euskal diaspora eta kultura
2008/10/17
Tres Arroyos herri argentinarreko Hiru Erreka Euskal Etxeak gaur arratsaldean banatuko ditu 'Egiazko edo alegiazko immigrante bati elkarrizketa' izenpean deitu zituen literatur sariak. Irabazleak, Tres Arroyos bertako Nora Gimenez eta Chaco probintziako Fabio Echarri izan dira. Esan bezala, sarien emate ekitaldia Hiru Errekak deitu duen ekitaldi batean izango da, arratsaldeko zazpietan, Euskal Etxearen egoitzean, Sarmiento 375ean.
2008/10/17
Urtero lortzen duen isla eta oihartzun handiaz egin da joan den larunbatean Chascomus herri argentinarrean bertako 'Zingirako Euskaldunak' Euskal Etxeak antolatzen duen Euskal Festa, aurtengoan bere XVIII. edizioan. Egunari pilota txapelketa batekin ekin zitzaion, ondoren esker-emate meza Katedralean, alkate hauteskundeak, euskara stand-a eta euskal dantzekin segi eta gauez berbena herrikoiarekin amaitzeko.
2008/10/17
Unai Basurko itsasgizonak (Portugalete, 1973) beste proiektu bati ekingo dio datorren azaroaren bederatzitik aurrera: Vendée Globe estropadan hartuko du parte, lau urtean behin antolatzen den lehia, munduari bira inongo eskalarik gabe ematea helburu. 'Gogotsu' dagoela erronkari ekiteko adierazi dio EuskalKultura.com-i portugaletetarrak. Munduan barrena itsasoz egin dituen bidaietan euskal etxe eta komunitateak ezagutu izan ditu Basurkok, tartean Sidney-koa, Australian, eta Valparaiso-koa, Txilen. 'Guztietan oso ondo hartu naute, eta benetan eskertzen diet' diosku.
2008/10/17
Dantzariz jantzitako 1.500 ikasle gazte bildu ziren Llavalloleko Euskal Echea eskolaren urteroko Euskal Jaian eta kolorez beteriko irudi jendetsua sortu zuten. EuskalKultura.com-ek jarraian irudi horiek irakurleekin partekatu nahi ditu, Alicia Eguigurenek egindako argazki erreportaiari esker. Urtero legez ikasleek Euskal Echeako errubi zelaia bete eta kalejira alaian aritu ziren, horrela eskola sortu zuten euskal argentinarrei omenaldia eginez.
2008/10/16
Egun polita, iragan larunbatean, urriak 11, Ipar Kaliforniako (AEB) Rocklin-eko 'Iparreko Ibarra' Euskal Etxeak deiturik Marysville ondoko Lincoln herrian egin dena. Tokiko Euskal Etxe gaztearen ohiko euskaldun bestarekin bateginik, NABO Kantari Eguna antolatzea ere bere gain hartu dute Rocklin-eko euskaldunek, lehen aldikoz. Eta eguna xarmantki joan da, orotara afaltzeko 230 presuna bildu direlarik, tartean goizean mus txapelgoan arizan, eta bazkalondoren Kantari Egunean arizan haur, gazte eta helduak. Kluba hasi zutenetik gertatu bezala, familia giroko elgarretaratzea da hemen egiten dena, haur eta gaztetxo frango bildurik, eta anitx urtez!
2008/10/16
Nafarroako gobernu burua, Miguel Sanz, gaur bertan heldu da Argentinara eta bihar hasiko du Rosarion datorren asteazkena artean luzatuko den bisita. Sanz Rosario eta Mendozako Nafar Etxeetan izango da eta bi hirietako agintariekin bilerak egingo ditu. Era berean Nafarroako gobernuak diruz laguntzen dituen zenbait ospitale eta laguntza zentrutara bisita egingo du. Asteburuan zehar Sanz presidenteak Rosarioko nafar etxearen frontoian jokatzen ari den 22 azpikoen Munduko Pilota Txapelketaren finalak ikusteko aukera ere izango du, besteak beste.
2008/10/16
Egia da tradizioa bat egiteko edozein ekitaldiren edizio dexente behar direla, baina Txikitero Eguna jaiaren estrainaldiarekin Caracaseko Eusko Etxeak lortu zuen erantzun ederra ikusita ia ziur esan daiteke datorren urtean ere egingo dutela. Caracaseko euskaldunek, Begoñako Amaren eguna, urriaren 11a, Bilbon egiten den bezala, txikiteroen tradizioarekin ospatzea erabaki zuten. Eusko Etxean antolatu zuten jaia, ardo eta pintxo onak dastatu eta lagunekin biltzeko aitzaki ezinhobea izan zen.
2008/10/16
Urtero bezala, ume eta neska-mutilek Llavallol-eko Euskal Echea eskolako rugby zelaia bete zuten euren dantza, abesti eta, batez ere, alaitasunarekin, Euskal Jaiaren edizio berri batean. Joan den urriaren 4ean egin zen jaia eta etxeko apaizak gogoratu zuenez 'eskolako kapera eraiki zuteneko 80. urtemuga'. Euskal Echea-ko Zuzendaritza Batzordeko lehendakari Simon Pedro Soroetek hitzaldi labur batean eskolan egindako azken hobetze eta eraikitze lanak aipatu zituen, eta baita laster abian jarri nahi duten ekimena ere, 'Udako Euskal Unibertsitatea'.
2008/10/15
Andres Urdaneta euskalduna Europa, Asia eta Amerika arteko komunikazio eta komertzio bideak ireki zituen itsasgizona legez da ezagutua. Franz Mayer Museoko klaustroan 'Andres de Urdaneta Novohispano 1508-1538' erakusketa ostiralera arte egongo da zabalik Mexiko DFn, Ordizian (Gipuzkoa) jaiotako itsasgizon honen bizitzan eta bidaietan oinarritua. Bere ekarpenak urrezko lekua dauka munduko itsas historian, nahiz eta britainiarra ez izateak bera baino merezimendu gutxiagoko itsasgizonak baino izen txikiagoa izatea ekarri dion. Oraingo aukera, ordea, azaleratzen ari da bere lan eta ekarria.
2008/10/15
Lonely Planet munduan arrakasta gehien dute bidaia gida argitaldarietako bat da eta urtero 'Blue List' izeneko zerrenda ateratzen du, hurrengo urterako bidaia onenen aukeraketarekin. The Times egunkari britaniarrak aurtengo zerrenda zein izango den aurreratu du eta gomendatutako hamar bidaien artean Euskal Herria agertzen da, Australiako Bay of Fires, Tailandiako Ko Tao edo Chileko Chiloe bezalako lekuen alboan. Lonely Planetek Euskal Herriko natura, mendiak, artea, gastronomia eta kale giroa azpimarratzen ditu. Euren esanetan, Euskal Herria 'dibertsio, eguzki, kultura eta edertasun koktela da'.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
