euskal diaspora eta kultura
2011/10/17
Udaberriko aroa ez da beti eguzkitsua eta epela, batzutan aldakorra izaten da eta ezegonkortasun horren biktimak izan ziren sanpedrotarrak euren jaian. Eguraldi txarra medio, XIX. Gizataldeen Jaiaren lehenengo egunean egitekoak zirenak atzeratu behar izan ziren, asteburu luzeko azken bi egunetan banatuz, hainbat ikuskizun eta kultur proposamenen kasuan. Baina horrek ez zuen festaren giroa ilundu. Herritarrek eta turista ugarik bisitatu zuten Pasealeku Publikoan egin zen jaialdia eta Ongi Etorri euskal etxearen standean plater ederrak bildu ziren dastagai.
2011/10/14
Ipar Ameriketako euskal etxeetan euskara irakaskuntza aurrera egiten ari da, emeki-emeki, NABO federazioak, HABEk eta tokian tokiko irakasleek egiten duten ahaleginari esker. Asteburu honetan, AEBetako zenbait euskara irakasle lantegia egiten ari dira Boisen; helburua esperientziak trukatzea eta klaseak ahalik eta dinamikoen eta eraginkorren egiten ikastea da. Lantegiaren laugarren edizioa da aurtengoa eta bertan, besteak beste, NABOko euskara koordinatzaile Izaskun Kortazarrek aurreko 4 urteetan (2008-2011) egindako lana berrikusiko du eta lortutako helburuak baloratuko ditu.
2011/10/14
Euskal etxeko Zuzendaritza Batzordearen proposamenari jarraituz, ehun eta hogeitik gorako lagun elkartu ziren joan den irailaren 24an La Platako Euzko Etxea-n, Dantzari Ohien Festa izeneko topaketan. Ordu txikiak arte luzatu zen jaian, dantzari gazteak eta ez hain gazteak Toki Alai aretoko pistan nahastu ziren mota askotako dantzari. Bide batez, Denak Bat taldean noizbait aritu ziren eta gaur egun La Platatik urrun daudenek agurrak helarazi zituzten festara, Argentinako zenbait txokoetatik eta baita Ipar Amerika eta Europatik ere. Jaiaren arrakasta ikusiz, urteroko hitzordu bihurtu nahi dute Dantzari Ohien Festa euskal etxeko arduradunek.
2011/10/14
Irailaren 27tik urriaren 2ra luzatu da Argentinako San Juan probintzian Kultura Herrikoiaren eta Liburuaren III. Azoka. 'Sarmientoren jaiotegunaren bigarren mendeurrenean, integrazio eta aniztasun-heziketaren alde' lelopean, eskolak, artistak, liburutegiak eta probintziako erakunde ugari bildu ziren kultura zabaltzeko helburua duen ekitaldi honetan. Eusko Etxea-ko Pio Baroja liburutegiak ordezkaturik, San Juango euskaldunek ere hartu zuten parte Trinidad Klubean burutu zen elkarretaratzean. Euskal etxeko arduradunek "Sarmientoren begirada euskaldunak buruan" izeneko erakusketa muntatu zuten euskal standean.
2011/10/13
Aurten ere giro bikaina bildu zuen Rocklingo Euskal Etxeak urteroko bere Bestara eta larunbatean McBean parkera hurbildu ziren lagunek egun ederra igaro zuten. Iparreko Ibarra elkartearen jaian denetarik izan zen: mus txapelketa, dantza erakustaldiak, umeentzako jokoak, herri kirolak, janari ona eta laguntasuna. Gau partean dantzaldia egin zen, Jean Flesher eta Rene Caballerok girotuta. Bestara hurbildu zenetako bat John Garamendi hautetsia izan zen, Kaliforniako 10. barrutiko ordezkaria AEBetako Kongresuan.
2011/10/13
Tradizio luzea du Argentinako herri batzuetan Arantzazuko Amarekiko debozioak. Euskal Herritik ekarrita, Gipuzkoako zaindariaren irudia Hego eta Ipar Ameriketan zehar hainbat elizatan dago kokatuta bere momentuko euskal etorkinen fedea islatuz. Denbora pasata ere, debozioa ez da murriztu eskualde horietako batzuetan eta hara non Argentinan segitzen duten Ama Birjina omentzen bere egunean, irailaren 9an. Victoriako Haritz, Arrecifeseko Euskaldunak Denak Bat eta Chivilcoyko Beti Aurrera euskal etxeek hartu dute parte euren herrietako ospakizunetan.
2011/10/12
Gaur bertan abiatuko da Frankfurteko Nazioarteko Liburu Azokaren 2011eko edizioa, eta urtero legez euskal liburugintzak lekua izango du bertan, Eusko Jaurlaritzak eta Etxepare Institutuak sustatzen duten standaren bidez. Bertan izango dira Euskal Editoreen Elkartea eta Euskadiko Editoreen Elkartea, euskal liburuen nazioarteko presentzia indartzeko helburuarekin. Horrez gain, eta euskal literaturgintzaren ikuspegi orokorra emateko, bertan izango dira bihar eta etzi Jon Arretxe eta Fernando Morillo idazleak ere. Etzi euskal literaturari buruzko solasaldi batean parte hartuko dute, Etxepare Institutuko Mari Jose Olaziregirekin batera.
2011/10/11
Orain artean posible zen edukiak ingelesez segitzea webgunearen ingelesezko bertsioaren bidez, baina ostegun honetatik aurrera EuskalKultura.com-ek buletina ere plazaratuko du ingelesez. Diaspora ingelesdunean lagunik baduzu, pasa iezaiozu abisua. Izan ere, gehienbat AEBetatik, Kanada, Erresuma Batua eta Australiatik jaso ditugun eskaerei erantzunez erabaki dugu pauso berri honetan ahalegintzea.
2011/10/11
Iragan urriaren 7an hasi eta datorren igandea arte luzatuko dira Patraix auzoko herriko jaiak, aurten Euskal Herria eta euskal kultura ardatz dutela. Auzo honetan kokatu da berriki Valentziako Laurak Bat euskal elkartea eta partehartze oso aktiboa izan du jaien antolakuntzan, Eusko Jaurlaritzaren laguntzarekin. Gaur Patraixen izango da Errenteriako Ereintza dantza taldea, emanaldia ematen, eta datozen egunetan Madrilgo Euskal Etxeko Orfeoia eta Iñaki eta Inaxio Perurena harrijasotzaileak ere ariko dira.
2011/10/11
Atzo Bruselara hasitako bi eguneko bisitarekin --zenbait bilera, Tolosako Orfeoiaren kontzertu bat eta hiriko euskaldunentzako harrera-ekitaldi bat gauzatu zituen atzo-- eta gaur Erregioen Batzordearen aurrean europar industri politikaz egingo duen aurpezpenarekin, bidaia aldetik erabat betea izango duen asteari ekin dio Patxi Lopez lehendakariak. Izan ere, ia berehala, Estatu Batuetako Ekialdeko Kostarako astebeteko bidaia hasiko du ostiralean, ehun bat euskal enpresa eta erakundeen ordezkaritza zabal baten buru. Bidaia horren helburua euskal enpresak AEBetara hedatzen laguntzeko harremanak sustatzea da, baina horrez gain lehendakariak topaketak egingo ditu baita ere teknologi-ikerketa arloko puntako erakundeekin. Larunbatean Lopez New Yorkeko euskal komunitatearekin bilduko da Eusko Etxearen egoitzan, eta urriaren 20ean beste hainbeste egingo du Washingtongo euskaldunekin.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
