euskal diaspora eta kultura
2010/12/17
Dotorezia eta euskal ikutua pitxi batean batuta ikusi nahi dituzula? Euskal tradizioari lotutako irudi eta moldeak maite duzula baina egungo gustu eta ikutu modernoaren galbahetik pasata? Bada ezpada bisita bat egin beharko diozu --Euskal Herrian bizi bazara, bederen-- larunbat honetan, abenduaren 18an, Estatu Batuetako Boisetik etorritako 'Ahizpak' enpresak ekarri dituen gustu handiko pitxi eta diseinuak ikusgai eta erosgai ipiniko dituen erakusketara. Non topatu euskal diseinu 'Made in USA' hauek? Kepa Junkeraren musika akademian, Lur Soinuak-en, Bilboko Barria Kalearen 3an.
2010/12/17
Euskal Ikasketek bere lekua izango dute urtarriletik aurrera Kalifoniako Unibertsitateak Santa Barbara (UCSB) hirian duen egoitzaren curriculumean. Bi ikastaro emango ditu Viola G. Miglio irakasleak: batetik, 'Introduction to Basque', oinarrizko euskara ikastaroa, eta, bestetik, 'Basque History and Culture', historiaurretik gaur egunera bitarteko Euskal Herriko historiari gainbegiratua. Horrez gain euskal gaiei buruzko zenbait mintegi eta hitzaldi eskainiko dituzte UCSBn, lehena 'Euskal baleazaleen masakrea Islandian (1650)' topaketa, urtarrilaren 28an.
2010/12/17
Atzoko --abenduaren 16ko-- datarekin eta e-mail bat medio, Buenos Airesko Eusko Kultur Etxea-Eusketxeko lehendakaria den Maria Elena Etcheverry de Irujo Ollok eta erakundeko idazkari María del Carmen Echevarnek Eusko Kultur Etxea, Euskaltzaleak eta Ekin Argitaletxea batzen dituen euskal egoitzaren ixtea adierazi zieten instituzioko kideei eta euskal komunitate osoari, zergatiei buruzko azalpenak emanez. Behar da esan azken bost urteetan euskal-argentinar eta euskaldun askorentzat euskal kulturaren erreferentea izan den egoitza hau joan de abenduaren 5etik dagoela itxita ondorio txar guztien, hala nola etendura eraginez euskara klaseei, tabernari, zine-zikloari, eta baita Euskal Herrira joateko bi txartelen zozketari ere. Laguntza-bonu hauei dagokienez, Eusketxeko Batzordeak zozketa abenduaren 28an, eskribautza batean egingo dela adierazi du.
2010/12/16
Hirugarren urtez jarraian, Srgentinako Udako Euskal Unibertsitateak bere ateak irekiko dizkio euskal kulturan murgildu nahi duten lagun guztiei. Aurtengo ikastaroa otsailaren 1etik 11ra luzatuko da eta aurreko edizioetan bezala Euskal Echea Institutuko hiriburuko instalazioetan burutuko da. Eskolak emateko ardura gai bakoitzeko aditu batek izango du eta gaiek euskaldunen herriko hainbat arlorekin zerikusia izango dute. 2011ko edizioan parte hartzeko izena eman behar da Euskal Echea Institutuko egoitzan, Sarandi kaleko 735 zenbakian, 10etatik 12etara edo 14etatik 16etara.
2010/12/16
Laura Nobile de Abarrategui genealogista eta Arrecifesko Euskal Etxeko kideak "Semeak ahantzi nahi duena bilobak gogoratu nahi du" izenburupean joan den asteko asteazkenean emandako hitzaldiak oihartzuna lortu zuen Trenque Lauquen-en, herriko zenbait gizataldetako kideen arreta eta presentzia bilduz. Bertako Euskal Sustraiak Euskal Etxeak antolaturik egin zuen Nobilek solasaldia, astean zehar Pehuajó eta Suipachan egin zuen bezalaxe, eta aitzinetik Cordoba, Olavarria eta beste euskal etxe batzuetan egin legez, beti ere FEVAren kultur eskaintzaren baitan.
2010/12/15
'Olentzero begi gorri, fun, fun, fun' kantatuz hartu zuten joan den igandean Boiseko neska-mutilek Gabonetako euskal jeinua Boiseko Euzkaldunak Euskal Etxean egin zen festan. Eta gogotik kantatu ere! Henar Chico boisetarrak sareratu duen bideo honetan ikus daiteke Boiseko haurrek zer nolako ilusio eta irrikaz bizi izan zuten momentu magiko hori. Euskal Herrian zein Diasporako edozein bazterretan horrelakoak asko ikusiko dira datozen egunetan, baina milesker Henarri une eder hau interneteko euskaldunekin partekatzeagatik!
2010/12/15
Aurten gauzak aurreratu egin dira eta Eusko Jaurlaritzak Euskal Etxeentzako 2011rako dirulaguntza deialdia abendu hondarrean argitara ematea buletinean, Euskal Herriko Agintzaritzaren Aldizkarian, aurreikusten da. 2010eko deialdi orokorrari zein premia larrian daudenei zuzendutakoari dagokienez, behar ziren tramiteak burutu ondoren, lehenengo ordainketak datorren urtarrilean egingo dira seguruenik.
2010/12/15
Eusko Jaurlaritzak atzo astearteko Gobernu Kontseiluan bi euskal etxe onartu zituen eta sartuko ditu Euskal Etxeen bere erregistro ofizialean, biak Uruguain. Bat hasi berria da, San Joseko Euskal Etxea, izen bereko departamendu eta hirian kokatua; eta bigarrena, ostera, euskal etxe historiko bat, Montevideoko Centro Euskaro delakoa, urte batzuetan ofizialtasuna galdu ondoren, barruko arazo batzuk izan ondoren berriz ere munduko euskal etxeen zirkuitora itzuli dena.
2010/12/15
“Euskararen alde, bideoak; euskararen alde, kartelak; euskararen alde, postalak; euskaren alde, zuek eta guztiok” zioen Mar del Platako Bigarren Mendeurreneko Euskal Asteko lehiaketetan parte hartzeko gonbiteak. Euskal etxeetako euskara ikasle zein irakasleek lan ederrak egin zituzten eta ondorioz, merezitako sariak jaso. Mar del Platan, Euskal Asteko azken bazkarian, bertako Denak Bat Euskal Etxeko lehendakari Jose Martin Azarlozak, Etxepare Institutuko zuzendaria Aizpea Goenagak, HABEko teknikari Jose Francisco Zinkunegik, Mónica Usubiaga eta Esteban Capurro euskara irakasleak eta bertako euskal etxeko lehendakari Ana Irigoyen-ek izan zuten sariak emateko ardura [Argazkiak EuskalKultura.com].
2010/12/14
Lehenengoz legealdi honetan, atzo bildu zen Gasteizko Lehendakaritzan Jaurlaritzaren Euskal Gizatalde gaietarako Aholku Batzordea, Lehendakariari arlo honetan aholku ematea xede duen organoa eta, Gobernuaren sailetako, Aldundietako eta bestelako instituzioetako ordezkariekin batera munduko euskal etxeetako hiru ordezkari biltzen dituen batzordea, besteak beste lau urtean behin egiten diren Euskal Gizataldeen Mundu Kongresuetan hartutako erabaki eta gomendioen segimendua egitea helburu duena. Patxi Lopezek bildutakoei Jaurlaritza krisi garain honetan euskal etxeen eta munduko euskaldunen alde egiten ari den ahalegina azpimarratu zien.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
