euskal diaspora eta kultura
2018/03/23
Hamaika izan dira --azken orduan iritsi den 'Kaltegarria' izenekoa sartuta-- Madrilgo Euskal Etxean gaur iluntzean ikusi eta epaituko den Laburmetrai Lehiaketara aurkeztu diren lanak, bertako Euskaltegiko maila desberdinetako kasleek egindakoak. Seigarren edizioa du lehiaketak eta, dagoeneko sendotuta dagoen ohituraren arabera, bertaratzen direnek jujatu eta aukeratuko dute 'palmares'a, film onenari dagokionez eta baita gizonezko eta emakumezko aktore onenari dagokienez ere.
2018/03/23
Gabi Navas eta Jose L. Matellan margolariek hartu zuren bere gain Gernika Plaza edertzeko ardura, eta murala ez ezik beste arte lan batzuk ere egingo dituzte “Gernika Plazaren berdegunea aisialdirako leku egoki bihurtu eta euskal kulturari agerikotasuna emateko helburuarekin”, adierazi digute Villegas’ko Euskaldunak Euskal Etxetik. Murala 120 metro koadro duen horma batean pintatzen ari dira artistak, hainbat euskal irudi tarteko, hala nola ikurrina, Gernikako Juntetxea, gudari bat edota euskal emakume bat.
2018/03/22
2018ari dagokion berritzea partziala izango da baina kargu garrantzitsuenak hautatuko dira, tartean, lehendakari, idazkari eta diruzainarena. Hautagai zerrendak aurkezteko epea apirilaren 2an bukatuko da eta Biltzar Orokorra apirilaren 21ean burutuko da, Laurak Bat-en instalazioetan. Aurtengo hitzaldien zerrenda ere jakinarazi du azken ordu hauetan FEVAk; gaiak anitzak dira, euskal etxe ugariko hizlarien esku.
2018/03/22
Etorritakoengatik Euskal Etxeak bere egoitza propioa dauka abendutik. Erakundeak bertan funtzionatzen du dagoeneko, baina inaugurazio ofiziala oraindik ez da egin, lokalean konponketa batzuk egiteke baitaude. Lanen gastuei aurre egiteko, janari salmenta egin berri du Euskal Etxeak, lehena etxe berrian. Ekintza erabat arrakastatsua izan zen: 90 oilasko kazola saldu zituzten, prestatutako guztiak.
2018/03/21
Sao Pauloko Eusko Alkartasuna Euskal Etxeak mezu bat plazaratu eta helarazi digu eskertuz eta bat eginez Berri Txarrak talde nafarrak BECeko bere kontzertu erraldoian emakume guztiak oroituz eta bereziki Brasilen hil berri duten Marielle Franco giza eskubideen militante feminista aipatuz eskainitako kantuarekin. Eusko Alkartasunak, dio bere oharrean, bat egiten du Brasilgo populazio osoarekin, justizia ozen eta irmo aldarrikatuz (ikus Berri Txarraken kontzertuko momentu horretako bideoa).
2018/03/21
Martxo hasieran ekin zion 2018ko Topaketen programari Buenos Airesko Euskaltzaleak-ek. Euskara eskolak, ordea, apirilaren lehenengo astean jarriko ditu abian, maila guztietako ikastaroak eskainiz, lau egoitzatan. Aurrez aurreko klaseetan parte hartu ezin dutenentzat elkarteak bere On Line Ikastaroa eskaintzen du. Eta ikasgeletatik kanpo ere aritzen da : stand bana muntatuko du, esaterako, Buenos Airesko Sukaldaritza Gunean (apirilaren 7an) eta ‘Buenos Aires Celebra’ n (maiatzaren 6an).
2018/03/20
Ez dira euskal hautagai bakarrak, baina bien kasuan Estatu Batuetako euskal komunitatean oso ezagunak diren bi pertsona dira, eta azken asteotan urratsa eman dute bakoitza bere barrutian hautagai izateko: Diana Lachiondo Idahoko Ada Konderriko Gobernu-Batzorderako hautagai demokrata izateko primarioetan ari da lehian (Boise hiria da Ada konderriko egoitza), eta Aitor Narvaiza, berriz, Elko hiria egoitza duen Elko konderriko sheriffa izatearren.
2018/03/20
2018ko egitaraua kaleratu du San Miguelen, Buenos Aires probintzian, Askatasunaren Bidea Euskal Elkarteak eta berritasun interesgarriak dakartza, hala nola Horacio Marottok ‘Navarrorum, euskararen gaineko dokumentu nafarren bi mila urteko ondarea’ izeneko erakusketari buruz apirilaren 7an eskainiko duen hitzaldia. Bihar, martxoaren 21a, bere Mus Tailerra inauguratuko du taldeak eta euskara klaseak eta euskara eta euskal kultura tailerra apirilean abiatuko ditu.
2018/03/19
"Inguratu zaitez jolasean kultura hauetara!" leloarekin antolatu dute asteazken honetan Mexikoko Unibertsitate Autonomoak (UNAM) eta bere baitango euskara eta katalan irakurlegoek --hurrenez hurren Etxepare Euskal Institutua eta Kataluniako Ramon Llull Institut sustatzaile-- "Euskal Kataluniar Jardunaldi Ludikoa". Proposamen irekia da, publiko orokorrari zabaldua, doanik eta aurre-ezagutzarik eskatzen ez duena. Inguruan bazabiltza, zergatik ez hurbildu. Edo interesa izan dezakeen lagunen bati informazioa pasa?
2018/03/19
Urteak daramatza Viedma eta Carmen de Patagonesko euskal gizataldeak jaialdi herrikoi honetan parte hartzen, zehatzago esateko bere baitango kabalkada zibiko militarrean. Baina aurten gora jo nahi izan du bere apustuan eta bertako euskal etxeak stand bat muntatu du Festaren gunean, euskaldunei eta Euskal Herriko kulturari agerikotasun handiagoa emate aldera. Eta baita lortu ere, Aberri Etxeak bere proposamenak ongi sustatu eta zabaldu baititu 2018 ikasturteko ekimenak abiatzeko prest dituen une honetan.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
