euskal diaspora eta kultura
2008/12/18
Argentinako Entre Rios probintziako Concordia herritik, gogor ekin dio sarean 'Akelarre, Eusko Argentinar Kultur Taldea-Grupo Cultural Basko-Argentino' delakoak, Mariano Silva-Torrea euskaltzale ekimentsua egile eta arduradun. Bloga da abian ipini duena, Euskal Herriko berriak eta euskal kultura eta politikari buruzkoak uztartuz, alor hauetan Europan zein Ameriketan gertatutakoak bilduz. Webguneak, argiro definitzen du politikoki bere burua EAko kide edo EAren aldeko bezala, bederen. Aldi berean, eta Argentinatik bertatik, aurrera segitzen du Pampatik 'Berriak Egunkaria' izeneko blogak, Daniel C. Bilbao kazetariak sortua, kasu honetan gehienbat euskal egungotasun politikoa aipatuz, Ezker Abertzale ofizialaren ildotik.
2008/12/18
Larunbatean Olentzerok bisita egingo du Buenos Aireseko Eusketxera, Euskal Herrira joateko bi hegazkin txartel eskuan. Izan ere, urtez urte Diasporako euskaldunei eta Euskal Herrikoei ateak zabaltzen dizkien eta bi herrialde hauen artean zubi sendo bat eraikitzen duen erakunde honek urteko azken jaia egingo du. Ospakizunean afari eder batez gozatu ahal izango dute gonbitaduek eta horien artean batek Euskal Herrirako bidaiaren oparia jasoko du. Eusketxeri zozketarako bonoak erosten laguntzeko azkeneko aukera da. Nahi duenak, gerorako utzi gabe presa pixkat har dezala.
2008/12/18
Oraindik ere Euskararen Eguneko kontaketak heltzen ari dira geurera, munduko euskal etxeek egin zituzten ekitaldien berri emanez. Patagonian, adibidez, 'Hegoalde Argentinarra' Euskal Etxeko kideek Euskal Herrira bidaia zozketatu zuten eta irabazlea Ramiro Kröeger izan zen, Río Gallegoseko Los Vascos tabernako jabea. Mexikon DFko Euskal Etxean bildu ziren euskaltzaleak eta euskara ikasle eta irakasleei omenaldia egin zieten. Gainera, eta Lazaro Valiente musikariak gidatuta, jaira bildu ziren ia 100 lagunek 'Lau Teilatu' abesti mitikoaren 'bertsio esperimentala' kantatu zuten.
2008/12/17
Urtearen amaierarekin batera, Chivilcoy-ko 'Beti Aurrera' Euskal Etxeak 2008ko balioespena egin du. Izan ere, aurten bete ditu 25 urte bere ibilbidea hasi zuenetik. Zilarrezko ezteiak emaitzez ospatzeko ekitaldi mordoa antolatu du. Tartean bereziki aipagarri bezala azaltzen da Euskal Etxeal zabaldu duten blog-a, baina ezin aipatu gabe utzi urtean zehar jardun duen dantza taldea, euskara ikasi duten bi taldeak, asteroko irratsaioa, sukaldaritza ikastaroak, zenbait euskal jai tradizional biziaraztea, Juan Mari Beltran eta Aretxabaletako Akordeoi Orkestra bezalako ospakizunak, emanaldi artistikoak, tango saioak, elkartasun ekitaldiak... 25 urteak ospatzeko, zer lanean gustura segitzea baino modu hoberik!
2008/12/17
Mikeldi Elkarte Eno-Gastronomikoa duela bost urte sortu zen, 'ardo ona, goi mailako gastronomia eta elkarbizitza' sustatzeko asmoarekin, eta denbora honetan Mexikoko euskal komunitateko kide dexente bildu dira taldera. Joan den azaroaren 27an taldeak lehendakari berria aukeratu zuen --Alvaro Mier-- eta datorren urtera begira orain arte egindako bazkari eta afarietako plater arrakastatsuenen errezetak liburu batean biltzeko asmoa agertu dute.
2008/12/17
Munduko beste hainbat euskal etxeek bezala Madrilgo Euskal Etxeak Euskararen Nazioarteko Egunarekin bat egin zuen joan den abenduaren 3an. Elkarteko euskara ikasle eta irakasle multzo polita bildu zen euskal etxearen egoitzan eta zenbait jarduera antolatu zituzten: txalaparta, dantza eta bertsolaritza lantegiak, kantuak eta lagunarteko afaria. Eguna Mikel Laboa kantariari egin zioten omenaldi txiki batekin bukatu zen.
2008/12/16
Eusko Etxea elkartea Caracaseko Nazioarteko I. Pilota Txapelketaren egoitza izan da abenduaren 2tik 6ra, Argentina, Estatu Batuak, Uruguai eta Venezuelako pilotariak bildurik elkarteko frontoian lehian. Astea biribiltzeko abenduaren 6 eta 7an Esku Pilota Open ikusgarri bat jokatu zuten Euskal Herriko Agirre-Argote eta Berazaluze-Arruti pilotariek, Aspe eta Asegarce enpresetako profesionalak.
2008/12/16
Patxi Baztarrika Eusko Jaurlaritzako Hizkuntza Politikarako sailburuordea New Yorken izango da bihar eta etzi Nazio Batuen egoitzan egingo den “Language Matters! – Linguistic Diversity, Globalization and Development” (Hizkuntzek axola dute! Hizkuntza Aniztasuna, Globalizazioa eta Garapena) mintegian parte hartzeko. UNESCOk izendatu Hizkuntzen Nazioarteko Urtea dela eta --2009ko otsailaren 21ean amaituko da--, mundu osoko hizkuntza adituek parte hartuko dute mintegian, besteak beste honako gaiak aztertuz: 'hizkuntza aniztasuna: aukera eta garapena'; 'gobernu eta erakundeen hizkuntza ekimenen funtzionamendua', eta 'arrakasta izan duten hizkuntza politikak eta praktikak'.
2008/12/16
Venezuelako euskal komuniteak atsekabetuta gogoratu zuen Iñaki Amenabarren eta beste sei bazkideren heriotza elkarteak hilero lehenengo igandean egiten duen mezan. Ekitaldian emozioa izan zen nagusi, Amenabar azaroaren 28an Euskal Etxean egon ostean hil zutelako, 49 urte zituela. Berarekin batera, elkarteak azkenaldian hil diren Ramón León Agudo, Juanita Zubiri de Echezarreta, Itziar Olabeaga de Anasagasti, Milagros Seijo Obieta, Ramón Ezponda Atozki eta Miren Goimendi de Bergareche gogoratu zituen.
2008/12/15
Txileko nafar etxe bakarreko eta Argentinako bost nafar etxeetako (Buenos Aires, Mar del Plata, Rosario, Bolivar eta Mendoza) hirurogeita hamar bat buruzagi eta ordezkari Txileko hiriburuan bildu dira abenduko lehenengo asteburuan gizatalde honen egoeraz hausnartzeko, Nafarroako Gobernuarekiko harremanak aztertzeko eta geroaz jarduteko. Bilerara Espainiako Nafar Etxeen Federazioko presidente den Rosa Mary Ibañez ere bildu zen eta Nafarroako Gobernutik Alberto Catalan Harreman Instituzionaletako kontseilari eta gobernuko eleduna bertaratu zen.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
