euskal diaspora eta kultura
2007/09/17
Chascomús-eko 'Zingirako Euskaldunak' Euskal Etxeak, Buenos Aires probintzia argentinarrean, Zuzendaritza berritu du joan den larunbatean, irailak 15, egina duen Ohiko Biltzar Orokorrean. Agintealdi berria hasiko duen Zuzendaritza Batzorde berriak Maria Laura Eguren dauka lehendakari, eta berarekin batera Teresa Ayerza, lehendakariorde; Pedro Maguregui Larranda, idazkari; eta Graciela Laborde, diruzain, besteak beste.
2007/09/15
Gloria Totoricagüenak, joan den urteko urtarriletik Nevada-Renoko Unibertsitateko (UNR) Euskal Ikasketa Zentroko zuzendari denak, tupustean utzi du bere kargua eta baita Nevada-Renoko Unibertsitatea bera ere, eta bere trasteak erretiraturik datorren astelehenean ez da jadanik bertan arituko. EuskalKultura.com harremanetan jarria da Idahoko Boisen jaiotako euskalamerikar irakaslearekin, xehetasun eske, baina berak nahiago izan du datorren astean plazaratuko den prentsa oharra aipatu, Euskal Herritik kanpo munduan euskal ikasketa zentro garrantzitsuena den honetan gertatutako gorabehera hau bertan behar bezala azalduko delakoan.
2007/09/14
Aurten ere Bartzelonako Euskal Etxeak parte-hartze handia izango du La Mercé jaietan. Bartzelonako zaindariaren jaia egun handia da bertakoentzat eta Euskal Etxeak prestatu ohi du bartzelonarrei eskaintzeko euskal jai berezia. Aurtengo ekitaldiak datorren asteko larunbatean hasiko dira: Txan Magoa, batukada, joaldunak, Alproja antzerki taldea eta Bakearen Aldeko Kontzertua, Betagarri (Euskal Herria), Verdcel (País Valencià) eta La Carrau (Katalunia) taldeekin.
2007/09/14
Euskadiko Orkestra Brasilen zehar egiten ari den bira emozioz beteriko bidaia bihurtzen ari da. Ez bakarrik Sao Paulon eta Santos hirietan eman dituzten kontzertuen harrera onagatik, baizik eta Brasileko bizimodua eta gizartea gertutik ezagutzeko aukeragatik. Asteazken honetan bertan Orkestrako kideak Heliopolis favelan izan ziren, bertako haurrei musika klase bat emateko asmoz. Musika marjinazioaren aurkako arma bihurtzen duen ekimen honek sakonki hunkitu zituen euskal musikariak. Orkestrako kideen kontakizuna ematen dugu jarraian.
2007/09/14
'Lagun Onak' Integrazio Lasterketa Mesedetako Ama Birjinaren omenez Pergamino hirian antolatzen den maratoi erdiaren barneko proba da. Ahalmen berezidun pertsonek parte hartu dezakete Euskal Etxeak antolatzen duen lasterketa honetan. Lagun Onak proba, baina, ez da lehia orokorrean sartzen eta edonork parte hartu dezake, adin eta kategoria mugarik gabe. Lasterketarekin jasotzen den dirua ongintzarako da, Karitas erakundearentzat hain zuzen. Hitzordua hilaren 30ean izango da, Pergaminoko Udal Parkean, 9:00etatik aurrera.
2007/09/14
Kolonbian da Iñaki Agirre Eusko Jaurlaritzako Kanpo Harremanetarako idazkari nagusia eta bisita luzatu du Bogota-ko Euskal Etxera eta hiri horretako Gernika Parkea ere bisitatu du. Bogotara iritsitakoan egin dioten harreran bertako hainbat erakunde eta elkarteetako ordezkariak bildu dira. Agirre, Ibarretxe lehendakariak datorren urrian Kolonbiara egin behar duen bidaia prestatzen dabil, gero eta harreman sendoagoak eta lankidetza euskal-kolonbiar sakonagoa lortzen ari den ahaleginaren sostenguan. Bestelako hainbat kontaktu burutzeaz gain, Euskal Etxearen egoitza inauguratuko du Ibarretxek aste gutxiren buruan.
2007/09/13
Bihartik hasi eta hilaren 29a bitartean Antioquiako Unibertsitate kolonbiarrak II. Euskal Aste Kulturala egingo du, Antioquiako Euskal Ikasketa Zentruak antolaturik, Unibertsitatearen laguntzarekin. Asteko egitarauak Jesus Arriola musikari eta irakasle euskalduna omenduko du, XIX mende bukaera aldera Kolonbiara heldua eta, besteak beste, Antioquiako Fundación Bellas Artes entzutetsuaren sortzaileetako bat izan zena. Euskal Astean mintzaldiak, euskal zinema zikloa eta argazki erakusketa ere izango dira.
2007/09/13
Mar del Platako Denak Bat Euskal Etxea, San Migel Eguna dela eta antolatu dituen hilabeteko ospakizunetan murgilduta dabil egunotan. Hilaren 30ean ospatuko dute San Miguel eguneko jaia hiri argentinarrean, baina bitartean makina bat ekitaldi prestatu dituzte giroa berotzen joateko. Horien artean, era guztietako proposamenak: mintzaldiak, gimnasia eta pilota txapelketak, erakusketak, zinema eta Jose de Ariztimuño Liburutegiaren 50. urteurreneko ekitaldi berezia.
2007/09/13
Members of Boise's Basque Community gathered for the 3rd annual Pete and Freda's Family Style Lamb Barbecue on Boise's Basque Block. With sheep wagons, music and dancing, the dinner raised money for the Cenarrusa Foundation for Basque Studies. More than 100 people, including Boise's Mayor David Bieter dined on the lamb dinner. Music was provided by the Basque County's own, Juan Mari Beltran. Following dinner, the guests danced jotas in the street on Boise's Basque Block.
2007/09/12
Arrakasta polita Australia ipar-ekialdeko Townsville hirian egoitza duen North Queensland Basque Club delako euskal etxeak lortu duena bertan urtero antolatu ohi den Cultural Fest izeneko kultura eta jatorri desberdineko gizataldeen biltoki den azoka edo elkarretaratzean. Jaialdi hau, bertako biztanleen artean topa daitekeen jatorri aniztasuna eta kultura aberastasunaren adierazgarri da eta hirian eta eskualdean dauden elkarte etniko eta kulturzaleen erakuslehio bihurtua da azken urteotan, beti ere publikoaren laguntzaz, aurtengoan 70.000 bisitari lortu dituztela jakinarazi baitute antoilatzaileek, stand-etan eskaintzen ziren argazki, informazio, ikuskizun eta janari mota ugarien dastatzaile.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
