euskal diaspora eta kultura
2013/03/01
Gogora arazi nahi dizugu, irakurle, azken eguna duzula igande hau zozketan parte hartzeko. Korrika badator eta Korrikarekin batera, elastikoak! Korrika 18ren hamar elastiko zozketatuko ditugu gure irakurleen artean. Bat eskuratu nahi baduzu, bidal iezazkiguzu zure datuak (izen-abizenak, helbidea, telefonoa eta neurria) info@euskalkultura.com helbidera datorren iganderako. Epea, martxoaren 3ko 24:00etan bulatuko da eta sariak asteartean emango ditugu aditzera. Orain arte egin ez baduzu, hobe duzu mugitzea elastikoa eskuratu nahi baduzu!2013/03/01
Laprida herriko euskal bitxigintza tailerreko zortzi kideri ireki zizkien ateak Cnel. Pringleseko euskal etxeak euren eskulanak erakusteko. Bitxigileek Silvia Azpiazu-ren ardurapean egiten den ikastaroan trebatu ziren 2012an zehar eta irakaslearen hitzetan “euskal kulturatik jasotako kontzeptuak euren diseinuetan irudikatzen ikasi zuten tailerrean”. Erakustaldia osatzeko, etxeko Eusko Alaia abesbatzak bere errepertorioko bi kanta eskaini zituen. Lagun anitz bertaratu ziren euskal etxera eskulanez eta musikaz gozatzeko, tartean Carlos Oreste herriko alkatea.
2013/03/01
Buenos Airesko Iparraldeko Euskal Etxeko Kultur Azpibatzordeak gonbidaturik, Nafarroaren konkista, bere kausa eta ondorioak, hartuko ditu aztergai Aitor Pescador Medrano irakasleak. Hitzordua, Moreno kaleko erakundearen egoitzan izango da gaur, iluntzeko 7:30etan. Nafarroako Unibertsitateko ikertzailearen hitzaldi hau, baina, ez da Argentinako 2013ko bere biran lehena izango. Arturo Campion Euskal Ikasketa Guneko kide ere baden Pescadorrek Lapridako Lagunen Etxean eta San Miguelgo Askatasunaren Bidean ere eskaini zuen. Bi ekintzetan interes handia piztu zuen irakasleak bildutako lagun ugarien artean.
2013/02/28
Guadalajarako Nazioarteko Zinemaldia bihar bertan hasi eta martxoak 9a arte luzatuko da. Mexikoko zine topaketa garrantzitsuena da jaialdi hau eta aurten, aurreko edizioetan bezala, euskal zinemak leku nabarmena izango du bertan, izan ere, hiru euskal filme lehiatuko dira zinemaldiko sail ofizialean, Etxepare Euskal Institututak jakinarazi duenez. Film luzeen atalean Pablo Bergerren “Blancanieves” eta Lander Camareroren “What about Columbus” dokumentala izango dira ikusgai eta, laburrei dagokienez, Telmo Esnalen "Hamaiketakoa".
2013/02/28
Gero eta indar handiagoa hartzen ari dira Inauterietako jaialdiak Argentinan zehar. Are gehiago, Inauteri astelehena eta asteartea berriro jai-egun izateko 2011n hartutako erabakiak bultzada polita ekarri dio ospakizunari. Euskal etxeak ez dira giro eta asmo horretatik batere kanpo geratu eta 2013 honetan ere partaide izan dira Euskal Herriko musika, dantza, panpinak eta janaria erakus- eta gozagai. Hona Cañuelas, Gral. Villegas eta Lapridako ospakizunen argazki laburpena. Lapridan arrakasta itzela lortu zuen "Euskaldun behi-jeiztailea" izeneko karrozak.
2013/02/28
"8 Herrialdeak Zuzenean" irratsaioarekin hitzordu berria dute Diasporako euskaldunek igande honetan, arratsaldeko 8etatik 9:30etara. Saioa mundu osoko euskaldunei zuzendua da eta internet bidez ere entzun daiteke Diasporako edozein bazterretik. Benoit Etcheverry, Robert Acheritogaray eta Adelaide Daraspe esatariek gidatuko dute saioa, ohi bezala, eta bi gonbidatu berezi izango dituzte: aita Jean Pierre Cachenaut, zortzi urtez AEBetako euskaldunen apaiz izan zena, eta Itziar Aguirre sukaldari euskal argentinarra.
2013/02/27
Peruko Amazoniako Kukama herriko kidea da Roberto Awa Nari eta orain sei urte heldu zen Euskal Herrira, pelikula batean parte hartzeko. Eltze askotako burruntzalia da Roberto: musikari, aktore, irakasle, artisau, argazkilari... Guk egin berri dugun argazki lehiaketara bidali zituen lanen bitartez ezagutu genuen eta bizkaieraz egiten duen amazoniar honen istorioak biziki harritu gaitu. Perun ikasi omen zituen lehen hitzak euskaraz, apaiz batek oparitu zion kasete bateko abestia fonetikoki ikasita: "uh uh uh colore bisia, arrasá ke riaren contra..." kantatzen ei zuen.
2013/02/27
Otsailaren 19an izan zen Arrecifeseko euskal etxearen urtebetetzea eta 19an bertan gauzatu zen ospakizunetako bat, herriko Ricardo Gutierrez klubean. Urtemugako jaia, ordea, larunbatean, 23an, burutu zen, elkartearen egoitzan eta mota askotako proposamenekin, tartean, argazki erakusketa, dokumental bat, karaokea eta dantzak. 2013ko ekintzei dagokienez, laster hasiko dira ‘La Vasca’n, martxoaren lehenengo astean, hain zuzen. Urtero bezala, euskara eta dantza klaseak eta kultur ekintzak eskainiko zaizkie interesatuei. Eta nobedadearik ere bada: abesbatza berria, Martin Aguilar-en zuzendaritzapean eta txistu tailerra, Juan Ignacio Saez eta Marianela Rimini gidari.
2013/02/26
Eusko Jaurlaritzaren gaur goizeko Gobernu Kontseiluak Sara Pagola Aizpiri elgoibartarra izendatu du Euskadiko ordezkari berri Argentina, Brasil, Paraguai eta Uruguairako. Pagolak Argentina ondo ezagutzen du, izan ere 1997tik 1999ra Instituto de Calidad Alimentaria Vasco-Argentino erakundea abian jarri zuen Buenos Airesen. ELIKA Fundazioa elikagaien segurtasunaren inguruko institutuaren zuzendaria izan da eta 2011tik 2012ra Cristobal Balenciaga Fundazioko gerentea izan zen.
2013/02/26
Etxepare Euskal Institutuak eta Iparraldeko Euskal Kultur Erakundeak indarrak batu egin dituzte Oier Araolazak idatzitako "Euskal Dantza" dibulgazio liburua euskaraz, frantsesez eta ingelesez eskaintzeko. Etxeparek iaz argitaratu zuen lana, Euskal Kultura sailaren barruan, baina ordukoa euskara-gaztelania-ingelesa bertsio hirueleduna zen. EKEren lankidetzarekin liburua frantsera itzuli da. Datozen hilabeteetan Euskal Kultura saileko beste zenbait lan ere argitaratuko dira frantsesez.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
