euskalkultura.eus

San Pedro, Argentina. Euria ez zen oztopo izan urriaren 8an, San Pedroko XIX. Gizataldeen Jaia eta Herriko Eskulan, Merkataritza eta Industriaren III. Erakustaldiaren antolatzaile eta publikoarentzat. Egitaraua birmoldatu ondoren, prestatuta zeuden ikuskizun eta kultur ekimen gehienak arazorik gabe gauzatuko ziren festako agertokian eta baita ekintza kulturalen karpan ere.

San Pedroko euskaldunek urtero hartzen dute parte festa honetan eta urtero ere publikoari begirako proposamen berriak eskaintzen saiatzen dira. Izpiritu honekin, 2011ko edizio honetan Buenos Airesko Ekin Dantzari taldea gonbidatu zuten Ongi Etorri-ko arduradunek, gainerako kolektibitateen balletekin batera dantza zezaten. Aitor Alavak zuzentzen duen taldea bitan aurkeztu zen publikoaren aurrean: arratsaldean, euskaldunen standaren aurrean eta ondoren, ilunpean, agertoki nagusian.

[Ongi Etorri euskal etxearen standean, Euskal Herriko plater tipikoak eskaini ziren]

Euskal standean, kultura eta ohiturei buruzko informazioarekin batera, etxeko kideek prestatutako plater tipikoak jendearen erakargarri ziren. Euskal etxearen ohial-etxola azpi eta inguruetan herritarrek zein turistek mokadu gozoak dastatu ahal izan zituzten giro ederrean eta kolore zuri-gorri berdeak lagun.