euskalkultura.eus

Ameriketara joan dira aurten Valentziko Euskaltzaleok eta Laurak Bat euskal etxeek antolatu duten Diaspora Gutunen Lehiaketaren sariak, eta meritua ez da makala, kontuan izanda lehiaketa euskara hutsean zela. Bigarren edizioa izan da aurtengoa eta atzerriko parte hartzea handia izan dela diote antolatzaileek. Saridunak honakoak izan dira: euskara ikasleen atalean Argentinako Delia Beatriz Etchegaray, eta euskaldunen kategorian Uruguaiko Andrea Bella. Zorionak bioi!

Valentzia, Espainia. Valentziako Euskaltzaleok eta Laurak Bat elkarteek iragan urtarrilaren 30ean eman zituzten aditzera Diasporako Gutunen lehiaketaren irabazleen izenak, egun horretan egin zuten Literatur Galaren baitan. Laurak Bat elkartearen egoitzan egin zen ekitaldia, eta bertan irabazleen gutunak irakurri zituzten (erderara itzuli ere, euskerarik ez zekitenentzako).

Epaile lanetan aritu zen Garikoitz Knörr filologo eta euskal gaietan aditua, eta pozik ziren antolatzaileak aurten lehiaketan nazioarteko partehartzaile mordoxka izan delako. Are gehiago, irabazleak Ameriketakoak izan dira, bi kategoriatan: ikasleak eta euskaldunak.

Ikasleen atalean saria Argentinara joan da; zehazki, Rio Negroko Delia Beatriz Etchegarayrengana. "Eraztuna" gutuna aurkeztu zuen berak. Euskaldunen atalean Andrea Bella montevideoarra izan da irabazle. Andrea euskera ikaslea izan da Euskara Munduan programarekin (HABE eta euskal etxeak) eta gaur egun euskara irakasle da. Berak "Ene alaba maitea" gutuna aurkeztu zuen. Andreak Uruguaiko euskal komunitatearen berri ematen du, euskaraz, "Uruguaiko azken berriak" blogean. Irabazleek liburu sorta bana jasoko dute etxean datozen egunetan.