euskal diaspora eta kultura
2017/12/14
Euskara bezala, euren hizkuntza ere Europako ez-indoeuropar bakarretakoa da eta horrek interes berezia sortzen die euskara eta euskaldunekiko. Xila Pihlstrom eta Mika Marenk Finlandiakoak dira eta 'Suomitar' euskal-finlandiar elkarteko kide. Sorreratik, elkartearen lehentasuna euskara-suomiera hiztegia egitea izan zen, 2012an lortu zuten arte. Aise moldatzen dira biak bi hizkuntzotan. Ospakizunetan dabiltza, abendu hasieran Mendea bete baitzuen Finlandiak herri independente gisa. Maite Alustizaren elkarrizketa Berrian.
2017/12/14
Viedma eta Patagoneseko Aberri Etxea eta Azulgo Gure Txokoa euskal etxeetako ikasle eta irakasleak izan dira Buenos Airesko Eusko Kultur Etxeak deitutako ‘Euskaraz beti Aurrera’ ipuin eta bideo lehiaketaren irabazleak. Lan sarituak Eusketxeren blogean argitaratuko dira eta irabazleek postak jasoko dituzte sariak: diplomak eta liburuak.
2017/12/12
EHAA buletin ofizialak atzo eman zuen argitara "Ebazpena, 2017ko azaroaren 27koa, Kanpoan den Euskal Komunitatearentzako zuzendariarena, 2017. urtean Euskal Etxeei eman zaizkien diru-laguntzen berri ematen duena". Gogora dezagun orotara 902.307 euro zeudela banagai, honela sailkaturik: 782.307 euro, IV, kapitulurako, eta 120.000 euro VII. kapitulurako. 84 euskal etxeri ailegatuko zaizkie sostenguak, 71 funtzionamendu, programa eta jarduera gastuetarako; eta beste 14, azpiegitura eta ekipamendurako.
2017/12/12
Gaztetan Buenos Airesko Lagun Onak Abesbatzako kide izan zen ‘Josetxu’ Larzabal, berriro ere hasi da euskaraz abesten, orain Posadas-en, Misiones probintzian, ‘Canto Abierto’ izeneko ahots boskoteko buru gisa. Larzabal harremanetan jarria da dagoeneko Posadasko 'Euskal Jatorri' Euskal Etxeko lagunekin, eta boskoteak kontzertua eskaini zien, euskal kantuak. Giroa bero bero dago, eta kantariak eta euskal elkarteak ez dute batere baztertzen Euskal Etxeko Abesbatza sortzeko ideia.
2017/12/11
Nork ez du ezagutzen AEBetan, Kalifornia eta Mendebaldeko estatuetan bereziki, "Basque" saltsa, haragia eta arraina erretzeko saltsa arrakastatsua? Saltsa, Maderan egoitza zuen "Basque Company" delakoak ekoizten zuen, Raymond edo Ramon Ylarregui emigrante nafarrak sortutako enpresak, 2015ean saldua. Ramon-en heriotzaren berria iritsi zaigu orain. Bere aldeko errosarioa gaur astelehena egingo da arratsaldeko 6etan Maderako Farewell Funeral Chapel-en; elizkizuna, berriz, bihar asteartea, goizeko 10etan, Shrine of St. Therese elizan, Fresnon.
2017/12/11
Urtero bezala Azokako bost egunak di-da batean joan dira eta konturatu orduko ateak itxi ditu dagoeneko kultur hitzordu honen 52. edizioak. Diasporaren presentziak protagonista berezi bat izan du aurten, lehenengoz standa ipini baitu Basque Global Network ekimenak, munduko euskal komunitatea harremantzea helburu duen Eusko Jaurlaritzaren proposamenak. Diasporatik etorriak ikusi ditugunen artean, Nevada-Reno Unibertsitatetik, Xabier Irujo historialaria, bere azken liburuaren aleak sinatzen.
2017/12/11
Euskal Herrian, Euskararen Nazioarteko Eguna (ENE) abenduaren 3an ospatu zen. Euskararen aldeko jai hau gero eta nazioartekoagoa da, munduko bazter askotan egiten baitira ekitaldiak. Izan ere, euskararen hotsak Rio de la Platara eta Andeetara ere iritsi dira bertan hizkuntza ikasten eta irakasten duten lagunei esker. Bertan, abenduaren 3an hasita hilaren 17raino luzatuko dira ospakizunak, ekitaldi berean urte amaiera ere ospatuko duten hainbat euskal elkartetan.
2017/12/08
Durangoko 2017ko Azokarako dantzazaleen erosketa zerrenda osatu dute Dantzan.eus-eko lagunek, informazioa baliatu nahi duten dantzazaleen lagungarri. Gure irakurleentzat ere baliagarri izan zitekeelakoan, artikulua eta zerrenda bera hona ekarri dugu. Durangora joan behar baduzu, hementxe daukazu, erosketen gidari. Eta joaterik ez baduzu, hona seguruenik internetez edo bestela ere lortu ditzakezun izenburu eta emaitzen zerrenda.
2017/12/08
Bertan da larunbata, eta heldua da beraz, Iparraldetik deituta, Pariseko kaleak ibiliko dituen manifestaldiaren eguna. Adostasun aski zabal batez, Pariseko Kontseiluaren aho batezko bozkaz, ehun bat pertsonalitateren sostenguz eta Iparraldeko ideologia molde askotako mila hautetsiren atxikimenduz, kale-agerpena Bakearen aldeko Artisauak elkarteak deitu du, Frantziako kaleetan sakabanatuta dauden euskal presoen hurbiltzea eta euren egoeraren nornaltzea galdeginez. Milaka jende espero dira, gehienak Euskal Herritik etorriak. Pariseko Euskal Etxeak, bi txanda afari zerbutzatuko ditu eta erromeria ere antolatu du gauean.
2017/12/07
Partaidetza bikoitza izan du aurten Pergaminoko Euskal Etxeak hiriko Udalak antolatutako 'Museoen Gaua' ekitaldian. Bonbardaketaren 80. urteurrenaren urtean, Gernikak jasotako erasoa irudikatzen duen erakusketa inauguratu zuen Lagun Onak-ek bertako Udal Museoan. Ekitaldi berean, euskal dantzak eta danborrada eskaini zituzten Euskal Etxeko lagunek INTAko Esperimentu Laborategian antolatutako bisita gidatuan.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
