euskalkultura.eus

Villa Elisa, Argentina. “Aurtengo topaketara etorriko ziren guztiak euskal kulturan murgiltzea nahi genuen”, adierazi zuen bileraren antolatzaileetako bat den Fernanda Goizuetak. “Kari horretara, oroigarriak, apainketa bereziak eta euskal dantzak eskaini genizkien parte hartu zutenei”.

Eta hori izan zen azaroko azken larunbatean gauzatu zen Goizueta familiaren 4. topaketaren ezaugarri nagusia. Izan ere, Argentinako banderez gain, ikurriñak ere ikusi ahal izan ziren elkargunean eta, hormetan zintzilik, familiaren zuhaitz genealogikoa eta armarriak. Euskarak ere izan zuen bere lekua. “Ongi Etorri” hitzak euskaldunen hizkuntzaz eta euskal grafiaz idatzia oso deigarriak suertatu zitzaizkien bildutako lagunetako askori.

Horretaz gain, ahaide bakoitzari opari batzuk eman zitzaizkien festa bukatzean, tartean, 2007ko III. Topaketaren argazkiak eta arbasoen jaioterrien bideo batzuk biltzen dituen CD bat, Euskal Herriko kulturari buruzko bi liburuxka, eta zapi gorriak. Arratsaldea alaitzeko eta gonbidatuak dantzarazteko, Aitor Alavak zuzentzen duen Ekin Dantzari Taldeak euskal koreografia batzuk egin zituen eta dantzariek publikoa animatu zuten haiekin dantzatzera.

“Ehun baino gutxiago izan baginen ere, Felipe Rosales Goizuetak, Sebastián Glessner Goizuetak eta hirurok jarraituko dugu topaketa hauek bultzatzen, uste dugulako senideen arteko harremanak sendotu behar ditugula”, azaldu zuen Fernanda Goizuetak.

“Beste alde batetik, aipatu behar ditugu Euskal Herritik jasotako agurrak. Goizueta herritik Carlina Lujambio Goizuetak agindu zigun familiaren informazio gehiago bilatuko zuela eta Juan Antonio Lekouna Salaberriak ohartarazi zigun azaroko azken larunbatean – topaketa egiteko guk aukeratutako data, alegia – Goizueta herrian abeltzaintza eta nekazaritza arloetako produktuen erakusketa gauzatzen dela, Nafarroako Erregek herriari emaniko probilegio baten arabera. Eta agian ez da kasualitate hutsa…!”, iradoki du Goizuetak.