Kolonbia eta Venezuelarako Euskal Ordezkaritza izango denaren tokia erosi du Jaurlaritzak, Bogotá-ko Calle 73-n

2008/07/31

PUBLIZITATEA

Aurrera segitzen dute Eusko Jaurlaritzak Kolonbia eta Venezuelarako bere Ordezkaritzaren egoitza zabaltzearren ematen ari den urratsek. Orain hilabete batzuk Ordezkari kargurako Rafael Kutz donostiarra izendatu ostean, Ordezkaritza baitaratuko duen lokala erostea baimendu du aste honetan Jaurlaritzaren Gobernu Kontseiluak. Bogotá hiriburu kolonbiarreko Calle 73-n kokatzen da, 7. errepideko 47/49/51 zenbakietan.

Vitoria-Gasteiz. Jaurlaritzak ohar baten bidez jakin arazi duenez, astearte honetako Gobernu Kontseiluak, Kolonbian eta Venezuelan Euskadiko Ordezkaritza izateko, eraikin baten eta hiru aparkalekuren erosketa baimendu du Bogotan, 958.800.000 pesoko (330.000 €) prezioan. Erosiko den egoitzak 198 metro karratu ditu, eta bulegoak hartzen dituen seguru eta egoki prestatua den eraikin moderno batean kokatuta dago, inguruan lehen mailako enpresa eta erakundeak daudela, hori Euskadik erakutsi nahi duen irudiarekin bat datorren gauza izanik, segitzen du oharrak.

Bogotako Calle 73-n kokatzen da, 7. errepideko 47/49/51 zenbakietan, eta inguruan zerbitzu ugari eta banku garrantzitsuenen egoitzak daude, hiriburuan seguruenetarik kontsideratua den auzo batean.

Hasiera batean, egoitzan lau pertsona arituko dira lanean: Ordezkaria bera, bi teknikari eta Idazkari bat. Dena dela, epe laburrean langile kopurua handitzera doa (1 eta 3 arteko langile gehituz), gaur egun Kolonbiaren eta Euskadiren arteko harremanak estuak baitira ekonomia-industria alorrean, eta baita hizkuntza elebiduna, osasuna, ingurugiro edota lanbide-heziketari dagokionean ere.

Lotura interesgarriak

Euskadiren kanpoko Ordezkaritzak
Eusko Jaurlaritzaren webgunetik