Lima, Peru. Covid-19ak eragindako pandemiak bultzaturik –62 milatik gora hildako eragin ditu dagoeneko Perun– Limako Euskal Etxeak birtualtasunean eman zien segida bere jarduerei. Eta sareetan eskaintzen duen kultur eskaintza zabaltze aldera, Pedro Arrupe jesuita bizkaitarrari buruzko bere artikulu bat eman du argitara Euskal Etxeko sareetan elkarteko lehendakari Raul Noblecillak haren heriotzaren 30. urteurrena dela-eta.
Pedro Arrupe 1907an jaio zen Bilbon eta Jesusen Konpainiako Prepositu Generala izan zen 1965etik 1983ra bitartean. Ibilbide luzea egin zuen misiolari eta 27 urte pasa zituen Japonian. Bertan harrapatuko zuten Bigarren Mundu Gerrak eta istilu armatuaren amaiera ikaragarriak. Artikuluan, Arruperen bizitzako hainbat une garrantzitsuetan sakontzen du Noblecillak
“Hiroshimako bonba atomikoak, Japonian landutako inkulturazioaren misio-filosofiak, eta ‘besteentzako gizonak’ eta ‘justiziaren aldeko aukera’ printzipioei eutsiz Konpainian egindako aldaketa sakonek Konpainiako General garrantzitsuenetako bat bihurtu zuten Arrupe”, azaltzen du Noblecillak.
Raul Noblecilla perutarra da, Astigarragako euskaldunen ondorengoa, eta jesuitek munduan barreiatuta dauzkaten ikastetxeetako batean ikasi zuen, Liman, Bertan izan zuen lehenengoz Pedro Arruperen berri eta bertan ezagutu zuen haren bizitza eta lana. Artikulua hemen irakur daiteke.
Lagun bati bidali
Komentarioa gehitu
