Madril, Espainia. Euskara ikastea ezinezko helburua dela? Datorren asteazkenean Madrilgo Unibertsitate Complutensean egingo den ekitaldi batek mito hori gezurtatzea hartu du xede, hain zuzen ere unibertsitate bertako ikasle talde bat lagun, tartean ikasturte honetan, duela hilabete pasexe euskara ikasten hasitako ikasleak. Ez ditu seguruenik oraindik EiTBek kontratatuko, baina poema eta kontaketak euskaraz irakurtzeko eta euskal errepertorio modernoko kantuak kantatzeko gauza izango dira, euren aurrerapenak bilduko direnekin gogotsu partekatuz.
Asteazkenean bertan —urriaren 19an— Hizkuntzen eta Itzulpenaren Eguna dela-eta egingo dute, 12:30etan, Filologia Fakultateko A eraikineko Gradu Aretoan, Euskal Ikasketa Arloa antolatzaile, Complutense Unibertsitateko Linguistika eta Arabiar, Hebrear, Euskal eta Ekialdeko Asiako Ikasketen Departamentuaren baitan.
"Euskarari buruz erraz esaten dute, batere ezagutzarik gabe, hizkuntza zaila dela, oso zaila eta maizegi baita ikastezina dela ere. Planteatu dugun erronkan erakutsiko dugu mito hori faltsua dela", azaldu dio EuskalKultura.eus-i Karlos Cid Abasolo aipatu departamentuko irakasle titularrak. Abasolo bera Madrilen jaioa da eta heldua zela ikasi zuen euskara, gaur egun poema-liburuen egile eta zenbait liburuen euskaratzaile ere badela.
Ekitaldi osoa gaztelaniara itzuliko dute. Partaide izango dira Sendoa Aguirregoitia, José Hipólito, Begoña Martínez, David Nicolás eta Enrique Vercher.
Zeure euskara hobetu nahi? Euskarara gerturatzeko gonbidatu nahiko zenukeen lagunen batekin hurbildu nahi? Klaseek, gainera, unibersitate-kredituak dauzkate.
Lagun bati bidali
Komentarioa gehitu
