzak eta sukaldeko ekintzak izan ziren aktibitate erakargarrienak. Euskaldunen kasuan bai tauletan bai sukaldaritza patioan luzitu ziren. Jaia Udal eta Kultur Interesekoa izan zen izendatua eta Udala, Unicen eta Buenos Aires probintziako Gizataldeen Elkartea izan zituen babesle.

[Tandilgo euskal etxeko dantzariak –gazteak eta txikiak – publikoa agurtzen (argazkiaEE)]

Behin kolektibitateen ekitaldia bukatuta, 2013ko ‘Antzinako erromeria’ren berri eman du Tandilgo Gure Etxeak. Gogora dezagun ‘Antzinako erromeria’ ospatzearen ideia iaz sortu zela “duela berrogei urte, kalean eta plazan, egiten ziren euskal jai horien giroa berreskuratzeko helburuarekin”. Iazko deialdiak oso erantzun ona izan zuen, hirian eta baita eskualdeko herrietan ere, eta hori dela eta aurten ere gauzatuko da.

Esteban Cain euskal etxeko lehendakariak ezagutarazi duen egitarauaren arabera, erromeria arratsaldeko 19:30etan hasiko da danborradarekin. Kabalkadan eta danborren erritmora partaideak euskal etxetik Independenzia Plazara abiatuko dira eta bertan dantzarien eta abesbatzaren ikuskizunak burutuko dira. Festaren baitan, euskal etxeko alkate berria hautatuko da. Gonbitea euskal komunitateko eta Tandil hiriko agintari askori luzatu zaio, tartean, Sara Pagola Argentina-Mercosur-erako Euskadiren Ordezkariari, Miguel Lunghi hiriko alkateari, Ricardo Basterra FEVAko lehendakariari eta Echeverry apezpikuari. Iaz bezala, eskualdeko euskal etxeek ere hartuko dute parte. Ikuskizunak doakoak izango dira.