euskal diaspora eta kultura
2012/05/15
Aurten bere Mendeurrena ospatzen ari den Txileko Euzko Etxea eskarmentudunarekin batera, bada Santiagon beste euskal etxe ofizialdu bat. Colectividad Vasca de Chile (Txileko Euskal Gizataldea) du izena eta Mapochoko hiriburuko 'Estadio Español' elkartearen baitan mugitzen den euskaldun talde batek sortu ondoren, Eusko Jaurlaritzak 2010ean onartu zuen euskal etxetzat. Imanol Carredano izan zuen lehenengo lehendakari, eta Rossana Arza lehendakariorde. Aurten Zuzendaritza Batzordea berritzeko hauteskundeak egin direlarik, Rossana Arza pasatu da lehendakari izatera. Elkarteko Zuzendaritza Batzorde berrituko lau kidek bisita egin berri diote Euskadiren Txileko Ordezkari den Ana Urchueguia-ri Ordezkaritzak Las Condesen duen egoitzan.
2012/05/15
Hamar urte daramatzate Buenos Aires probintzia argentinarreko General Villegas herriko euskaldunek euskal kultura zabaldu eta babesten. Eta urteak pasatu ahala sendotzeaz gain, gizataldearen mugak gaindituz joan da euskal erakundea. Izan ere, herriari zuzendutako hamaika proposamen garatzen dira ‘Villegasko Euskaldunak’en, tartean, aurten hasitako ahalmen bereziko haurrentzako dantza klaseak. “Paregabeko eskarmentua da guretzat, pozik eta harro gaude aurrera eraman ahal izateagatik”, adierazi dio euskal etxeko lehendakari Diego Tellecheak EuskalKultura.com-i.
2012/05/14
Bere urteroko Ohiko Biltzar Nagusia egin du Bahia Blancako euskal etxea argentinarrak eta erakundeko araudiaren arabera Zuzendaritza Batzordea berritzeko bokak egin ondoren, Mikel Irazustak segitzen du elkarteko buru, lehendakari legez, berarekin batera batzordekide direla, besteak beste Javier Ederra, lehendakariorde; Maria Amelia Irastorza, idazkari; Juan Alberto Sosa, idazkariorde; Alicia Iriarte, diruzain; eta Iñaki Ederra, diruzainorde.
2012/05/14
Valladolideko Gure Txoko elkarteko muslari bikoteak irabazi zuen iragan maiatzaren 5ean Estatuko Euskal Etxeen Mus Txapelketa eta irailaren 21etik 29ra Alaskan izango dira, bertan jokatuko den Nazioarteko Euskal Etxeen Txapelketan parte hartzeko. Agustin Ormaechek eta Alberto de Antoniok Bartzelona, Madril, Valentzia Mallorca eta Salouko muslariak garaitu zituzten Bartzelonako Euskal Etxean jokatu zen finalean.
2012/05/14
Buenos Aires hirian, euskara eta euskal kultura sustatzeko lanetan segitzen du Eusketxe edo, izen osoz, Eusko Kultur Etxea erakundeak. Gaur bertan Euskal Herria ezagutzeko hasimasi tailer bati ekingo dio Mexiko 1880 helbidean duen egoitzan, baina larunbaterako Euskal Mitologia hizpide izango duen hitzaldia iragarri du eta baita ere, zenbait maiztasunez, euskal dantza tailerra eta proposamen gehiago, hala nola 'Euskal nortasuna' izeneko argazki lehiaketa. Aldi berean, Eusketxek, une ekonomiko latza pasatzen ari dela adierazten du eta lagundu nahi duenarentzat, elkarteak sostengu-bonoak salgai jarri dituela gogoratzen du.
2012/05/14
Munduko tenore handienetako izan zen bere garaian eta 200 bat grabaketa egin zituen, areto liriko garrantzitsuenak ere bisitaturik. Ortuellan jaio zen Florencio Constantino 1868an eta beste hamaika euskaldunek bezala jaioterria utzi eta Argentinara emigratu zuen, Buenos Aires probintziako Bragado herrian aurkituko zituelarik babesa eta bere karrera bideratzen lagundu zioten pertsonak. Gailurrean zegoela, bere izena hartuko zuen antzokia eraikitzea sustatu zuen Bragadon. Constantino Antzokia 1912an inauguratu zen. Horren Mendeurrenean gauden honetan, tenorearen biografia berri bat argitaratuko da Euskadin; horren prestaketan dabil Konrado Mugertza ikertzailea eta kari horretara bisitaldia egin du Bragadora, herriko alkatea eta bertako Danak Anaiak euskal etxea anfitrioi.
2012/05/11
San Frantziskoko euskal komunitateak eta hiriko musikazaleek euskal musika tresna zaharrenetako eta misteriotsuenetakoa jotzen ikasteko aukera bikaina du udaberri honetan, Basque Cultural Center-en hasi berri den txalaparta ikastaroari esker. Sei asteko ikastaroa da, eta Iñaki Lopez de Luzuriaga txalapartaria da irakaslea. Oraindik lekua dago ikastaroan eta parte hartu nahi duenak izena eman dezake, nahiz eta lehen eskola iragan apirilaren 24ean eman zuten.
2012/05/11
Sasoi berrietara egokitzen ari da Quebec-eko Euskaldunak elkartea eta azken urteetan izan duen biziberritzeak isla izan du zuzendaritza batzordearen antolaketan. Iragan apirilaren 22an elkarteak Biltzar Nagusia egin zuen eta bertan euskal etxeko bazkideek zuzendaritza batzordeari lau aholkulari gehitzea erabaki zuten. Aholkulari hauek elkartearen ekimenetan laguntzea izango dute helburu. Biltzarraren ostean, bazkideek Aberri Eguneko jaiaz gozatu zuten.
2012/05/11
Maiatzaren iraultzaren urtemugako jai egunak aprobetxatuz, elkarretaratze berezi bat egingo dute Buenos Aires probintziako Chivilcoy herriko euskaldunek datorren maiatzaren 26an. Arte Folkloriko Institutuarekin batera, ‘Lagunarte euskal argentinarra’ ospatuko dute Beti Aurrerako bazkide eta partaideek artista gonbidatu batzuk lagun. 200 txartel jarriko dira salgai datorren astean eta euskal etxetik gomendatzen dute aldez aurretik erostea. Erreserbak facebook-ez eta erakundearen blogaren bidez egin daitezke. Beti Aurreratik oroitarazten dute blogean euskal etxeak antolatutako azken ekimenen berri etengabe eguneratuak irakur daitekeela.
2012/05/10
Laughter Day edo Barreen Eguna egin zuen iragan apirilaren 28an London Basque Society elkarteak, eta, Euskal Herritik zuzenean, gonbidatu talde aparta heldu zen hirira, euskal etxeko haur eta nagusiei irribarra eragiteko prest. Txikientzako protagonista nagusiak Porrotx, Marimotots, Patakon eta kuadrila izan ziren; Euskal Herriko umeak zoratu egiten dituzte pailazo hauek eta Londresko umeak ere azkar asko liluratu zituzten. Nagusiek, aldiz, Rafa Rueda kantariaren kontzertuaz gozatu zuten. Euskal Etxeak argazki sorta zabala jarri du sarean; guk gutxi batzuk eta egonaldiaren bideo bat bildu ditugu geurera.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
