euskalkultura.eus

Rotterdam hirian da egunotan Harkaitz Cano idazlea, bertako Nazioarteko Poesia Jaialdiak gonbidatuta. Topaketa iragan ekainaren 9an hasi zen eta larunbata bitartean munduko hainbat herrialdetako olerkariek euren lana erakutsiko dute bertan. Larunbatean, esaterako, Canok hamar lagunentzako saio berezia egingo du Rotterdameko Antzokiko teilatuan, "Rooftop Poetry" ekimenaren barruan.

Rotterdam, Herbehereak. Rotterdam hiria nazioarteko poesiaz blai da egunotan, eta bertara bildu diren sortzaileen artean dago Harkaitz Cano euskalduna. Zirimiri Press argitaletxeak Canoren "Norbait dabil sute-eskaileran" poesia liburua neerlanderaz plazaratu zuen 2013an, eta horri esker idazle lasartearraren lana ezagutu ahal izan dute Herbeheretan. Orduan Amsterdamen izan zen Cano liburua aurkezten, eta aurten, Rotterdam hiriko Nazioarteko Poesia jaialdiak gonbidatu du. 

Jaialdia asteartean hasi zen eta Canok inaugurazio ekitaldian parte hartu zuen, hainbat herrialdetako olerkariekin batera. Atzo, aldiz, Lionel Foggarty poeta australiarrarekin batera egin zuen irakurraldia. Ekitaldi hau eta egunotan izan diren beste zenbait zuzenean streaming bidez ikusi ahal izan ziren interneten, eta eskuragarri daude oraindik ere hemen.

Gaur poesia irakurraldi batean parte hartuko du euskal idazleak. Larunbatean, jaialdiaren azken egunean, poesiari buruzko hitzaldi bat emateaz gain, Rotterdameko Antzokiko teilatuan saio berezia egingo du eta itxiera ekitaldian ere parte hartuko du.

Datozen egunetako egitaraua (ingelesez):

full programme ►

Harkaitz Canorekin elkarrizketa Rotterdameko Jaialdiaren webgunean (ingelesez), hemen.