euskal diaspora eta kultura
2013/06/17
Paraguaiko hiriburutik agertzen digunez, Asunciongo Euskal Etxea euskal dantza eskolak ematen hasiko da uztailaren 4ean eta parte hartzeko gonbitea luzatu nahi die bere bazkide, lagun eta interesatuei oro har. Dantza saioak Izar Nazabalen ardurapean garatuko dira eta euskal etxearen euskara eskola eskaintzari emendatuko zaizkio, Jesus Nazabal delarik azken urteotan euskara irakasle.
2013/06/16
Hiriburu uruguaitarreko Euskaro Euskal Etxearen Ohiko Batzorde Nagusiak hauteskundeak egin ditu bere Zuzendaritza Batzordea berritzeko eta elkarteko bazkideek berretsi egin dute bere postuan orain arteko lehendakari Lucia Goñi Spinoglio. Lucia Goñirekin batera izango dira batzordekide Julio García Denis, lehendakariorde; Martha Perdomo, idazkari; Teresita Arcelus, idazkariorde; Carlos Larragueta, diruzain; eta Maria del Carmen Latienda, diruzainorde.
2013/06/14
Eusko Jaurlaritzak datorren asteko ostegunerako aurreikusi du emango duela argitara Gaztemundu 2013rako deialdia. Euskal etxeetako musika eta musikariei eskainitako edizioa izango da. 18 urtetik gorako gazteek har dezakete parte --ez da adin mugarik ipini--, instrumenturen bat jo edo euren elkarteetan musikaz arduratzen badira. Eskabideak aurkezteko epea 2013ko uztailaren 21ean itxiko da.
2013/06/14
Ibaialde elkarte lapurtarreko hamalau arraunlariak atzo abiatu ziren Quebec aldera eta gaur helduko dira Trois Pistoles hirira. Han, Parc de la Aventure Basque euskal museoan ekingo diote Indianoak 2013 espedizioari: 500 kilometro Saint Laurence ibaian gora, garai bateko baleazaleen legean, Montrealeraino. Ibaialdek Quebec-eko euskal etxea izan du lagun egitasmo honetan, eta Euskaldunakeko lau bazkide izango dira traineruko tostarteko. Bidaia kultur truke gisa ulertzen dute Ibaialdeko kideek, eta etapa bakoitzaren ostean euskal kultur erakustaldiak eta gastronomia lantegiak egingo dituzte herriz-herri.
2013/06/14
Rio Grande do Sul estatu brasildarreko Casa Basca elkarteak Euskal Topaketa egin zuen ekainaren 8an, Pelotas hirian. Ekitaldiak harrera ona izan zuen, eta Brasilgo, Uruguaiko eta Argentinako lagunak bildu ziren bertara. Elkarteko presidentea, Ana Luiza Etchalus, pozik agertu da emaitza on horrekin eta euskal etxea indarberrituta atera dela azaldu du. Ekimenak jarraipena izango du eta datorren azarorako topaketa berri bat antolatzen ari dira, baina oraingo honetan deiak herrialdeko mugak gaindituz: Brasilgo eta Uruguaiko euskaldunen lehen bilkura izango da.
2013/06/13
Aktibitate handiko urte honetan, urrats garrantzitsuak eman ditu Buenos Airesko Euskaltzaleak-ek. Izan ere, euskara klaseak eskaintzeaz gain, Euskal Herriko kultura zabaltzeko beste hainbat ekintza bultzatzatzen ari da instituzioa. Engaiamendua eta ahaleginak ez dira oharkabean geratzen eta FEVAren azken bileran bazkide aktibo gisa onartu du Federazioak hiriburuko euskaltegia. Berri honekin batera, iragarri du urteko Seigarren Topaketan Jon Ander Ramos Martinez irakasleak hitzaldi bat eskainiko duela. Hitzordua, bihar iluntzeko 8etan.
2013/06/13
Azkue Fundazioak eta Iparraldeko Euskal Kultur Erakundeak (EKE) antolatzen dute lehiaketa hau, gazteen artean euskal kulturaren inguruan sormena sustatzeko. Edizio honetan parte-hartzaileak Iparraldeko zein Hegoaldekoak izan dira. Hona irabazleak: Soinu kategorian, Uztaritzeko Christian Aduriz; Irudi Kategorian, Hoztako Asisko Urmeneta, eta azkenik, Testu kategorian, Baionako Bea Salabarry. Zorionak hiruoi!
2013/06/13
Ekin Argitaletxeak eta Eusketxek gonbidaturik, bi zati dituen aurkezpena eskainiko du larunbat honetan Jon Ander Ramos Martinez Euskal Herriko Unibertsitateko irakasleak Buenos Aires hiriburuko Lizarraenea-n. Lehenengoan, Kubako euskal asoziazionismoaz mintzatuko da; bigarrenean, ostera, Victor Mendizabal-i buruz idatzi duen liburua aurkeztuko du. Datozen aste eta hilabeteei begira, uztailaren 6an, larunbatez, Eusketxek antolatutako ‘Lili Eder Bat’ Kontzertu Zikloaren bigarren emanaldia burutuko da Mexiko kaleko euskal etxean.
2013/06/12
Buenos Aires probintziako Universidad Nacional de La Platak (UNLP) iragarri duenez, bertako Zuzenbide eta Gizarte Zientzien Fakultateak' Estaturik gabeko Nazioen Behatokia' sortu du. María de las Nieves Cenicacelaya abokatuak zuzenduko du behatokia eta aurkezpena datorren asteko asteartean izango da La Platan. Behatokiak webgunea du martxan eta aurki hasikoomen da hilero buletina argitaratzen.
2013/06/12
Iragan urteko uztailean zuzendaritza berritu zuen Kubako Euskal Etxeak, eta, harrezkero, jo eta su dihardute elkarteko arduradunek euskal etxe historiko hau suspertzeko ahaleginean. Renato Garcia Egusquiza presidenteak azaldu digunez, elkarteak datozen urteetarako hartu duen erronka nagusienetakoa egoitza egokia lortzea izango da. Horrela, jarraipena eman ahalko die iaz hasi zituzten euskara ikastaroei, eta kultur ekitaldiak, aurkezpenak, mintzaldiak eta gizarte topaketak antolatzeko aukera izango du. Etorkizunerako asmoen artean Kubako euskal eraikin historikoak berreskuratzea aipatu du Garcia Egusquizak; hala nola, Habanako Jai Alai frontoia.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
