euskalkultura.eus

Bilbao, Bizkaia. Hamar urtetan hainbatetan amestutako bidaia egingo du hil honetan Doctor Deseo talde bilbotarrak, David Fernandez managerrak EuskalKultura.com-i azaldu dionez. Taldea duela hamar urte izan zen bertan jotzen eta harrez gero zale mexikar sutsuenek sarri eskatu omen diete bueltatzeko. "Duela hiru urte hortxe-hortxe izan ginen, baina azkenean ez zen bidaia atera", dio Davidek. Orain, azkenik, "Deseo: Cartografía imposible" lan berria aurkeztuko dute bertan, ekainaren 17tik 24ra. Etxepare Institutuaren laguntza izan du taldeak hainbat kontaktu egin eta bira antolatzeko.

Taldeak Mexikon izango duen lehen hitzordua euskal komunitatearekin izango da, eta ekainaren 17an bertan Euskal Etxean izango dira musikariak, bazkideekin afaltzen. Parada ezinhobea izango da talde beterano eta ia mitiko hau ezagutzeko. Lagunarteko topaketa honetan, taldeak Lunarioko kontzerturako sarrerak, CDak eta kamisetak zozketatuko ditu bazkideen artean.

Ekainaren 18an taldeari elkarrizketa egingo diote Grupo Imagen irratiko Radio RMX saioan. Ondoren kontzertu akustikoa eskainiko du taldeak zuzenean. Irratsaiotik irten eta beste emanaldi akustiko bat egingo dute bilbotarrek, Bizarro aretoan. Emanaldi nagusia, baina, ekainaren 21ean izango da, Lunario antzokian (21:00tan).

Zuzeneko indartsua

Kontzertuotan Doctor Deseok betiko kantuak eta azken laneko abesti berriak aurkeztuko ditu, gehienak gaztelaniaz, zenbait euskaraz. "Deseo: Cartografía imposible" da taldearen azken lana, hamabigarrena, eta iaz argitaratu zuen Baga Biga diskoetxeak. Euskal musika munduan proposamen berezienetakoa da Doctor Deseo eta sexua, desioa, gaua eta inkomunikazioa bezalako gaiak jorratzen ditu kantu gazi-gozoetan. Taldearen jendaurrekoa indartsua eta probokatzailea da, Francis kantariaren taulagaineko jarrera kartsua dela medio, eta zale talde fidela bildu du hainbeste urteko ibilbidean.

-Informazio gehiago, Doctor Deseoren webgunean, hemen

"Que amanece de nuevo" abestiaren bideoa: