euskalkultura.eus

New York, Estatu Batuak. Euskaldunak New Yorken oihartzun handikoa den Columbus Day-ko kabalkadan parte izatera itzuliko dira gaur goizean, hiriko Eusko Etxearen Mendeurrena ospatzeko deitutako ekitaldi programak biltzen duenez. 

Joan den astean zehar Manhattan eta Brooklyngo agertokietan garatutako programari amaiera emanez, festa giroko partaidetza alai honek ehun-berrehun bat partaide batuko ditu, musikak lagundurik, euskal jantziak soinean eta ikurriñak eskuetan, euskaldunen eta hiri honen artean dagoeneko 100 urte dituen harreman eta uztartze honen adierazgarri.

[New Yorkeko Eusko Etxeko lehendakari Aitzol Azurtza ongietorria ematen joan den astean, Eusko Etxearen egoitzan, EENYren mendeurrena dela eta bertara hurbildutako jendeei (argazkia EuskalKultura.com)]

[Urkullu lehendakaria ostiralean iritsi zen New Yorkera Milwaukeetik, Estatu Batuetara egiten ari den bidaiaren hirugarren geldialdian, Washington DC ere bisitatu ondoren. Ostiralean hirian zenbait erakunde eta eragilerekin bildu ostean, larunbatean NABOren Neguko bilkura itxi zuen. Irudian, itxiera ekitaldia, ezkerretik eskuinera, Kate Camino, NABOko sustatzailea, Marisa Espinal, elkateko idazkaria, Urkullu lehendakaria, Valerie Arrechea Etcharren NABOko lehendakaria eta Mary Gaztambide, lehendakariordea (argazkia EuskalKultura.com)]

[Iragan astean astelehenetik ostirala bitartean egindako jardunaldi akademiko eta dibulgatzaileekin batera (EuskalKultura.com-ek aurreko artikuluetan eman du euren berri), ostiraletik igandea bitartean beste zenbait emanaldi artistiko ere gertatu ziren New Yorken euskal testuinguruan, tartean irudiak islatzen duena: Kalakan hirukotearen kontzertua, kasu honetan EENYen egoitzan. Lehenengo lerroan, hip-hop dantzari bat ikus daiteke, hirukotearen laguna eta haiekin ibilia, Maddonak bere azken mundu-biran famatua egin duen 'Aldapeko' euskal kantu tradizionalaren Kalakanen bertsioa, zeharo erritmo biziduna, dantzatzen (argazkia EuskalKultura.com)]

[Larunbatean ere musika eta dantza arloko emanaldiak izan ziren, kasu honetan Salt Lake City-ko (Utah) Triskalariak taldearen eskutik eta Andoaingo Urki taldearenetik; baita ere Bilboko San Antonio Iralabarriko abesbatza medio. Hona irudia, adierazgarria oso, Iralabarriko taldea kantuz New Yorkeko etxeorratzen soslaia atzealdean (argazkia EuskalKultura.com)]

[Ohorezko aurreskua New Yorkeko Eusko Etxeko egungo eta aurreko bazkideen omenez dantzari andoaindar bik dantzatua, Eusko Jaurlaritzako ordezkaritzako kideen begiradapean, tartean Urkullu lehendakaria eta bere emazte Lucia Arieta-Araunabeña daudela (argazkia EuskalKultura.com)]

Gaurtik aurrera eta asteazkenean segituz, aste honetan zehar EuskalKultura.com-ek artikulu sorta berri bat eskainiko du Mendeurrena kari askok munduaren hiriburua kontsideratzen duten honetan antolatutako ekitaldien errepasoa eginez eta, aurreko egunetan bezala, partaide lekuko eta zabaltzaile izango da euskal-amerikar presentzia eta errotzearen errealitatearen erakusgarri diren momentu berezi hauetan.