euskalkultura.eus

Mountain Home, AEB. “Euskal Etxien hasi eta amaitu genduan, frontoi alboan. Apur bet herrixen barruen eta gero kanpotik egin genduan buelta”, Jausororen berbatan. Korrikalari gazteak eta nagusiak ibili ziren, bakoitza bere abiaduran, “batzuk arinago, beste batzuk astiroago, baina danak ondo”. Arratsaldeko ordu bietan hasita, ordubete behar izan zuten, gutxi gora-behera, ibilbidea amaitzeko. Ondoren, jaialdi osteko merienda lauretan hasi zen.

Familiak, zahar, gazte eta umeak giro onean euskararen inguruan batuak egunpasa polit bat ospatzeko, hori da Mountain Home-ko 'Korrika Fun Run' (fun run-ek, korrikaldi dibertigarria nahi du esan). Euskal Herrian Korrika bi urtean behin egiten bada, hemen urtero, formato txikian baina borondate eta atxikimendu handian. "Euskara dibertigarria eta ondo pasatzeko tresna delako".

“Txorizoa, bokadilloak, entsalada, ardoa eta horrelakoak ekarri ebazan jendeak”, azaltzen du Jausorok. Euskal Etxeko kanpoaldean egin genduan jan-edana, lagunartean batuta gozatuz. “Ez zan kanpoko inor bez etorri, danak bertako euskal etxekoak izan ginan”, erantzun du Jausorok batu zan jendeaz galdetuta.

2011. urtean antolatu zuten lehen aldiz Korrika Mountain Home-n eta ordutik “urtero itten dogu”, azaldu du. Euskal Herrian Korrika ospatzen denean otsaila eta martxoa inguruan izaten denez, orduan ospatzen dute Idahoko herri honetan ere. Baina Korrika urtea ez denean, hobekien doakienean antolatzen dute lasterketa Mountain Home-koek.