euskal diaspora eta kultura
2010/12/14
Tres Arroyoseko 'Hiru Erreka' aktibitate handiko euskal etxea da. Bere proposamenak ez dira euskal komunitatera soilik mugatzen. Erakundeak herriarekin daukan engaiamendua begibistakoa da, eta agian horren ikur nagusia 'Ondare Tresarroyostarra' saria da. Hori guztia dela eta Euskararen Nazioarteko Eguneko ospakizunean jende askok hartu zuen parte, etxeko kideek eta kide oraindik ez direnek ere bai. "Euskal kultura eta euskarari buruz gutxi edo ezer ez zekitenek zerbait ikasi zuten", azaldu dio EuskalKultura.com-i Jose Luis Artuch euskal etxeko lehendakariak. "Egin genituen ekintzen bitartez, hurbildu zitzaizkigun lagunek gure kultura eta gure hizkuntza nolakoak diren ikusi ahal izan zuten", adierazi du Artuch-ek.
2010/12/14
Ez da berri bat, lan eskaintza baizik, berehala betetzekoa. Seattle-n egoitza duen konpainia batek bertan bizi den pertsona elebidun bat behar du euskara eta ingelesa menperatzen dituena, bi egun osoko lan baterako. Telefono mugikorretan esperientzia izatea eskatzen zaio, eta iphone-etan ere badauka are hobekiago. Bertan bizitzeaz aparte, estatubatuarra behar du izan edo, edonola ere, lan egoteko baimena izan, kontratua sinatuko baita. Lana Eguberriko oporren aurretik egiteko da.
2010/12/13
Azaroaren 5etik 7ra gauzatu zen Buenos Aires probintziako Marcos Paz hirian Immigranteen omenezko 11. jaia. Aurreko urteetako ohiturari jarraituz, 2010 honetan ere euskal kolektibitateak muntatutako standa bisitatutakoenetakoa izan da hiru egunez luzatu zen festan. Izan ere, euskaldunek prestatu zituzten plater tipikoek eta batez ere eurek egindako txistorrak arrakasta handia izan zuten bisitarien artean. Euskal musika ere entzun ahal izan zen Marcos Paz-en. Hirugarren urtez jarraian Arrecifesko Maral musika taldea gailendu zen jaiko tauletan.
2010/12/13
Xede gisa "Nafarroaren eta Kanpoaren arteko harreman ekonomikoak sustatzea", "enpresa nafarrei laguntzea munduan lehiatu ahal izan dezaten" eta "kanpoan bizi diren nafarrei euren kurrikuluma zabaltzeko tresna bihurtzea" aitortzen ditu, langintza horretan kanpoan bizi diren nafarren eta Foru Administrazioaren arteko biltoki bilakatuz, hauek lirateke Nafarroako Gobernuak sortu berria duen eta joan den ostiralean Gobernuko bigarren presidenteorde eta Ekonomia eta Ogasun kontseilari duen Alvaro Mirandak eta Nazioarte Garapenerako zuzendari nagusi Juan Francok aurkeztu zuten ekimenaren ezaugarriak.
2010/12/13
Joan den abenduaren 4an 'Itxaropen' Euskal Etxeak bere XII. urtemuga ospatu zuen afari erraldoi batekin. Jaia Euskararen Nazioarteko Eguna gogoratzeko eta 2010. urteari “agur” esateko ere baliatu zuten Saladilloko euskaldunek. Festak musika eta dantzak ere izan zituen osagai garrantzitsu. Ekitaldian, euskal erakundeak salgai jarritako 300 laguntza-bonuen artean zozketa egin zen eta irabazle zoriontsuari Euskal Herrira joateko bi txartel egokitu zitzaizkion.
2010/12/10
Urriaren 17an Ama Kandida euskalduna santu egin zuen Benedikto XVI.a Aita Santuak Vatikanon. Bitartean, Argentinan, La Platako 'Corazon Eucaristico de Jesus' Eskolako agintariek bertako euskal etxeko kideak gonbidatu zituzten Jesus-en Alabak kongregazioaren sortzailearen omenez Buenos Aires probintzia hiriburuan egin ziren ospakizunetara. Ohoratze programa oso bat gauzatu zen urria eta azaroan, tartean, Eucaminata izeneko ibilaldia, meza, erakusketak, euskal etxeko dantzari eta abesbatzaren emanaldiak, Teatro Argentino-ko Kamerata Akademikoaren kontzertua eta Colegio Eucaristico koruaren aurkezpena.
2010/12/10
'Antzinako' euskal genealogia eta tokiko historiaren elkarteak antolatuta, Genealogiari buruzko mintegi bat egingo da bihar Bergaran. Jardunaldiaren gai nagusia hauxe izango da: 'Genealogiarako iturri dokumentalak: Artxiboak'. Bilaketa genealogikoetarako erabilgarriak diren Euskal Herriko artxiboen berri emango dute bertan, eta horrez gain genealogian hasi nahi dutenentzako tailerrak egingo dituzte. Bestalde, Antzinako elkarteak sarean jarri du jada Antzina bere aldizkariaren azken alea. Jardunaldia zein aldizkaria libre eta kitorik dira.
2010/12/10
Mikeldi talde eno-gastronomikoak zazpigarren urteurrena bete zuen abenduaren 2an. Elkarte hau euskal gastronomiaz gozatu nahi duen euskal-mexikar talde batek osatua da eta kideak urtean hainbat aldiz elkartzen dira Mexiko DF hiriburuan eta inguruetan, mahai baten inguruan beti. Azken afari-batzordean taldeak 2010eko txostenaren balioespena egin zuen eta Jon Ruiz de Azua aukeratu zuen 2011 urterako presidente gisa. Mikeldik kide berri bat ere onartu zuen, Julen Ruiz de Azua.
2010/12/09
Olentzero motorduna, ordenagailuak zaintzen dituen artzaina, rotaflexa darabilen aizkolaria... Euskal arketipoak mende honetara ekarri ditu, ironia apur batekin, 'XXI. mendeko euskaldunak' erakusketak, eta larunbatetik aurrera ikusgai izango dira Londresen, bertako Basque Society elkartearen babesarekin. Berangoko elkarte bat da ekimenaren sustatzailea eta argazki eta bideo sorta ari dira biltzen tradizioa eta modernitatea batuz bizi den herriaren ikuspegia munduan zehar erakusteko. Abenduan Londresen izango da eta urtarrila eta otsailean Bartzelonan.
2010/12/09
Txileko zatia bertan behera gelditu ostean, aurrera darrai Argentinan Miguel Sanz Nafarroako presidentea bertara egiten ari den bisitak. Astelehenean iritsirik, asteartea izan zuen aurreneko bisita egun ofiziala eta egun horretan nafar etxeetako arduradunekin eta Argentina eta Txileko Nafar Etxeen federazioko buru den Crisanto Ayanzekin bildu zen. Hogeita hamar enpresari espainiar eta nafarrekin ere bildu zen, Buenos Airesko Klub Espainiarrean. Nafar Etxean, berriz, emanaldia eskaini zioten bertako dantza taldekoek erakundearen pilotalekuan. Atzo Rosariora pasatu zen, gaur eta bihar agenda han segitzeko.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
