euskalkultura.eus

euskal diaspora eta kultura

Albisteak rss

Argentinan zehar landatuta dauden Gernikako Haritzaren Kimuak 73. Bonbardaketaren oroipenaren lekuko

2010/05/06

Chascomusko 'Zingirako Euskaldunak' Euskal Etxeko kide eta lagunak Gernikako Bonbardaketaren 73. urteurreneko omenaldian (argazkia EE)
Chascomusko 'Zingirako Euskaldunak' Euskal Etxeko kide eta lagunak Gernikako Bonbardaketaren 73. urteurreneko omenaldian (argazkia EE)

PUBLIZITATEA

Hegoamerikako euskal Diaspora ez da ahazten. Ez da ahazten eta euren komunitateetan duten eragina baliatuz, gizarte osoak gogoan atxiki dezan lan handia egiten dute euskal etxeetako kideek. Hori dela eta, urtero, salbuespenik gabe, 1937an Gernikan gertatutako sarraskia oroitzen eta salatzen dute euren baitan zein komunitateari begira antolatutako ekitaldietan. Chascomus, Mar del Plata eta Rosarioko ospakizunak fenomeno honen adibide ezin hobeak dira, hiru hirietan Gernikako Arbolaren kimua landatuta dagoen enparantzetan egin baitziren omenaldiak. Rio de la Plata ibaiaren beste aldean ere gogoratu zuten 1937ko apirilaren 26 hura. Montevideon, esaterako, eta Saltoko euskal etxeko kideek ere aipamen berezi bat jarri zuten euren blogean.

Chascomus, Argentina. Oraindik ere heltzen ari dira gure erredakziora Gernikako Bonbardaketaren 73. urteurrenaren karietara hainbat euskal etxetan eginiko ekitaldiei buruzko berriak. "Arrazoia bistan da, data Euskal Herriaren eskubideen ikur bihurtu da eta Diasporako euskaldunek horren esanahia zabaldu nahi dute", azaldu dio EuskalKultura.com-i ekitaldiotako antolatzaileetako batek.

Chascomus hirian, Zingirako Euskaldunak Euskal Etxeak Bonbardaketaren 73. urteurrena ospatzeko gonbitea luzatu zion herriko komunitateari. Hitzordua maiatzaren 1ean izan zen, herriko Idenpendencia Plazan. Zeremoniari hasiera emateko, Euskal Etxeko idazkaria den Pedro Mauregui Larrandak hitz batzuk zuzendu zizkien bildutakoei. Ondoren, Gernikako Haritzaren kimuaren alboan, “Eusko Hazia” dantza taldeko zuzendariak, Emiliano Armendarizek, Aurreskua dantzatu zuen Necocheako Iñaki Agostini Zubillaga txistuan laguntzaile.

2010eko Gernikako Bonbardaketaren omenaldia Chascomusen 1

[Euskal Etxeko dantza taldeko zuzendari Emiliano Armendarizek Aurreskua dantzatu zuen (argazkia EE)]

Jarraitzeko, Osmildo Aranchetbehera Euskal Etxeko alkateak, Teresa Ayerza de Ehul Batzordeko lehendakariordearekin batera, lore sorta bat ipini zuen arbolaren oinean. Augusto Infantek izan zuen gero Cesar Arrondok Bonbardaketari buruzko idatzitako dokumentua irakurtzeko ardura. Bukatzeko, Jerónimo Infanteren "Pueblo Vasco" izeneko abestia kantatu zen.

Atlantiko eta Parana Ibaiaren ertzetan

Mar del Platan, berriz, Denak Bat Euskal Etxeko txiki eta ertainentzako Euskara eta Kultura tailerreko kideek antolatu zuten ekimena. Apirilaren 24an, San Martin Plazan eta Gernikako Arbolaren muskilaren inguruan, azaldu zitzaien neska-mutilei zer gertatu zen Gernikan duela 73 urte. Entzundakoa ardatz hartuz, tailerreko ikasleek irudiak egin zituzten. Jarraitzeko, San Martin plazara bertaratu zirenek loreak landatu zituzten eta besarkada sinbolikoa eman zioten arbolari. Artikulu hau baliatuz, Euskal Etxeko arduradunek esker beroak eman nahi dizkiete ekintza antolatu zuten irakasleei eta parte hartu zuten jende guztiari, bai omenaldian, bai omenaldiaren ostean zerbitzatu zen gosarian.

2010eko Gernikako Bonbardaketaren omenaldia Mar del Platan 2

[Mar del Platako Denak Bat Euskal Etxeko kideek besarkada sinbolikoa eman zioten Gernikako kimuari (argazkia EE)]

Rosarioko Zazpirak Bat-eko kideak, euren aldetik, apirilaren 26an elkartu ziren Bonbardaketa gogoratzeko. Bertako Gernika Plazan Argentinako bandera eta Ikurriña altxatu zituzten, Eusko Abendaren Ereserkia abestuz eta lore sorta utzi zuten euskal haritzaren alboan.

2010eko Gernikako Bonbardaketaren omenaldia Rosarion 3

[Rosarioko Zazpirak Bat Euskal Etxeko lagunek Gernika Plazan ospatu zuten (argazkiak EE)]

Montevideon ere beste hainbeste egin zuten eta Saltako euskal etxe uruguaitarra ere partaide izan da bonbardaketaren urteurrenean. Uruguaiko lagunek aipamen berezi bat jarri zuten euren blogean tristura handiko egun hau gogoan izateko.

Lotura interesgarriak

Saltoko Euskaldunen Taldea, Salto Uruguain
http://saltokoeuskaldunentaldea.blogspot.com/



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia