euskalkultura.eus

Santiago, Txile. Santiagoko Gure Etorkia kultur elkarteak gero eta lagun gehiago biltzen ditu Aberri Eguneko jaira; izan ere, ekitaldi koloretsu eta orijinala egiten du beti. Aurten ere taldeko lagunak San Cristobal mendiaren tontorrean bildu ziren, martxoaren 31n, eta hango Eusko Enparantzan ospatu zuten festa. Bertara bildu ziren besteak beste Rafael Kutz, Euskadiko ordezkari berria Txile eta Perurako; Rossana Arza, "Colectividad Vasca de Chile" elkarteko presidentea, eta herrialde honetan ikasketak egiten ari diren hogei bat unibertsitario.

Ekitaldia abiatuz meza elizkizuna egin zen, Colectividad Vasca de Chile elkarteko koruaren ahotsek lagunduta, Raimundo Riquelme antolatzaileak EuskalKultura.com-i azaldu dionez. Soraya Carvajal sopranoak zuzentzen duen koruak euskal kantuak abestu zituen, horien artean Iñigo Ereserkia, Damu Otoitza, Ogi Zerutik eta Agur Maria. Meza ostean aurreskua dantzatu zen, Rafael Kutz ordezkari berriari ongi etorria eginez.

Txistulari gazteen erakustaldia

Jarraian, dantzariek erakustaldia eman zuten, Hilario Olazaran txistulari gazteen taldearekin batera. "Ezusteko ederra izan zen sei txistulari gazte hauek entzutea. Angel "Gotzon" Espinozaren gidaritzapean, trebetasunez jo zituzten fandangoak eta kalejirak; gure aspaldiko amets bat egi bihurtuta", esan du Riquelmek. "Azpimarragarria da ere Txilen unibertsitate ikasketak egiten ari diren hogei bat gazteren partehartzea. Festarekin bat egin zuten, dantzan eta irrintziak botatzen".

[Euskal dantzak San Cristobal mendatean (argazkia RRiquelme)]

[Angel "Gotzon" Espinozak zuzentzen duen txistulari taldeak azken hilabeteotan ikasitakoa erakutsi zuen (argazkia RRiquelme)]

Azkenik, Riquelmek azaldu duenez, Rossana Arzak, "Colectividad Vasca de Chile" euskal etxeko presidenteak, "ekitaldiarekin bat egiteko gonbitea eskertu zuen eta datorren urtean ere bertan izateko asmoa agertu zuen".