euskalkultura.eus

euskal diaspora eta kultura

Albisteak rss

Abasque, euskal sukaldaritzaren zaporeak Tokyoren bihotzera ekarri dituen jatetxe japoniarra

2011/07/13

Naoki Wada, Tokyoko Abasque jatetxeko sukaldaria, urdaiazpikoa --Baionako xingarra ote?-- mozten (argazkia R.Swinnerton)
Naoki Wada, Tokyoko Abasque jatetxeko sukaldaria, urdaiazpikoa --Baionako xingarra ote?-- mozten (argazkia R.Swinnerton)

PUBLIZITATEA

Naoki Wada sukaldaria eta Shigeo Oyama somelierra dira Tokyoko Abasque jatetxearen buruak eta, harrigarria badirudi ere, euskal sukaldaritza petoa da kartak eskaintzen duena. Wadak lau urte eman zituen Donibane Garazin lanean eta euskal produktuekin eta errezetekin liluratuta bueltatu zen etxera. Orain, Abasqueko sukaldetik, Ezpeletako biperren zaporearekin eta astiro astiro eginiko gisatuen magiarekin ari da Tokyon lekua egiten. The Japan Times egunkarian Robbie Swinnerton kazetariak Abasque-i buruz eginiko artikulutik atera dugu informazioa.

Tokyo, Japonia. Tokyoko Upper Shibbuya auzoan dago Naoki Wada sukaldariak gidatzen duen Abasque jatetxea. Kanpotik bertako itxura moderno eta garbia du, baina euskal jatetxea dela antzeman daiteke arrasto pare bati esker: sarreran ikusgai dauden ardo botilak eta atetik zintzilik dauden Ezpeletako biperrak. Izan ere, Ipar Euskal Herriko sukaldaritza da Abasque jatetxearen marka, nahiz eta azken urteetan Japonian oihartzun gehiago izan duen Hego Euskal Herriko sukaldaritza berriaren sonak. 

Naoki Wadak, Abasqueko sukaldari gazteak, hiru urte pasatxo igaro zituen Donibane Garaziko jatetxeetan, Behe Nafarroako eta Zuberoako jakiak prestatzen ikasten. Garazin hasi zen euskal produktuen kalitatea miresten --batez ere Ezpeletako biperren zaporea-- eta frantziar sukaldaritzaren tradizioarekin uztartzen.

Abasque-n prestatzen duen janaria "rustikoa baina fina da", Swinnertonen aburuz. Haragia da menuaren izarra, batez ere astiro astiro beratutako gisatuak eta labean eginiko errekiak. Kazetariak azpimarratzen dituen bi jaki euskal txerri errea eta poulet grand-mere (edo amonaren oilaskoa) dira. Aipagarriak dira ere hasierako platerrak: Wadak aurkezten duen bost edo sei pintxo proposamenak "azken urteetan nonnahi agertu diren tapa tabernetakoekin alde ederra daukatenak", dio Swinnertonek. 

Shigeo Oyamak, jatetxearen jabeak, sommelier lana ere egiten du eta berak aukeratu du Abasque-eko ardo karta zabala. Oyamak eta Wadak 2007an ireki zuten Abasque eta egun jatetxe txiki honen 18 lekuak gauero eta aldez aurretik izaten omen dira beteta.

-Informazio gehiago, jatorrizko artikuluan (ingelesez), hemen



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia