euskal diaspora eta kultura
2012/06/07
Nafarroako Parlamentuko presidente Alberto Catalan-ek harrera egin die joan den asteartean Argentina eta Txileko nafar etxeen presidente Crisanto Ayanz-i eta Espainiako Nafar Etxeen Federazio Nazionaleko kargukide Rosa Mary Ibañez-i. Aurretik Gobernuko bozeramale eta Harreman Instituzionaletako kontseilari izan zelarik --bere eskumen zirela nafar etxeekiko harremanak--, Catalanek bertatik bertara eta tokian tokiko nafar etxeak eta bazkideak ezagutzeko parada izan zuen, Txile-Argentinan eta baita Espainian ere, eta beraz bildutakoek ez zuen elkar aurkeztu behar izan. Catalanek Nafarroako Parlamentuaren sostengua adierazi zien kanpoko nafarrei eta nafar etxeek daramaten lanari.
2012/06/07
Duela urte batzuk Oskar Alegria zinemagile nafarrak Londresko Tate Gallery museoan Man Ray argazkilariaren lanen artean euskal izenburu bat aurkitu zuen: "Emak Bakia". Man Ray-k 1926ean Lapurdiko etxe batean grabatu zuen filme labur bat zen. Etxearen izenaren atzean istorio bat bazegoela sumatu zuen Alegriak, eta haren bila hasi zuen bidaia dokumental batean islatu zuen. Bideak hamaika itzulinguru eta bidezidorretan zehar eraman du Oskar, baina ordaina izan du: etxea aurkitzeaz gain, istorio eta pertsonaia bitxiak ere topatu ditu; tartean, etxea egin zuen errumaniar noblearen biloba, 94 urteko printzesa alemaniarra. Gaur eta igandean Mexiko hirian aurkeztuko du filma, ondotik Edinburgh-en.
2012/06/07
Arrazoi ugari izan dute Chubut probintzia patagoniarreko Puerto Madryn hiriko euskaldunek euren erakundearen lehenengo urtebetetzea ospatzeko. Urteurrena bera garrantzi gutxiko motiboa ez bada, beste berri eta nobedade onekin ekin diote Etorritakoengatik-ekoek euren elkartearen bigarren urteari. Alde batetik, eta egoera ofizialari dagokionez, izaera juridikoa lortu du euskal etxeak maiatz hasieran. Horrekin batera, Eusko Jaurlaritzaren onarpena izateko izapideak bideratu ditu. Bestalde, eta eguneroko ekintzei dagokienez, euskal dantzez aparte euskal sukaldaritza eta pilota ere garatuko dira aurrerantzean Puerto Madrynen euskaldunen eskutik.
2012/06/06
Iragan larunbat eta igandean Erromako Associazione Culturale Euskara eta Upter unibertsitateko Euskara eta Euskal Kultura Saila Ostana Sarien hirugarren edizioan izan dira. Okzitaniako Chambra d'Oc elkarteak antolatzen ditu sari hauek eta urtero Europako hizkuntza gutxituetan idatziriko lan bat nabarmentzen dute. Aurten iazko saria irabazi zuen Harkaitz Canoren "Belarraren ahoa" (Filo d'erba) liburuaren okzitanierazko bertsioa aurkeztu dute eta ACEk bertan egon nahi izan du.
2012/06/06
Bi hitzaldi eman zituzten hurrenez-hurren Jon Ander Ramos eta Oscar Alvarez Gila historialari euskaldunek La Platako Unibertsitate Nazionalean (UNLP), Argentinan, goi-ikastetxe horretako Irlandar Pentsamendu eta Kulturaren Katedra Libreak eta Etxepare Institutuko Irakurletzak antolaturik. Jon Ander Ramosek Argentinara emigratutako Mendizabal Gorostizu familiaren gutunetan euskararen presentzia aztertu zuen eta Oscar Alvarez Gilak, berriz, Hollywood-ek Estatu Batuetako euskal immigranteei emandako tratamentua hartu zuen hizpide.
2012/06/06
Adalberto ‘Potxolo’ Loyolaren heriotzaren bosgarren urtemugaren baitan, Arrecifeseko Euskaldunak Denak Bat-eko kideek ‘Txistulariaren Eguna’ ospatu zuten joan den maiatzaren 26an. Lagun arteko afarian, esker oneko hitzak esan zituzten euskal etxeko arduradunek musikari hauen ekarpena gailentzeko. Horretaz gain, oroigarriak eskuratu zizkieten etxeko gaur egungo txistulariei baita jadanik ez daudenen ondorengoei ere. Maiatzaren 26ko elkarretaratzearen aurretik, maiatzaren 15ean hain zuzen, ekimen berezi bat egin zen elkartearen panteoian. Euskaldunak Denak Bat-eko komunikazio arduradunek jakinarazi dute, bestalde, euskal etxeak bultzatzen dituen ohiko ekintza guztiak arrakastaz gauzatzen ari direla, tartean euskara eta dantza klaseak eta ‘Ipuinaren Ordua’ programa.
2012/06/05
Euskal etxeetan dekanoa den Buenos Airesko Laurak Bat-ek Urteko Batzar Nagusia egin eta bertan aztertutako gaien artean Zuzendaritza Batzordea berritzea egonik, agintealdi berrian elkartea gobernatuko duen buruzagitza hautatu zuen, Arantxa Anitua lehendakariarekin arituko direlarik batzordekide Arantxa Goicoa, lehendakariorde; Miren Arozarena, idazkari; Maria Antonia Barquin, idazkariorde; Eduardo Lizaso, diruzain; eta Maite Anitua, diruzainorde, besteak beste.
2012/06/05
Erroman, bada eskola publiko bat, non urtero ikasle talde batek --familiaz edo bestela ere Euskal Herriarekin harremanik ez daukaten gaztetxoak dira-- euskara, musika eta irudimena batera lantzen duen. Euskanta izena du proiektuak eta hiriburu italiarreko 'Associazione Culturale Euskara' delakoaren eskutik dator. Euskanta 2012 gaur aurkeztuko da Erromako Manetti eskola publikoan. Ikasleek kantuak italieraz idatzi eta euskaratu egiten dizkiete eta, euskara jolastzat hartuta, musika gehitu eta kantatu egiten dute. Hau guztia grabatu eta ikasleek euren lehenengo Cda lortzen dute, euren emaitzekin. Orain, emaitzok internetez entzun eta jaisteko aukera daukazu.
2012/06/05
Kaliforniako Stanford unibertsitate ospetsuko Euskara eta Euskal Kultura irakurletzak hainbat ekitaldi antolatu ditu ikasturtean zehar; hala nola, hitzaldiak, bertso-saioak eta, azkena, txalaparta tailer bat. Iñaki Lopez de Luzuriaga irakurlea, txalapartaria bera, izan da musika lantegian irakasle. Ekimen honekin txalapartaren taupadak unibertsitatearen kanpusaren bihotzera eraman zituen iragan maiatzaren 24ean; bertatik pasatzen ziren ikasle, irakasle zein bisitariei euskal musika tresna berezi hau jotzeko aukera emanez.
2012/06/04
Jaurlaritzak Ameriketan dituen Euskadiren hiru Ordezkariak, esan nahi baita Ana Urchueguia (Txile eta Peru), Elvira Kortajarena (Argentina, Brasil, Paraguai eta Uruguai) eta Iñaki Martinez (Kolonbia, Venezuela eta Ertamerika) Legebiltzarrera deituak daude bihar goizean, hurrenez hurren Txileko Santiago, Buenos Aires eta Bogotan egoitza duten euren Ordezkaritzen jardunaren berri eman dezaten Legebiltzarreko Europako Gaiuetarako eta Kanpo Harremanetarako Batzordearen aurrean. Saioa zuzenean segitu ahal izango da goizeko hamarretatik aurrera internetez Irekiaren eta Legebiltzarraren webguneen bidez.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
