Olavarría, Argentina . Datorren astean amaituko da abuztuaren 2an, larunbata, eta 3an, igandea, FEVAk Olavarrian egingo duen Dantzari Tailerrean izena emateko epea. Topaketa Manu Irastorza (Bahía Blancako Unión Vasca), Josetxu Astolfi (Viedma-Patagonesko Aberri Etxea) eta Gaztemundu 2024ko partaide talde batek koordinatuko dute. Olavarriako Gure Etxe Maitearen egoitzan egingo da, eta, ohi bezala, parte hartu nahi dutenek euren euskal etxeari jakinarazi beharko diote. FEVAk uztailaren 25era arte jasoko ditu izena emateko eskaerak.
"Euskal etxeetako dantzarientzako bigarren tailer honek, entseguetako ohiko dinamiketatik atera eta bestelakoak garatu nahi ditu, ikuspegia aldatuz, eta ikaskuntza eta irakaskuntza metodologia aldatuz, eta esperientzia propioak trukatuz. Oraingoan gainera 2024ko gaztemundularien ekarpena izango dugu eta aktiboki parte hartuko dute han ikasi zutena zabaltzeko eta ideia berriak ekartzeko", esan dio EuskalKultura.eus-i Josetxu Astolfik.
Dantzaren kontzeptu integrala
Tailerrak "dantzarien kultur prestakuntza sustatu nahi du eta lagundu Euskal Herriko dantzaren kontzeptu integrala ulertzen, dantza tradizionala integrazio eta sozializazio bide gisa erabiliz, eta dantzariari mugimenduaz gozatzea ahalbidetuz, horren dimentsio ludikoa aztertu eta gorputzaren hizkuntzarekin konektatzeko aukera ematen dioten tresnak proposatuz, euskal dantzaren muina interpretatzeko".
Jorratuko dira besteak beste "dantza sozial eta ludikoak, oinarri koreografiko tradizionala, dantza tradizional jakinen teknika, eta genero identitatearen gaia euskal dantzan gaur egungo ikuspuntutik, Euskal Herritik zein Argentinatik begiratuta".
Lagun bati bidali
Komentarioa gehitu
