euskalkultura.eus

Jordan Valley, Oregon. Joan den ekainaren 21ean Jordan Valley herriak berebiziko jaia bizi izan zuen Elorriaga Museoaren inaugurazioa dela eta. Herriko lagunak eta kanpotik etorritako jende andana bildu zen bertan, John Elorriagaren dohaintzari esker sorturiko museoaren ateen irekitzearen lekuko izateko. Elorriagak bere familiaren etxea, euskal ostatua izandakoa, oparitu du, bertan euskal emigranteen bizimodua eta historia jasotzen dituen museoa sortzeko. Ekimena aurrera ateratzeak bost urteko lana hartu du eta inaugurazio ekitaldira proiektuan bildutako lagunak, dantzariak, gaiteroak, musikariak eta pilotariak etorri ziren, egun alai eta koloretsuan.

[Elorriaga House museoaren kartela, inauguraziorako atondua]

Inaugurazioa herriko kaleetan zehar egin zen desfilearekin hasi zen. Boiseko Oinkari dantzariak eta Highland Bagpipers taldeko gaiteroak ziren buru, Homedaleko Euskal Etxeko Herribatza dantza taldearekin batera. Idaho Civil War Volunteers taldeak ere jaiarekin bat egin zuen, XIX. mendeko kanpamendu bat antolatuz. Artisauek euren produktuak erakutsi zituzten eta pilotariek partidak jokatu zituzten frontoian.

[Boiskeo Oinkariak taldeko dantzariak Jordan Valleyko kaleetan zehar desfilatzen]

[Highlanders Bagpipers taldeko gaiteroek inguruotako eskoziar eta irlandar komunitatearen ordezkaritza izan ziren]

[Oinkariak eta Herribatza dantza taldeak inaugurazio ekitaldian eskaini zuten erakustaldiaren une bat]

[Desfileak irudi bitxiak utzi zituen, 'rodea' gogora ekartzen zuen argazki hau bezala]

Inaugurazio ekitaldiaren aurkezlea Roy Eiguren izan zen, John Elorriagaren aspaldiko laguna. Eigurenek bertara bildu zirenei ongi etorria egin ondoren Elorriaga familiaren istoria ekarri zuen gogora, Ambrose aitak museo bihurtu den etxea Boisetik ekarritako harriekin egin zuela azalduz, Maria emaztearen Sondika (Bizkaia) jaioterriko etxeen antzekoa izan zedin. Eigurenen John Elorriagak Jordan Valleyko euskal komunitateari eta herri osoari eginiko ekarpena azpimarratu zuen, urte askotan proiektu desberdinak sustatu dituelako, beti gogotsu eta umore onez. Ondoren, Liz Eiguren Bilbaok estatubatuar ereserkia kantatu zuen.

Museoko zuzendari Joanne Cunningham-ek, bestalde, eraikin berriak eskaintzen dituen erakusketa desberdinak aurkeztu zituen. Museo berriak Elorriaga familiak eta inguruetako beste sendiek aspaldi erabiltzen zituzten tresna, altzari eta oroigarriak biltzen ditu, besteak beste. Erakusketa berezienetako bat Pilar’s Beauty Salon deritzona da. Bertan John Elorriagaren arreba Pilarrek urtetan bildutako antzinako ileapaindegi produktu eta kosmetikoak daude ikusgai.

Ekitaldiari bukaera emanez John Elorriagak bere dohaintza eta lanarengatik esker oneko plaka bat jaso zuen eta apaltasunez proiektua egi bihurtu arte urtetan lanean lagun izan dituen familiako kide eta herritarrak izan zituen gogoan.