euskal diaspora eta kultura
2012/12/17
Munduan zehar harrera oso ona izaten ari da Asier Altuna zuzendariaren "Bertsolari" filma eta nazioarteko ikusle askok interes handiarekin jaso dute bertsolaritzaren mundua era poetiko eta ulergarrian azaltzen duen lan hau. Horrela izan zen ere iragan azaroaren 28an, Kaliforniako Stanford unibertsitatean. Euskara eta euskal kultura irakurletzaren baitan antolatu zen emanaldia, Euskararen Nazioarteko Egunaren karira, eta bertara hurbildu ziren ikasle zein irakasleek saioaren ondorengo galdera-erantzunen tartean gaiari buruzko jakinmin handia erakutsi zuten.
2012/12/17
Maria del Carmen Itza buru duen Balcarce’ko Euskaldunak Euskal Etxeko lagun talde batek deialdi berezi bat plazaratu du azken egunotan. Sare sozialetan eta herriko hedabidetan argitaratutako gutunean Buenos Aires probintziako herri honetako euskal etxearen egoera azaltzen da eta azalpenarekin batera gonbite bat luzatzen zaie hiriko euskal jatorriko lagunei. Oharraren helburua argia da: jendea euskal etxera hurbiltzera gonbidatzea instituzioaren bizitasuna berreskuratzeko. “Euskal Etxea Euskal Herriko kulturaren ordezkaria da herrian eta gure sorlekuarekin lotura mantendu nahi dugunon bilgunea. Baina gaur egun jende ezagatik ezin diegu lehen egiten genituen ekintzei aurre egin”, adierazten dute euskal etxeko arduradunek. Hitzordua bihar da, 20:00etan, General Balcarce klubean 17. kaleko 733 zenbakian.
2012/12/17
Eguberrietan lagun eta senitartekoei agur berezi bat helarazteko era erraz eta polita izan daiteke internet bidez postal birtualak bidaltzea. Eta are ederragoa, euskaraz, noski! Jarraian, urtero legez, sarean aurkitu ditugun euskal postalak bildu ditugu zuei eskaintzeko. Doakoak dira eta gehienak mezu batekin pertsonalizatu daitezke. Orain duzue garaia, gertu zein urrun bizi direnei Gabonak zoriontzeko!
2012/12/14
Munduko edozein bazterretik Euskal Herriko musikaz eta kontzertuetaz gozatu nahi baduzu, aukera duzu orain www.xurme.com plataformari esker. Webgune honen bitartez euskal taldeen kontzertuak zuzenean ikusi ahalko dira, streaming sisteman. "OnLive" deitu diote musikaz gozatzeko modu berri honi eta gaur bertan estreinatuko da, gaueko hamarretan, Betagarri taldearen disko berriaren aurkezpenarekin (Euskal Herriko ordua). Kontzertua ikusteko nahikoa da ordenagailua izatea; baina horretaz gain, plataformak munduko taberna, kultur-etxe eta euskal etxeei saioa pantaila handian emateko gonbitea ere egiten die. Bartzelonako euskal etxean, adibidez, gertu dute dena jada!
2012/12/14
Giro ederrean ospatu zuten Tres Arroyoseko euskal etxeko kideek urte amaierako jaia. Abenduaren 7an, 90 bat lagun bildu ziren Hiru Erreka-ko egoitzan eta pintxo eta dantzen artean, euren kopak altxatu zituzten badoan 2012ari ‘agur’ esateko. Hau ez da izan, ordea, euskal etxearen festa bakarra. Euskararen Eguna ere ospatu eta herriko Sarmiento Liburutegiaren kultur erakusketa batean hartu zuten parte Mariana Erneta irakasleak zuzentzen duen Hiru Errekako gazteen taldekoek. EuskalKultura.com-en artikulu honetan, Tres Arroyoseko euskal etxeko azken ekintzen laburpen eta argazkiak.
2012/12/14
Gabonak bertan dira eta urtero egiten dugun bezala, EuskalKultura.com-en sarean salgai diren euskal produktuen zerrendatxo bat egin dugu, norbaitek bertan lagun eta senitartekoentzat opari bat aurkituko duelakoan. Krisi garai latz hauetan aukera polita izan daiteke Euskal Herrian eta Diasporan euskal produktuak eskaintzen dituzten enpresa eta webgune txiki horiei bultzadatxoa ematea, eta, bide batez, Gabonetako opariak erostea! Jarraian duzue aurten proposatzen dizuegun zerrenda.
2012/12/13
Datorren urteko Euskal Etxeentzako dirulaguntzen deialdia abenduaren 21ean argitaratuko da ofizialki Euskal Herriko Agintaritzaren Aldizkarian (EHAA), baina Euskal Herritar eta Gizataldeentzako Zuzendaritzak edukiak sarean jarri ditu, Euskadi.net/euskaldunak webgunean eta Euskaletxeak.net atariaren bitartez, adierazi dute aipatu Zuzendaritzatik. Eskabideak aurkezteko epea otsailaren 28an amaituko da.
2012/12/13
Pasa den ostiral arratsaldean, abenduraren 7an, iritsi zen Unai Basurkok gidatutako belaontzia Puerto Madrynera. Uste baino gehiago kostatu zitzaion ontziari portura sartzea, kontrako haize gogorrak ez baitzuen sobera laguntzen. Esfortzuak merezi izan zuen, ordea, kaian ongi etorri beroaz gozatu ahal izan zutelako beste behin. Oraingo honetan, Puerto Madryngo “Etorritakoengatik” euskal etxeko kideek harrera paregabea eskaini zieten marinelei. Indarrak berreskuratu asmoz, euskal etxeak gonbidatuta, tripulazioak inguruko jaki preziatuenetako bat dastatzeko aukera izan zuen, patagoniar arkumea.
2012/12/13
Oso gaztea da Buenos Aires probintziako Mar Chiquita partiduko euskal etxea; eta gazteen indarrarekin burutu ditu 2012 urteko proiektu guztiak. Euskal Herriaren kultura zabaltzea helburu nagusia badu ere komunitatearen beharrak eta kezkak gogoan izaten ditu Izatez Harrok. Engaiamendu horrek builtzatuta, Mar Chiquita-ko II. Hezkuntza Erakusketan hartu zuten parte euskal etxeko kideek, joan den azaroan. Partaidetza urrian gauzatutako ‘Gernikako Bonbardaketa, 75. urteurrena’ erakusketaren jarraipena bihurtu zen, eta Bizkaiko herriari buruzko aurkezpenean izan ziren eskoletako neska eta mutilek oraingo kultur ekitaldian euskarazko hitz eta agur batzuk ikasteko aukera izan zuten.
2012/12/12
Iragan larunbateko gauean New Yorkeko Euskal Etxea diskoteka bihurtu zen, elkartearen aurreneko Gayaldia ospatzeko. Festa ekitaldi "historikoa" izan zen euskal etxearenrentzat, izan ere, elkartearen ia ehun urtetan egin den aurreneko gay jaia izan zen. Ron Like Hell DJ-ak jarri zuen musika eta Rowan eta David go-go boys-ek dantza mugimenduak, gau osoan gelditu gabe ibili baitziren dantzan euskal etxeko tabernako barra gainean. Festa ahaztezina izan zen, antolatzaileen esanetan, eta datorren urtean bigarren edizioa izango du, zalantzarik ez.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
