euskalkultura.eus

Bilbo, Bizkaia. Aste honetan sinatu da Euskaltzaindiaren eta EHUren arteko lankidetza indartzeko itun berria, Euskaltzaindiaren egoitzan. Iñaki Goirizelaiak eta Andres Urrutiak sinatu duten hitzarmenak bi erakundeen arteko elkarlanaren bidez ikerketa arloa indartzeko helburua du eta bost urtetik bost urtera luzatu ahal izango da. Iñaki Goirizelaiaren esanetan "hitzarmenak dioen bezala, gure erakundeen helburuetako batzuk berberak dira, batez ere euskarari dagozkionak eta hori oso inportantea da, EHUk euskararen aldeko jarrera garbi eta sendoa erakutsi baitu hasiera-hasieratik". Urrutiak, bestalde, Euskarazko Tesien Koldo Mitxelena sarien garrantzia nabarmendu du "Guretzat berebiziko garrantzia dauka, uste baitugu hor ikusten dela Euskaltzaindiak egiten duen lana nola mamitzen den Unibertsitateko ikerkuntza proiektuetan". Erakunde bakoitzeko 3 kide izango dituen Jarraipen Batzorde bat ere sortuko dute hitzarmenean adostua izan dena bete dadin.

Hauek dira lankidetza-hitzarmenak biltzen dituen helburu nagusiak:

Erakunde biek erraztasunak emango dizkiote elkarri beren ikerketa-ondareak erabiltzeko.

Euskal Herriko Unibertsitatearentzat, Euskaltzaindia aholkulari ofiziala izango da euskara gaietan.