Rosario, Argentina. Koronabirusa dela eta, euskal etxeekin lotura duten ekintza gehienek etena izan zuten iaz eta Rosarion ‘Palabra de Vasco’ (Euskaldun Hitza) ez zen salbuespena izan. Hala ere, eta osasun baldintzak zertxobait hobetu direnean, Libertad Irratiko estudioetara itzuli dira Luis Maria Barrandeguy saioaren aurkezle historikoa eta bere lan taldea. Azken urte hauetan bezala, Cristina Arreguik eta Luisa Churrucak lagunduko diote Barrandeguy-ri programarekin, biak Rosarioko Emakume Abertzale Batza-ko kideak.
"Rosarioko Zazpirak Bat-en ahotsa" izateko jaio zen saioak atal bereizitua dauka Elkartearen berriak zabaltzeko. Eta atal horretan bertan azaldu zuen Barrandeguy-k bere azken programan Euskal Etxeak bazkide berriak lortzeko abian jarri duen kanpaina. ‘Palabra de Vasco’, gainera, haratago doa eta bazkide berri bakoitzari Rosarion hazten den Gernikako Haritzaren ezkur bat oparituko dio “etxean edo balkoian landa dezan".
Programaren gainerako atalei dagokienez, Euskal Herriari buruzko berriez gain euskal musika eta elkarrizketak ere partekatzen dituzte entzuleekin. Bilbotik Haritz Etxeberria sartzen da eta bere ekarria egiten du eta Onda Vasca irratiko eduki interesgarri batzuk ere aireratzen dituzte.
Gogora dezagun ‘Palabra de Vasco’ (Euskaldun Hitza) duela 18 urte dagoela airean eta astero emititzen duela, zuzenean astearteetan Rosarioko Libertad Irratiak eguerdiko ordu batetik ordu bietara, 1090 Khz frekuentzian. Irrati berak igandeetan errepikatzen du ordutegi berean. Interneten ere aurki daiteke, saio guztiak www.zazpirakbat.com webgunera igotzen dituztelako, bertatik noiznahi eta edonondik entzun ahal izateko
Lagun bati bidali
Komentarioa gehitu
