euskal diaspora eta kultura
2007/02/28
Eusko Jaurlaritzaren Gobernu Batzordeak asteartero egiten duen bilkuran atzo hartutako erabakien artean Argentinako Coronel Dorrego herriko 'Denak Elkarrekin' Euskal Etxea onetsi eta Euskal Etxeen erregistro ofizialean sartzea deliberatu zuen. Neurri honekin aipatu euskal etxea nor da aurrerantzean, Jaurlaritzak kanpoko euskal giza-taldeei eskaintzen dizkien programa eta onuren hartzaile eta eskubide-emaile izateko bere bazkideekiko.
2007/02/27
Argentinako agintariekin sinatu berri duen akordioan jasotzen denez Eusko Jaurlaritzak 216.000 euroz lagunduko ditu argentinar militarren diktadurapean (1976-1983) desagertutako euskaldunen bilaketa lanak. Lankidetza akordioa atzo bertan sinatu zuten Buenos Airesen Javier Madrazo Jaurlaritzako Etxebizitza eta Gizarte Arazoetako sailburuak eta gobernu argentinarreko Giza Eskubideetarako Idazkariak, Eduardo Luis Duhaldek. Banku Genetiko bat eta Argazki Artxibo bat sortuko dituzte akordioren arabera, eta Dokumentazio Zentro baten sorrera ere bultzatuko da.
2007/02/27
Eliteen emigrazioari buruzko eztabaida bizi batekin bukatu ziren joan den asteartean pauen Euskal-Biarnesen Emigrazioari buruzko Jardunaldiak. Ekitaldiek ehun bat lagunetik gora bildu zuten, Adrian Blázquez (Paueko Unibertsitatea, Frantzia) eta César Arrondo (La Platako Unibertsitate Nazionala, Argentina) antolatzaileen esanetan. Ekimenak segida izango du datorren uztailean, La Platan egingo den Simposium batekin. Bertan, Pauen aurkezturiko hainbat lan irakurriko dituzte.
2007/02/27
Jakina da euskal kulturak oihartzun nabarmena duela Boise inguruan, Idaho-n baitago AEBetako euskal komunitaterik azkarrena. Euskal sukaldaritzak ere arrakasta handia dauka aldeotan eta horren adierazgarri bertako zenbait jatetxek harro erakusten duten Basque kartela izan daiteke. Oraingoan, baina, euskal sukaldaritzak unibertsitaterainoko jauzia ere egin du, Dan Ansotegui Boiseko Gernika tabernako nagusiak astero BSUn eskaintzen dituen eskolak medio. Guzti horren lekukotasuna eskaintzen du AP agentziako Anne Wallace Allen kazetariak Desert News egunkarian argitara emandako artikulu batek. Hauxe artikulu laburtua.
2007/02/27
Venezuelako Euskal Etxeen Federazioak omenaldia egin zien joan den otsailaren 10ean Chirgua Aranean duela 57 urte bertara heldu ziren lehendabiziko euskal familia aitzindariei. 1950.ean heldu eta egun bertan sustraiturik segitzen dute zortzi familia euskaldun hauek. Ekitaldia Hacienda Montesacron izan zen eta Carabobo-ko eta Caracaseko Euskal Etxeetako kideak bildu ziren bertara. Ibarretxe Lehendakariak ere partu harte nahi izan zuen omenaldian eta bildutakoen aurrean irakurri zuten gutuna bidali zuen.
2007/02/26
Eusko Jaurlaritzak Argentinan diktadura militarpean desagertutako jatorri euskalduneko herritarrak topatzen lagunduko du. Hauxe izango da Javier Madrazo Jaurlaritzako Etxebizitza eta Gizarte Arazoetako sailburuak gaur Argentinara hasiko duen bidaia ofizialean landuko den gaietako bat. Madrazo gobernu argentinarreko Giza Eskubideetarako Idazkariarekin, Eduardo Luis Duhalderekin, bildu eta lankidetza protokolo bat sinatuko du. Adolfo Pérez Esquibel Nobel saridunarekin, Plaza de Mayoko Amonekin eta FEVAko ordezkariekin ere elkarrizketatuko da, besteak beste.
2007/02/26
Joan den ostiraletik hona Argia astekariaren edizio digitala, Sareko Argia, eduki berriekin jantzia dator. Berrikuntza aspaldion internet munduan bolo-bolo dabilen web 2.0 izendapenaren eskutik datoz, erabiltzaileen parte hartzea indartuz eta multimedia edukiei leku gehiago emanez. Ohiko informazioaz gain (berriak, erreportaiak edota elkarrizketak), bideoak eta musika entzuteko loturak dakartza orain webguneak.
2007/02/26
Laura Echarte ikertzaile euskal argentinarrak, Agronomian doktoratua berau Mar del Platako Unibertsitatean, LOreal UNESCO Mujeres de la Ciencia beka jaso du, 2007ko edizioan. Iñaki Aramayok Eitb24.com-eko Euskaldunak Munduan blogan azaltzen duenez, Echarte soja eta artoaren interereite sisteman oinarritzen den ikerketa egiten ari da, landatzen diren produktuen etekina hobetu ahal izateko, La Nación egunkari argentinarrari emandako azalpenetan adierazitakoaren arabera.
2007/02/23
Mexiko hirian euskal soinuak izango dira entzungai datorren martxoan, Euskal Etxeak bere Mendeurrena ospatzeko antolatu duen Musika Jaialdiaren eskutik. Ekitaldiak Euskal Herriko gonbidatu eta musikarien partehartzea izango du, horien artean Donostiako Txistulari Banda eta Jon Maia dantzari gipuzkoarraren konpainiako hainbat kide. Eurekin batera Euskal Etxeko korua eta Colegio de las Vizcaínaseko korua ere ariko dira oholtza gainean, Mexikoko euskal komunitateko kide asko bilduko dituen ekitaldi zirraragarri honetan.
2007/02/23
Raúl de La Fuente zuzendari iruñarraren Nömadak TX filmak bederatzi zinemalditan parte hartuko du, otsailaren 23tik apirilaren 5a arte. Zinemaldi hauen artean Kroaziako Zagreb Dox jaialdian edota Irlandan ospatzen den Belfasteko Jaialdia bezelako hitzorduak izango ditu Oreka TX txalapartarien bidai kronika honek. Orotara Kroazia, Estatu Batuak, Grezia, Lituania, Mexiko eta Espainian izango da ikusgai dokumentala datozen bi hilabeteotan. Hortik aurrera bere ibilbidea beste herrialde batzuetatik ere pasa daiteke, beste hamaika jaialditan parte hartzeko aukera baitauka filmak.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
