Neuquen, Argentina. Neuquen probintziako ‘Baskos de la Confluencia’ Euskal Etxeak ezohiko ekintza bat jarri zuen martxan urte hasieran, gastronomiaz eta haurrentzat. ‘Taller de Cocineritos’ izeneko Tailerra martxoan abiatu eta abendura arte garatu da, 7 eta 12 urte arteko neska-mutilak partaide. Ikastaroa doakoa izan da eta, Euskal Herriko sukaldaritza abiapuntu, euskal kulturari lotutako hainbat gai irakatsi dizkiete txikiei, tartean Euskal Herriari buruzko hasimasiak eta oinarrizko kontzeptuak, hizkuntzaren berri, kantak eta musika, ohiturak, besteak beste.
Proiektua, gastronomian ibilbide luzea duen eta Euskal Etxeko kide den Bianca Arndt de Mendiberriren esku egon zen. Txikiek lehengaiak eramaten zituzten klasera eta, saioa bukatuta, beraiek egindako plater goxo batekin etxeratzen ziren.
2019ko zikloa ixteko, gaztetxoek urtean zehar bizi izandako une ederrak gogoratu zituzten eta sukaldean aritu eta emaitzak lortzeko esperientzia konpartitu zuten euren familiekin. Proposamena erabat arrakastatsua suertatu da eta Euskal Etxeak jakinarazi du laster plazaratuko duela 2020ko Tailerreko informazioa.
Lagun bati bidali
Komentarioa gehitu
