euskal diaspora eta kultura
2011/05/03
Erretiroa hartzekotan da Valladolid-en (Espainia) Jose Luis Aramayo, ibilbide luzeko kirolaria, Bizkaiko Ondarroan jaioa, 4 urte zituela familiarekin Argentinako La Platara aldatua eta bertan hazia. Buenos Aires probintziako hiriburuan ekin zion kirol karrerari, La Plata Deportiboan, Atenas Klubean eta La Platako selekzioan, ondoren Europara itzuli eta zenbait taldetan aritzeko, lehenik atezain eta masajista ondoren. "La Platara iritsi nintzenean erdararik ez nekien, euskaraz bakarrik. Han 'argentinera' ikasi nuen", dio, La Platan bi anaia, lau iloba, hiru iloba txiki eta lagun asko dituela azaltzen duen bitartean.
2011/05/02
Corpus Christi-ko Eusko Etxea-k, Argentina iparraldeko Misiones probintzian, ekitaldi batera deitu du gaur astelehen arratsalderako, euskal etxeak Gipuzkoako Foru Aldundiaren laguntzarekin eraiki duen eraikina emango baitio Tavá Mirí Komunitateari, mbya guarani komunitateen eskola izan dadin. Horretarako, Argentinan da Iñaki Galdos Gipuzkoako Foru Aldundiko Kanpo Ekintza eta Kirol diputatua, bertatik egindako gonbiteari erantzunez. Galdos iragan aste amaieratik dago Argentinan eta larunbatean, izan ere, La Platatik segitu zuen, bertako Realaren Peñako kideekin, talde gipuzkoarrak eta Bartzelonak jokatu zuten futbol partida, Reala garaile, 2-1 emaitzarekin.
2011/05/02
Patinez, txirringaz, oinez eta nola ez, korrika, ibili ziren hirian zehar Necocheako euskaltzaleak euskararen aldeko jaia ospatzeko. Korrikaren 17. edizio honetan, Euzko Etxea-ko kideek bat egin zuten Euskal Herriko 'euskalakariekin' eta eskuz esku pasatu zen lekukoaren mezua irakurri zuten ibilaldiaren bukaeran euskal etxearen egoitzaren aurrean. Pazko igandean, berriz, hiriko Dardo Rocha plazan bildu ziren Necocheako euskaldunak, oraingoan Aberri Eguna eta Gernikako Bonbardaketa oroitzeko. Hona hemen argazki eta bideoak.
2011/05/02
Necocheakoarekin batera, Argentinan, joan den larunbatean Estatu Batuetan, Idahoko Boisen, egindako ekitaldia izan da Korrika 17ri, nazioarteko ekitaldiei dagokienean, amaiera jarri diena. Bi urtean behin Euskal Herrian --eta gero eta pisu handizgoz Diasporan ere-- euskararen alde egiten den lasterketak arrakasta polita lortu zuen Boisen, Dave Bieter alkatea ere partaide, eta 118 pertsonak izena eman zutelarik, AEBetako jendetsuena ere izan da. Arrakasta ikusita, Korrikak bere lekua topatu du dagoeneko Boiseko euskal egutegiaren barnean, Izaskun Kortazar NABOko Euskara koordinatzaileak EuskalKultura.com-i adierazi dionez.
2011/05/02
Joan den ostegunean, apirilaren 28an, Urteroko Batzar Nagusia egin zuen Paraguain, Asuncion hiriburuko Jasone Euskal Etxeak. Bildutakoek iazko balantzea aztertu eta onetsi zuten eta baiezkoa eman zioten Galo Eguez buru duen Zuzendaritza Batzordeak aurkeztutako kudeaketa-lanari. Hilabete barru, ekainaren lehenengo egunetan euskal etxeak aurreneko aldiz antolatuko duen Euskal Kultur Astea ere hizketagai izan zen, baita elkarteak ematen dituen euskara eskolak, eta ekimen berriak garatzeko posibilitateak, besteak beste, gazteak erakartzeko asmoarekin.
2011/05/02
Oldarra abesbatza Quebec-en da gaur, Kanadako probintzia frantses honetan hiru kontzertuko birari ekiteko. Lehenengo emanaldia gaur bertan egingo dute biarriztarrek, eta bigarrena etzi asteazkenean, Quebec hiriko Antzoki Nagusiko aurtengo musika denboraldia itxiz. Bost eguneko bira laburra bukatzeko, ostegunean Montreal inguruan dagoen Repentigny herrian ariko dira eta, agian, baita Euskaldunak Euskal Etxean ere.
2011/05/02
Eusko Jaurlaritzaren Kanpo Harremanetarako idazkari nagusia, Guillermo Echenique, bisita ofizialean izan da apirilean Mexikon eta Kolonbian. Bidaia hauekin bi herrialdeekin eta bertako euskal gizataldeekin harremanak sendotzea izan da helburua. Mexikon, Echeniquek Sukalde eta EmpreBask elkarteen aurkezpenean hartu zuen parte, eta Euskal Etxean izan zen, Lourdes Arrechea presidentak gonbidatuta. Kolonbian Bogota eta Medellineko euskal etxeetako kideekin bildu eta herrialde honetan dauden euskal enpresetako ordezkariekin bilera egin zuen, besteak beste.
2011/04/29
Lander Santamariak aurreratzen zuen albiste lazgarria arratsalde honetan Elizondotik, Baztango kronikari grafikoa den bere lagun Ondikol-ek esanik: Alberto Alday hil da. Bat baino gehiagok pentsatu du orduan, arraroa zela azken hilabete honetan bere iruzkinik ez irakurri izana Vascosmexico posta-zerrendan, 'guztia' azken hilabete honetan gertatu baita ia di-da. Linfoma batek, beste zenbait gauzarekin konplikaturik, eraman du, besterik gabe eta oharkabean. Baztan eta Mexiko maite zituen Albertok, eta Mexikoko diaspora baztandarra gutxik bezala ezagutzen zuen. Ohar hau presaz egin dugu, baina egin nahi genuen, hildako adiskidea gogoan.
2011/04/29
Liburu munduari hiri irekia du leloa apirilaren 20tik maiatzaren 9ra luzatuko den Buenos Airesko Nazioarteko Liburu Azokak, eta Hego Ameriketako kultur ekitaldi erraldoi honetan, idazle euskal argentinarrek leku berezia izan dute aurten. Juan de Garay Fundazioak argitaratutako lau testu aurkeztu dira herenegun Azokako Adolfo Bioy Casares Aretoan. Aurreko larunbatean, berriz, eta Dunken Argitaletxearen standean, 'Andrea Moch, artista baten bizipenak' aurkeztu zuen bere egile Angeles de Dios de Martinak. Sukaldaritza ere ez da letren jai honetatik at geratu: Marita Echavek bere 'Euskal baserrietako sukaldaritza'-ren aleak sinatu zituen Juan de Garay Fundazioak eta FEVAk kudeatzen duten standean.
2011/04/29
Aberri Egunaren ospakizunak, ohi bezala, oihartzun zabala izan du Diasporan. Aurten, gainera, zenbait euskal etxek proposamen berri eta originalekin ospatu dute jaia. New Yorkeko Eusko Etxean, adibidez, barre galantak egin zituzten Ruth Guimerá antzezlariak euskaraz eskaini zuen bakarrizketarekin: 'Euskal marketina' zuen izenburua lanak. Txilen, Santiagoko Gure Etorkia elkarteak San Nicolas muinora igoera antolatu zuen eta ezusteko ederra izan zuen, gainera: azken orduan txistulari espontaneo bat bildu zitzaien, ekitaldiaren berri EuskalKultura.com-en bitartez jakin ondoren, berak aitortu zienez.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
