euskal diaspora eta kultura
2011/06/15
Euskal sukaldaritzaren astea izan da joan den astea Boisen, bertako Cenarrusa Fundazioak, Bizkaiko Foru Aldundia lankide, hamaikatxo ekitaldi bildu dituen programa garatu baitu hiriburu idahotarrean Bizkaiko lau sukaldari ospetsu --Jabier Gartzia, Daniel Garcia, Iñigo Ordorika eta Sabin Arana-- euskal sukalde modu eta produktuen erakusgarri. Edarien arloan, Mikel Garaizabal sumillerra boiseratu zen, honek ere eskola eta hitzaldiak eta, besteak beste, Bizkaiko Txakolinaren dastaketa eskaintzeko gastronomiazale amerikarrei.
2011/06/15
Munduan 14 zortzimilako igo zituen lehenengo emakumea izan den 37 urteko tolosar honi egotzi zaio 'Euskal Herritar Unibertsala' saria 2010eko edizioan, eman ere ekainaren 28an emango diolarik Lehendakariak Gasteizen Lehendakaritzan egingo den ekitaldian. Epaimahaikoek Pasabanek Euskadiren izena ludi osoan eraman izana eta "diziplina, ahaleginean irautea eta irrika" bezalako balioekin lotzea azpimarratu dute, "helburuak gainditzeko eta etengabe jarduteko" adibide bilakatuz. Jaurlaritzako Kanpoko Euskal Herritar eta Gizataldeentzako zuzendari Julian Celayak eta Euskadiko Kutxako Komunikazio zuzendari Juan Cid-ek eman zuten erabakiaren berri astelehenean Gasteizen.
2011/06/14
Orotara 173 izen-emate gertatu dira Argentinan hasi berria den 2011eko ikasturte honetan Euskara eta Euskal Kultura ikasteko La Platako Unibertsitate Nazionalean (UNLP), arrakasta aipagarria, horietarik 140 lehenengo mailan, 25 bigarrenean eta 8 hirugarrenean. Lehenengo mailakoen kasuan horrek klaseak hiru egunetan ematera behartu du aurten euskara irakurle (irakasle) den Idurre Lekuona lizentziatu errenteriarra. Klaseen inaugurazioan UNLPko Erakunde Erlazioetarako zuzendari Pedro Elizalde, Cesar Arrondo UNLPko irakasle eta euskal irakurletzako segimenduko batzordekidea eta Idurre Lekuona bera izan ziren partaide.
2011/06/14
Brasilgo Fortaleza hirian aste oso batez Euskal Herriko zineari tarte berezia egin ostean, bihar bukatuko da Ceara Nazioarteko Zinemaldia. Jaialdiak Begiradak izeneko atalean euskal luzemetraia, labur eta dokumental sorta aurkeztu du, Unai Guerra produktore eta adituak bilduta. Zinemaldiak gonbidatuta, Brasilen izan da Jon Garaño zuzendari gipuzkoarra, '80 egunean' filma aurkezteko.
2011/06/14
Garai berriak bizitzen ari dira Macachingo euskaldunak joan den uztailetik. Izan ere, duela urtebete euskal etxearen egoitza den hotelaren kudeaketa berreskuratu ondoren, zuzendari batzorde berria osatu zuten eta euskal etxea berpizteko helburuarekin buru belarri hasi ziren lanean La Pampa probintzian dagoen herri honetako lagunak. Gogor ekin zioten joan den uztailean paregabeko erronka zirudienari eta gogor jarraitzen dute gaur egun, proiektuak betetzen. Mus txapelketa, euskara klaseak eta egoitzaren birziklatzea dira 'Euzko Alkartasuna'ko kideek aurrera daramatzaten proiektuetako batzuk.
2011/06/13
Euskal kultura nazioartean sustatzeko eta hedatzeko xedea duten kultur programa edo jarduerei diru-laguntza berezia emango die aurten Etxepare Institutuak eta 88.676 euroko aurrekontua du prest xede honetarako. Eskatzaile bakoitzak jaso dezakeen laguntza 13.391 eurokoa izango da gehienez. Deialdiak arlo eta formatu askotariko adierazpen kulturalak kontuan izango ditu, beti ere, euskal kultura euskararen eremu geografikotik kanpora sustatu eta hedatzeko xedea dutelarik. Eskabideak aurkezteko epea abuztuaren 11n itxiko da.
2011/06/13
Damoklesen ezpata bezala ibili dira mozketa bortitzak Nevadako Unibertsitatearen aurrekontuaren gainean, eta sistema horren barnean da Renoko Euskal Ikasketa Zentroa. Egiari zor, krisialdia gogor ari da AEBetan eta bereziki ari da kolpatzen Unibertsitatea eta hezkuntza sistema. Mozketak behar dira egin, eta politikari askok hor egin nahi diztuzte. Nevadan, duela hilabete aipatzen genuen orriotan Estatuak aurrekontuaren heren bat kendu nahi ziola Unibertsitateari. Zorionez, gobernadorea eta legegileak akordio batera heldu dira 2011ko saioak bukatu baino bost egun lehenago.
2011/06/13
Euskal Herrian sorburua daukaten soinuak ez dira hain urrunak Argentinan, Baietz-i esker; izan ere, 2008an eta Cordoba hiriburuan jaio zenetik, taldeak euskaldunen tresnak eta musika eramaten ditu Argentinako hainbat bazterretara. Hitzaldi, tailer eta kontzertuen bidez, lau mutil cordobatarrok musikaren munduan ez ezik, euskal tresna, konposizio eta euskaran ere murgiltzeko aukera ematen diete beren jarraitzaileei. Horrelaxe sentitu dute Arrecifesen ekainaren 4an Euskaldunak Denak Bat-era hurbildutakoek. “Musikari gazteek emandako tailer eta hitzaldiak interesgarriak eta baliagarriak izan zaizkigu oso; eta kontzertuetan zein ondoren sortutako giroa gure bihotz euskalduneraino heldu zaigu”, aitortu dio euskal etxeko kide den Laura Nobilek EuskalKultura.com-i.
2011/06/13
Aurtengo irailean Euskal Herriko Unibertsitateak abian jarriko du Eleaniztasuna eta Hezkuntzari buruzko master berri bat. Holandako Groningengo Unibertsitatearekin batera antolatu du EHUk masterra eta burutzen duten ikasleek doktoregoa egiteko aukera izango dute. Masterrak eleaniztasun eta hezkuntza arloan ikertzaile kualifikatuak bihurtuko ditu ikasleak eta pentsamendu kritikoa eta trebetasun analitikoak bultzatuko ditu.
2011/06/13
Bertsozale elkarteak sarean jarri ditu Xenpelar Dokumentazio Zentroaren edukiak eta bertsolaritzari buruzko datu basea aberatsa plazaratu du. Atari berri honen helburua bertso munduari buruz maila guztietako ikerkuntza bultzatzea da eta, aldi berean, zaletuei, bertso eskoletako ikasleei zein bertsolaritza sakonago ezagutu nahi dutenei informazioa ematea. Bertso saioen agenda, bertsolarien biografiak, txapelketen emaitzak, doinutegia eta bertso sortak izango dira bertan eskuragarri, besteak beste.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
