euskalkultura.eus

Boise, Estatu Batuak. Idahoko politika munduan zerbitzu publikoan hautetsi gisa gehien egon den pertsona izan da Pete Cenarrusa, baita Estatu Batuetan estatu-idazkari luzeen egon dena. Joan den igandean hil zen Boisen 95 urte zituela eta bera ohoratzeko ekitaldiak asteazkenean hasi ziren, Boiseko funeraletxe batean berari errespetua erakusteko aukerarekin eta atzo goizean jarraitu, Idahoko Kapitolioan, familia, agintariak eta lagunak bildu zituen oroitzapen eta omenezko ekitaldi batekin, gorpua bertan zela. Hor arratsaldeko seiak arte egon zen hil-kapera.

Freda alarguna eta agintari eta lagunekin batera, leku berezia izan du ekitaldiotan Eusko Jaurlaritzaren izenean bertara New Yorketik bildutako Euskadiren Ordezkari Ander Caballero Barturenek. Halaxe izan zen baita ere Kapitolioan, non hitz batzuk esan zituen atrilean, bertaratutakoei Urkullu lehendakariaren agurra eta doluminak ekarriz.

[Pete Cenarrusaren erretratua Kapitolioaren erdiguneko sarreran, hil-kaperarako sarreran]

[Familia, agintariak eta Idahoko gizarteko ordezkariak Kapitolioko hil-kaperan gorpua bertan eginiko ekitaldian]

[Hitza hartu zutenen artean, Ipar Ameriketarako Euskadiren Ordezkari Ander Caballero Barturen, Eusko Jaurlaritzaren eta lehendakariaren dolumin eta esker oneko mezuen ekarle]

[Ander Caballero Euskadiren Ordezkaria Freda Pete Cenarrusaren alargunarekin hizketan]

[Zerraldoaren gainean ohorezko lekuan Eusko Jaurlaritzak bidalitako lore-koroa ezarri zuten. Eusko Jaurlaritzari oso atxikia zen Pete Cenarrusa]

[Tratamendu eta ohore instituzional eta militarrak jaso zituen gorpuak, Kapitolioko leku hautu batean ipinitako hil-kaperan]

[Idahoko Kapitolioan bandera guztiak masta erdian, Pete Cenarrusaren oroiz eta ohoretan. 53 urtez izan zen Cenarrusa bertan hautetsi, horietatik 36 estatu-idazkari, eta aurretik Ordezkari-Ganberako presidente eta kide]

Cenarrusa "euskal-amerikar, lagun on eta Euskal Herriaren sostengatzaile sutsu eta nekaezin" gisa definitu ostean, Cenarrusa Eusko Jaurlaritzaren kanpo harremanen laguntzaile izan zela esan zuen, eta zubi bat Euskadiren eta Diasporako euskal komunitateen artean, bere galerarekin "Euskadik eta oro har munduko euskaldunek galera handia izan dute"la adieraziz. Esker biziak eman zizkion Caballero Baturenek Cenarrusari, Euskal Herriaren aldeko bere lan eskerga eta engaiamendu handiagatik.

Gaur Saint John katedralean egingo diren elizkizunen ondotik, bihar ehortziko dute Pete Cenarrusaren gorpua Boiseko Bellevue hilerrian.