euskal diaspora eta kultura
2013/07/04
Hirugarren urtez jarraian eskainiko da Udako Ikastaroen baitan "Excellence in Basque Studies" delakoa, UPV/EHUk, Etxepare Institutuak eta Euskara Errektoreordetzak antolatuta. Ikastaroaren helburua atzerriko unibertsitateetan euskara eta euskal kultura irakasleak trebatzea da. Ekitaldiaren egitaraua oso zabala da eta bi egunez zenbait adituk mintegi teorikoak eta praktikoak emango dituzte.
2013/07/04
Carlos Gabilondo adituaren eskutik Euskaltzaleak-ek antolatzen duen zine zikloak gonbidatu berezi bat izango du uztailaren 6ko emanaldian. Izan ere, ‘Sukalde Kontuak’ bere filmaren aurkezpenean izango da Etxepare Institutuko zuzendaria ere baden Aizpea Goenaga. Hitzordua etzi da, larunbatean, iluntzeko 8etan, Bernardo de Irigoyen kaleko 826. zenbakian. Berri honekin batera, euskaltegiak iragartzen du uztailaren 12an Euskadiren Argentina-Mercosurrerako Ordezkaria den Sara Pagolak hitzaldi bat eskainiko diela etxeko kide eta lagunei.
2013/07/04
Iragan martxoan aurkeztu zen ofizialki Agirre Lehendakaria Center (ALC), gizarte zientzien esparruan kokatzen den diziplinarteko ikaskuntzen zentroa. Bere helburua, besteak beste, euskal gizartearen eraldaketa sozio-ekonomikoaren eredu arrakastatsua zabaltzea eta partekatzea da. Ekimenaren sustatzaile dira Euskal Herriko Unibertsitatea, Washingtoneko George Mason Unibertsitatea eta New Yorkeko Columbia Unibertsitatea. Azken honetan irakasle izan zen Jose Antonio Agirre lehendakaria, New Yorken erbestean eman zituen urteetan (1941etik 1946ra). ALCko arduradunek ekimenari buruzko aurkezpena emango dute larunbatean Euzko Etxean.
2013/07/03
Zozketa berria antolatu du EuskalKultura.com-ek bere irakurleentzat: bi pertsonentzako bi gau luxuzko logelan, gosariak eta afari bat barne Argentinan, Pampako Macachin hiriko Euzko Alkartasuna euskal hotel historiko berritu berrian. Parte hartu nahi baduzu, bidal iezaguzu email bat ekainaren 24a baino lehen galdera soil honi erantzunez: zein da zure ustez Euskal Herriko herri edo hiririk politena, eta zergatik. Erantzunak bidaltzeko epea uztailaren 23an gauerdian bukatuko da, Euskadiko orduan.2013/07/03
Bilboko La Taller grabatu galerian ikusgai da Eunkang Koh artista korearraren "The Human Shop" erakusketa. Bide luzea egin dute artelan hauek Bizkaira heldu aurretik, Renoko Unibertsitatetik pasa baitziren. Nevadako Center for Basque Studies-en bisitan zela ezagutu zuen La Taller-ko Maite Martinez de Arenaza sortzaileak Koh, eta bien arteko arte trukearen emaitza da erakusketa. Abuztuaren 9a arte egongo da Bilbon.
2013/07/03
Nafarroako jai famatuenetarako hiru egun besterik falta ez direla, Argentinako Nafar Etxeetan ere dena dago prest txupinazorako. Elkarte batzuetan bi astez luzatuko da ekitaldi programa; beste batzuetan, asteburu bakarrekoa izango da. Edonola ere, bat egingo dute munduan zehar Diasporak egingo dituen beste hamaika ospakizunekin. EuskalKultura.com-eko artikulu honetan Argentinatik, Bolivar, Buenos Aires, Mar del Plata, Mendoza eta Rosarioko Nafar Etxeen ospakizunen egitaraua.
2013/07/02
Jai giroa bizi da dagoeneko Elkon, Euzkaldunak Euskal Etxeak urtero antolatzen duen 50. National Basque Festival jaialdia noiz hasiko zain. Mende erdia daramate elkotarrek Oesteko euskal jairik ezagunenetako bat antolatzen; izan ere, festak oihartzun berezia izan du zenbait urtez amerikar komunikabideetan, bertan egiten zen entzierroa dela eta (benetako zezenekin!). Aurten ez da horrelakorik izango, baina bai euskal dantzak, mus txapelketa eta jota eta irrintzi lehiaketa, besteak beste. Euskal Herriaren zatitxo bat, animatuena, Nevadako basamortuaren bihotzean.
2013/07/02
Munduko euskal komunitateetan euskararen presentzia bermatzeko helburua duen Euskara Munduan proiektua erritmo onean ari da aurrera. Urtarrilean trebatzen hasi zen Hego Amerikako irakasleen taldeak bere bigarren ikastaro trinkoa izango du orain, uztailaren 20tik 27ra. Neguko barnetegi honen egoitza Rosarioko Zazpirak Bat Euskal Etxea izango da eta bertan bilduko dira Argentina, Brasil, Txile eta Uruguaiko 30 bat ikasle. Euskara Munduan proiektua HABE Institutuak sustatzen du, elkarretaratzea antolatzeko ardura FEVA eta euskal etxe anfitrioiarena izanik.
2013/07/01
Bozkarioz jaso zuen berria eta bozkarioz ospatu du Kolonbiako Antioquia eskualdean bertako Gure Mendietakoak EEak Eusko Jaurlaritzak elkartea ofizialki onartu izana. Gure buletina pixkat aurreratu omen zen eta, EEko Catalina Fernandez lehendakariak dioenez, "EuskalKultura.com-en bidez jakin genuen berria. Eskertu nahi dizuegu eta zorionak eman egiten duzuen lan handiarengatik, gu etengabe eguneratzeagatik". Hala diosku, euren engaimendua berretsi eta "euskara, euskal dantzak eta Antioquiako euskal presentzia historikoari buruzko ikerketa eta kultur sustapena" bultzatzen segituko dutela baietsiz.
2013/07/01
Arrakasta handiz burutu ziren Rosarioko Santa Rosa de Lima eta Perpetuo Socorro elizetan Pascual Barturen Uriarte organistak emandako kontzertuak. Zazpirak Bat Euskal Etxearen eskutik, musikari bizkaitarrak euskal jatorriko konpositore erromantikoen obrak jo zituen. Errezitalei amaiera emateko, berriz, ‘Gora ta Gora Euskadi’ abestia jo zuen, publikoak zutituta letra kantatuz laguntzaile. Rosarioko egonaldian, saio berezi bat eskaini zion, bera gonbidatu, 'Euskaldun hitza-Gora Euskal Herria' irratsaioak.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
