euskal diaspora eta kultura
2013/12/30
Hezkuntza lege argentinarraren eskakizunak betez, baina ikasleei ingelesa eta arte arloko gaiak proposatuz, eta euskal kulturara --tartean, esaterako, euskal dantzetara eta euskarara-- hurbiltzeko ahalegin berezi bat eginez sortu zen 2009an Necocheako Ikastola izena hartu zuen eskola, Buenos Aires probintzia hegoaldeko kosta herri honetan, bertako seme den Xabier Zubillaga euskal-argentinarra eragile. Bost urte eta gero, 2009an aurreneko ikasle sartu zirenek lehenengo zikloa bukatu dute eta zentroak eurekin bigarren zikloko ikasketak inauguratuko ditu 2014an. Proiektua aurrera jarraitzekotan da, beraz, baina datorren urtetik aurrera modu autonomoan, Zubillagaren partaidetzarik gabe.
2013/12/30
Frantziako Euskal Etxe nagusienetako da Paueko Lagunt eta Maita elkartea, 800 bat familiek osatua. Euskal Herritik gertuen dagoena da eta hiru bazkidetarik bat euskalduna omen da, Pantxoa Challet presidenteak EuskalKultura.com-i agertu dionez. Elkarteak gogo biziz ekingo dio urte berriari, eta gazteak erakarri nahian makina bat jarduera berri egingo dituzte. Esaterako, martxoan festa handi bat egingo dute elkartea Paueko Unibertsitateko ikasleen artean ezagutarazteko eta azaroan jaialdi berezi bat antolatzekotan dira.
2013/12/27
Aurten ere jo eta ke ibili da Olentzero opariak banatzen Euskal Herriko neskamutilen artean, baina, horrez gain, munduan zehar era izan da, burubelarri lanean, hainbat tokietako euskal etxeetako txikiak agurtzeko. Aurretik, Argentinako makina bat euskal elkarteetara egin zituen bisitak bildu ditugu; honetan, beste hainbeste egingo dugo Washiongton, Rhode Island, Mexiko, Murtzia eta beste zenbait elkartetatik bidali dizkiguten argazkiak eta bideoak partekatuz.
2013/12/27
Ezaugarri ugariko euskal etxeak daude. Handiagoak eta txikiagoak, gazteak eta urte askotako jardueradunak. Batzuetan sukaldaritza da euren puntu sendoa, edo dantzak, jaiak, formakuntza, euskara edota gizarte lana, esaterako. Nolanahi ere, guztiak dira lagunen bilgarri eta elkargune, bereziki urte amaiera jai garaian. Balantze eta proiektu eta planen tenorea da. Hona Buenos Airesko gure erredakzioak bidalitako abendu honetako hiru azken elkarretaratzeen berri, Toki Eder, Gure Txokoa eta Iparraldeko Euskal Etxearen eskutik.
2013/12/26
Berlingo Euskal Etxeko arduradunak pozik agertu dira aurtengo urte amaieran egin berri dituzten ekitaldiek izan duten harrera onarekin eta esker ona agertu diete bertara bildu ziren sortzaileei zein partehartzaileei. Euskararen Nazioarteko Egunaren harira ekitaldi egitarau oparoa eskaini du elkarteak, azaroaren 27an hasi eta iragan abenduaren 15a bitartean. Poesiak tarte zabala izan du jardueretan, Iñigo Astiz eta Mikel Ayerberren "Hondakindegia" ikuskizunarekin eta Angel Erro poetaren "Miss pelotaris favoritoak" irakurraldiarekin, esaterako. Datorren urterako, udaberritik aurrera, ekimen ugari prestatzen hasia dela iragarri du elkarteak.
2013/12/26
Argentinan zaude eta Euskal Herria ezagutu-bisitatu-gozatu nahi duzu? Aurtengo esperientzia arrakastatsuak bultzaturik, Euskal Herrirako bigarren talde-bidaia antolatzen ari da Arrecifeseko euskal etxeko erreferenteetako bat den Mariana Domine. Hamabost egunez, Euskal Herriko leku esanguratsuenak bisitatuko dituzte bidaiariek, beti laguntzaile eta gidari batekin. Bidaia abuztuan izango da eta kuota pesotan ordaindu ahal izango da, “oso prezio onean, gainera”, antolatzaileek adierazi dutenez. Animatu eta murgil zaitez euskal kulturan, euskal kultura maite dutenen eskutik!
2013/12/26
Leire Leundaren tupusteko heriotzak, atzo Iruñean, Diasporako euskal familia handia astindu du, bereziki Euskal Herriko euskal-venezuelar komunitatea eta Venezuelako euskal erkidegoa. Caracasen euskal familia ezagun batean jaioa eta hiriko Eusko Etxean hazia, Leire Leunda Viscarret euskalduna eta venezuelarra zen. Duela urte gutxi euskalerriratua, 38 urte zeuzkan eta Iruñean eta Burladan lan egin eta bizi zen. Joan den astelehenan sartu zen Iruñeko ospitalean, "inongo eritasunik zeukanik jakin gabe" eta bertan hil da atzo asteazkena 7:00etan. Joseba eta Bakartxoren alaba, eta Irantzu eta Izaskunen tarteko ahizpa, bere aldeko elizkizunak gaur arratsaldeko 19:30etan izango dira Burlatako San Blas elizan; eta Caracasen, 18:30etan Manzanares elizan.
2013/12/24
Ainoa Irazusta euskalargentinarrak ETBko "Pregunta al Lehendakari" saioan parte hartu zuen joan den ostiralean eta bertan honako galdera egin zion Iñigo Urkulluri: "Diasporak autodeterminazioaren alde paper garrantzitsua duela uste al duzu?". Grabazioaren ostean partehartzaile askok Diaspora zer demontre ote den galdetzen ziotela dio, etsituta, Bahia Blancako euskal etxean hazi den neska honek. Ainoaren familia elkarte horretan buru belarri aritu da lanean beti, euskal kulturaren alde. Euskal Herrira bizitzera etorri zenean konturatu zen hemen Argentinako euskaldunen berri inork gutxik zuela, eta dezepzio handia izan zela dio.
2013/12/24
Aurten bere seigarren ediziora iritsi den 'Folk Open Air' izeneko festa Argentinako hiriburuko Folk Jaialdirik handiena da. Buenos Airesko Kultura Ministerioak bultzaturik, kalitate handiko artistak eta azpiegitura biltzen ditu, lehen mailako ikuskizunak eskaintzea helburu. Ekin Dantzari Taldea jai honetako protagonista izan da aurten ere. Aitor Alava zuzendariaren hitzetan, “gure taldeak komunitate osoarengana heltzeko asmoa du; Museoen Gauean eta Folk Open Air Jaian parte hartzea horren adibide onak dira”.
2013/12/23
Iñigo Urkullu lehendakariak gabon-mezua zuzendu dio Diasporari, kargu honetan eman duen lehenengo urte honetako Gaztemundu eta Global Training proiektuak aipatu ondoren "gazte espiritu hori eta balore horiek" azpimarratzeko, "munduan zehar dagoen euskal familia" goretsiz eta komunitate bereko partaide aitortuz Euskadin zein Euskaditik kanpo bizi diren euskaldunen multzoa. Lehendakariak Jaurlaritzaren "konpromiso sendoa" berresten du "euskal komunitate osoarekiko harreman sareari" lagundu eta "gure Herriaren barne taupada partekatzen" jarraitzeko, Euskadi / Basque Country marka ezagutarazi eta aintzaesteko bidean.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
