euskalkultura.eus

Townsville, Australia. Iritsi da aukera, Euskal Herriko Euskal Australiar Alkarteak eta Esther Korta bazkide eta komisarioarentzat, munduaren bestaldera, antipodetara emigratu zuten euskaldunez prestatutako euren erakusketa, Europatik jauzia eman eta Australiaraino iritsi dadin, eta horren lehenengo pausoa datorren igandean gauzatuko da Townsvillen, Erakusketa, eta berau osatzen duten hamar panelak Townsvillera heldu eta bertako herritarren ikusgai ipiniko baitira, ohi bezala eta orain arte proiektu osoan legez, Euskal Australiar Alkartea bera eta Eusko Jaurlaritzako Kanpo Harremanetarako eta Euskadi Globalaren Idazkaritza Nagusia, eta Kanpoan den Euskal Komunitatearentzako Zuzendaritza lankide. Australian bertan, North Queensland Basque Club euskal elkartearen lankidetza baliotsua izan dute orain, eta Townsvillen, erakusketa, abuztuaren 17tik 23ra zabalik egon ondoren (Corner of Sabadine and Petunia Street, Aitkenvale), Inghamera pasatuko da (abuztuaren 30etik irailaren 6ra) eta gero Ayr-era, bertako Masonic Club eta Burdekin Theatre-n irailaren 28tik urriaren 10era egoteko.

Erakusketak, 2023ko irailean hasi zuen Euskal Herrian ibilbide ofiziala, Diasporaren Eguna zela eta Gernikan egindako elkarretaratzean, eta bide trinko eta luzea izan du geroztik, beti ere Euskal Herriko jende askorentzat hain ezaguna ez den euskal australiar emigrazioaren eta komunitate honen historia eta errealitatea ezagutarazi eta hedatzea helburu. Azkeneko ia bi urte hauetan Euskal Herri osoa ibili du eta, besteak beste iritsi da Gernika, Lekeitio, Ondarroa, Markina, Aulesti, Ea, Ispaster, Arteaga, Kortezubi, Nabarniz, Ereño, Muxika, Busturia, Bakio, Zornotza, Derio, Arrigorriaga, Urduliz, Bakio, Durango (Azokako programapean), Gasteiz (Antso Jakituna Fundazioa), Zarautz, Donostia (Kursaala) eta Donapaleura, eta baita Diasporara ere, hilabete bat egon baitzen Pariseko Euskal Etxean, eta beste hainbeste Madrilen, azken honetan australiar enbaxadore Rosemary Morris-Castico eta goi mailako hainbat instituzio ordezkaritza partaide.

Zure euskal etxe edo elkartera ekarri nahi?

Egokiera izan duenean, bestelako ekitaldi osagarriak antolatu ditu Erakusketak egon den lekuetan, hitzaldiak, kantaldiak, zinema emanaldiak, batzuetan Australiara emigratu zutenak propio gonbidatuz eta euren lekukotasunak, edo Australian jaiotako euskaldunenak, jendaurretuz. Hitzaldi interesgarrienetakoa, Esther Korta komisarioak berak emandakoa izan da, arlo honetan aditu liburugilea baita. Interesa agerian dela, esaten digute. Eta segitzen dute antolatzaileek Erakusketa leku gehiagotara helarazteko lanean. Oraintxe finkatzen dabiltza, esaterako, kokatzea Bartzelonako Euskal Etxean, Mallorcakoan eta Bruselakoan, eta tratuan dira Genovako elkarte batzuekin ere, eta segurtatuta dago datozen asteetan Bilbon, lau hilabetez, Expodistrito-n, eta Gabonak aurretik Amoroton. Australian bertan ere, Sydneyko Gure Txoko Euskal Etxeak lekukoa hartuko dio Townsvillekoari eta oraindik adierazi ez duten data batean zabalduko dute, diosku Esther-ek hala galdetuta.

Norbaitek interesa balu erakusketa bere euskal etxe edo elkartera eramateko, aski du kontsulta egitea eta idaztea euskalaustraliaralkartea@gmail.com helbidera edo Esther Kortari, (+34) 636 132 739. Erraztasun guztiak ematen dituzte. Animatzen galdetzera?