euskal diaspora eta kultura
2012/03/12
Martxoaren 22tik 25era Panaman egingo den Arte Eszenikoen 5. Nazioarteko Jaialdian izango da Kulunku Teatro konpainia gipuzkoarra "André & Dorine" antzezlan arrakastatsua aurkezten. Alzheimer-ari eta maitasunari buruzko hausnarketa hunkigarria da lana eta hitzik gabe antzezten dute aktoreek, maskarak jantzita. "Hitzik ez dugu erabiltzen eta, paradoxikoki, horrek lana edonon ulergarri izatea dakar; Kuban zein Nepalen", azaldu dio EuskalKultura.com-i Kulunkako Garbiñe Insausti aktoreak. Azken urtean gelditu gabe ibili da taldea nazioartean eta, antza, horrelaxe segituko du aurten ere: Panamaren ostean Turkia, Errusia, Finlandia, Norvegia, AEB, Txina... etorriko dira.
2012/03/12
Jaurlaritzako Kanpoan dauden Euskal Herritar eta Gizataldeentzako Zuzendaritzak sarean ezarri du 2011ko Gaztemundu eta Gizataldeen V. Mundu-Batzarra gau harturik errodatu zuen bideoa. Bideoa Mundu-Batzarraren azkeneko egunean proiektatu zen Donostiako Kursaalen eta bi ekimen hauetako iazko edizioko laburpen bat egiten du hamar bat minutuz. Hona irudiok.
2012/03/09
Liverpoolgo Unibertsitateak Iberian Week izeneko jardunaldiak burutuko ditu astelehenetik landa eta iberiar penintsulan hitz egiten diren hizkuntzei buruzko solasaldiak, literatur irakurraldiak eta kontzertuak eskainiko ditu. Euskarak bere lekua izango du, unibertsitate honetan ematen den Euskara eta Euskal Kultura irakurlegoari eta Etxepare Euskal Institutuari esker. Liverpool-en izango dira, besteak beste, Kirmen Uribe poeta eta Mikel Urdangarin musikaria, Xabi Paya irakasle eta bertsolaria, Argitxu Camus historialaria eta Zea Mays rock taldea.
2012/03/09
Cañuelaseko Euskal Etxeak urtero Aberri Eguna ospatzeko antolatzen duen Dantzarien Elkarretaratzea Argentinako euskal egutegian marra gorriz markatuta dagoen horietakoa da, hitzordu garrantzitsua bilakatu baita azken urteotan herrialde honetako hainbat euskal etxetako dantzari batez ere gazteentzat. Seigarren edizioa du aurtengoa eta, lehenengo deian, martxoaren 31 eta apirilaren 1eko astebururako iragarri bazen ere, euskal etxe antolatzailetik atzo adierazi zutenez, apirilaren 14 eta 15era pasatu da azkenean, "ostatatzeko kontuak medio, horretarako erabili ohi dituzten Smata-ko instalazioak hasieran aipatutako datetan ez baitira egoki erabiltzeko moduan egongo".
2012/03/09
"Aberriaren mugak" kantutik hasi eta "Xarmangarria zira" abestiraino; ia 80 kantu igo ditu bere webgunera NABO Ipar Ameriketako euskal etxeen federazioak. Abestiak duela zenbait urte bildu zituen federazioak "Hi Kantari" izeneko bilduman, euskal-amerikar komunitateko kideen artean kantatzeko ohitura mantentzeko eta suspertzeko asmoz. Orain eguneratu egin dute kantutegia eta teknologia berriei esker eskuragarri jarri dute interneten: NABOren webgunean daude abestien letrak eta doinuak, mundu osoko kantazaleek balia ditzaten. Gainera, smartphone edo mugikorren bitartez ere kontsulta daiteke webgunea.
2012/03/09
Emakumeen Nazioarteko Eguna ospatu zen atzo mundu osoan eta hedabideak, gizarte sareak eta hainbat erakunde emakumeen eskubideen aldeko aldarrikapenak egiteko bitarteko bihurtu ziren. Euskal etxeek ere zeresan handia dute arlo honetan, eta karia horretara emakumeen omenezko ekintzak gauzatuko dituzte asteburu honetan euskal instituzio batzuetan, Chascomusekoan kasu. Emakume guztiak, baina bereziki euskal etxeari ekarpen handia egindakoak, gogoan izango dituzte herri honetako euskal etxeko kideek. Zingirako Euskaldunak-eko 'alkate' izan zirenei omenaldi bat egingo zaie bihar, arratsaldeko 7etan, erakundearen egoitzan. Ekimen honekin, urtarrilean hasitako ekimen-zerrenda luzea betetzen jarraitzen dute euskal etxeko arduradunek.
2012/03/08
Bordeleko Euskal Etxeak luzatu du gonbitea eta Frantziako beste zazpi euskal etxe edo elkarte euskaltzalek baiezkoa eman diote. Topaketa martxoaren 24 eta 25ean egingo da, Bordelen, Eskualdunen Biltzarra elkartearen egoitzan, eta bertan izango dira Paris, Paue, Lourdes, Montpellier, Tolosa eta Bordeleko elkarteak (azkeneko bi hirietan bina euskal elkarterekin). Euskal etxeek euren esperientziak trukatzeko eta lankidetza sustatzeko bideak bilatuko dituzte. Topaketaren bigarren egunean, bertaratutako ordezkariek Bordeleko euskal etxearen Odolkiaren Eguneko bazkariaz eta bestaz gozatu ahal izango dute.
2012/03/08
Egun handia izango da larunbata Zuberoako euskal kulturarentzat; izan ere, zubereraz ekoitziriko lehen filma estreinatuko da Maulen. Filman idazle izan nahi duen zuberotar gazte batek Ameriketan gidoilari ibili zen osabaren laguntza bilatzen du. Bi protagonisten arteko harremana eta gaztea deskubritzen doan istorioa dira laren ardatza. Peio Cachenaut-ek zuzendu du eta auzolanean ekoitzi dute Zuberoako Hebentik kultur elkarteak eta Aldudarrak Bideok. Baleuko ekoiztetxeak ere parte hartu du proiektuan, eta Hegoaldeko zinemetan estreinatuko da, baina Iparralderako banatzaile bila ari dira arduradunak. "Penagarria da Maulen egindako filma Hegoaldean lasai ikusi ahal izatea eta ez, ordea, Baionan", esan dio EuskalKultura.com-i Hebentik-eko Mixel Etxekoparrek.
2012/03/08
Hiriburu argentinarreko Giza Eskubideetako eta Aniztasun Kulturaleko Azpi-Idazkaritzak antolaturik, eta “Buenos Airesek ospatzen du” jaialdiaren 2012ko edizioa inauguratzeko, “Gizataldeen Sukaldaritza-Gunea” burutuko da datorren larunbatean hiriko Mayo Etorbidean. Dastaldian parte hartuko duten 50 kolektibitateen artean, Euskal Herrikoa aurkitu ahal izango da Argentinako bi erakundek ordezkaturik: Euskaltzaleak eta Nafar Etxea. Bi stand-ak, plater tipikoen txokoak izateaz gain, Euskal Herrira begirako leiho bihurtuko dira Pirinioetako paisaia, irudi, arte eta historiara hurbildu nahi dutenentzat. Hitzordua martxoaren 10ean izango da, arratsaldeko 4etatik gaueko 11ak arte.
2012/03/07
HABEk deiturik, Europako euskal etxeetako euskara irakasleak Bartzelonan bilduko dira bihar, bi eguneko lantegia egiteko. Europa mailako irakasleek horrelako topaketa egiten duten lehen aldia da; izan ere, aurreko bileretan espainiar estatuko irakasleek soilik parte hartu izan dute. Jauzi handia da eta maila oso desberdinetan lanean ari diren kideei elkar ezagutzeko eta elkarrengandik ikasteko aukera emango die: batzuk ikasle gutxi dituzte edo klaseak abiatzen ari dira, eta beste zenbaitek, berriz, eskarmentu handia dute eta ikastaro jendetsuak kudeatzen dituzte. Bilkura honekin batera Bartzelonako Euskal Etxeak euskal etxe europarretako ordezkari gehiago ere bilduko ditu ostegun eta ostiralean, elkar-ezagutze eta koordinazio asmo berarekin.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
