euskal diaspora eta kultura
2012/05/23
Dena prest da Kaliforniako Bakersfield-en datorren asteburu honetan garatuko den bertako euskal piknik eta festa abiarazteko. Estatu Batuetan urtero maiatzean hasita egiten diren euskal jaien artean, sasoin-hasierako klasiko bat da Bakersfieldekoa. Ezin dira ukatu hemen euskal giroa eta euskal tradizio bertan errotuak. Euskal dantzen, berbenen, erakustaldien, kliken, mus partiden eta gainerakoen artean, zati garrantzitsua dira pilota eta pilotariak. Aurten, ohitura denez, Euskal Herritik propio etorritako pilotariak bertakoei juntatuko zaizkie.
2012/05/23
Kaliforniako Bakersfield herrian urtero maiatzean egiten den euskal festak zenbaki biribila lortu du aurtengoan, bere 40. ediziora iritsi baita, eta osasun onean gainera. Besta antolatzen duen Kern County Basque Club harro egon daiteke. Bertaratzeko aukera dutenek ohiko eta bilatutako osagaiak aurkitu ahal izango ditu: euskal musika, dantza tradizionala, berbena dantza, mus partidak, euskal janaria, kantuak, apezpikuak emandako meza, pilota partidak, klika eta batez ere euskal amerikar giro jatorra. Aurreko berrogei urteetan bezala, eta 40 urteko hurrengo epeari hasiera ematen. Asteburuko egitaraua bildu dugu hona.
2012/05/23
Susana Sabin Fernandez historialari eta filologoa London Basque Society elkartean izango da gaur arratsaldean, 1937an Erresuma Batuan errefuxiatu ziren haur euskaldunei buruzko hitzaldia emateko. Ikerlariak gai honi buruzko tesia egin zuen eta haurren esperientzia ikertzeaz gain, historiak herrialde anglosaxoian izan duen oihartzuna aztertu du. Eusko Jaurlaritzak tesian oinarritutako liburua argitaratu zuen iaz, ingelesez, "The "niños vascos": memory and memorialisation of the Basque refugee children of the Spanish Civil War in the UK" izenburupean. Aurten Gerrako Umeen etorreraren 75. urteurrena bete da.
2012/05/23
Erroman hasitako europar bira batek Euskal Herrira ere eraman zuen Sunchales-eko Ezequiel Bolatti alkatea. Euskaldunen arteko egonaldian Arrasateko Behi-Alde esne-kooperatiba, Unibertsitatea eta Kooperatibaren prestakuntza gunea bisitatu zituen Bolatti alkateak ‘Casa Cooperativa de Provisión Sunchales Limitada’ delako elkarteko ordezkaria den Edgardo Bonaudik lagunduta. Sunchales eta Arrasate-ren arteko harremana 2007an abiatu zen ofizialki, garai hartako agintariek senidetzea sinatu zutenean. “Arrasaten ikusitakoak animatu egin gaitu esne arloko merkatzaritza-trukeak bultzatu eta gure herrian bertan hirugarren mailako edota unibertsitate mailako prestakuntza garatzera”, iragarri du Bolattik prentsaurrekoan.
2012/05/22
Bi hamarkada beteko dira aurten La Pampa probintzia argentinarreko hiriburuko euskaldunak biltzen hasi eta ‘Zelaiko Euskal Etxea’ izeneko elkartea sortu zutenetik. Karia horretara elkartekideek ekintza berezi batzuk antolatuko dituzte urteurrena nabarmendu eta behar bezala ospatze aldera. Ekintzen egitaraua datorren asteko ostegunean abiatuko da, Udal Kultur Gunean estreinatuko den argazki erakusketa batekin. “Hogei bat lagunek ekarri dizkigute euren argazkiak eta orain material guztia taxutzen bukatzen ari gara kultur gunean ikusgai jartzeko. Erakustaldiaren muina probintziara heldu ziren lehenengo euskaldunen irudiak dira”, azaldu digu Zelaiko Euskal Etxea-ko kide den Dora Valsecchi Sarrateak.
2012/05/22
Iragan asteburuan Rhode Island-eko euskal etxeko lagunak elkartearen urteroko jaia ospatzeko bildu ziren eta, ohitura duten legez, txitxiburduntzi estiloko errekia egin zuten. Bazkarian eta ondorengo festan ehun lagundik gora parte hartu zuten. Arratsaldean bazkideek herri kirol erakustaldiak egin zituzten, besteak beste aizkora proba, txingak eta harrijasotze saioa. Rhode Island-eko Euskal Etxeak sarean ipini du ikusgai jarraian eskaintzen dizuegun argazki kronikaren bertsio osoa.
2012/05/21
Joan den ostegunean ospatu zuten erakundearen 117. urteurrena Buenos Aireseko Iparraldeko Euskal Etxean. Ekimena famili giro bildu eta hautu batean gauzatu zen elkartearen egoitzako kultur aretoan, eta hiriko zenbait euskal erakundetako ordezkariak batu zituen. Ekimenaren baitan, Jean Pierre Passicot izenarekin bataiatu zen etxeko liburutegia. Euskaltzale handia eta erakundeko lehendakari eta fundatzaileetakoa izan zen Passicot-en jardunbidea laburbildu ondoren haren omenezko plaka desestali zen eta Euskaltzaleak-eko abesbatzak euskarazko doinu batzuk kantatu zituen. Zeremonia bukatzeko, topa egin zuten bildutakoek erakunde anfitrioiaren alde.
2012/05/21
Euskaldunak elkarteak urtean behin bazkide talde bat bildu eta bidaia egiteko ohitura hartua du. Aurtengo bidaiaren helburua Quebec-eko bazterrak hobeto ezagutzea zen, Adelaide Daraspe presidenteak EuskalKultura.com-i esanik, eta Taldeak Montrealetik lau ordutara dagoen Saint-Anne urjauzia ikusi eta biharamunean Charlevoix-en dagoen 'Euskal Baserria' bisitatu zuen. Euskal jatorriko bikote batek, Isabellek eta Jean-Jacques Etcheberrigarayk, muntatu du baserria eta bertan euskal produktuak saltzen dituzte.
2012/05/18
Euskal gaiek leku nabarmena izango dute datozen egunetan Kaliforniako unibertsitateetan, estatu honetako zenbait gunetan ematen diren Euskara eta Euskal Kultura ikastaroek sortutako interesari esker. Batetik, bihar bertan euskal literatura eta irudiak izango dituzte hizpide Bakersfield-eko Unibertsitatean. Bestetik, datorren ostegunean euskal kulturak tartetxoa izango du Santa Barbara Unibertsitatean, Noka talde euskal amerikarrak kontzertua emango baitu eta Diana Palenzuela Euskara irakurleak hitzaldia emango.
2012/05/18
Bakearen eta Askatasunaren aldeko Kulturen Urtearen baitan Bilbon ari da egiten egunero iragan astelehenetik datorren igandera bitartean Oroimenari eta Bizkidetzari buruzko Biltzarra, "balore etiko eta demokratikoetan sostengua duen gizarte berri baten oinarriak finkatzen" lagungarri izan nahi duen ekimen bat, "geroa, iragana ahaztu gabe" eraikitzen laguntzeko, " izukeriaren eta askatasun gabeziaren erasoa jasan duten pertsonen oroimena" bilduz eta aztertuz, horretarako, inguru hurbil eta urruneko beste esperientzia batzuk eta "indarkeria deslegitimatzeko eta bizikidetza sendotzeko" proposamenak mahaigaineratuz.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
